ក្រុមបាតុករ​ចាកចេញ​ពីមុខ​ទូត​អាមេរិក​ក្នុងប្រទេស​អ៊ីរ៉ាក់​ហើយ ក្រោយ​អាមេរិក​គំរាម​

02-01-2020 11:11 am 517

​ក្រុម​កងជីវពល​អ៊ីរ៉ាក់​គាំទ្រ​ដោយ​អ៊ីរ៉ង់ ដែល​បាន​សម្រុកចូល​បរិវេណ​ស្ថានទូត​អាមេរិក​និង​បាន​គប់​ដុំថ្ម នៅមុខ​ទូត​អាមេរិក​ប្រចាំ​នៅ​ទីក្រុង​បា​ដា​ត​ប្រទេស​អ៊ីរ៉ាក់​ក្នុង​រយៈពេល​ពីរ​ថ្ងៃ បាន​ដកថយ​កាលពី​ថ្ងៃ​ពុធ​បន្ទាប់ពី​ទីក្រុង​វ៉ាស៊ីនតោន​បាន​បញ្ជូន​កងទ័ព​បន្ថែម និង​បាន​គំរាម​សងសឹក​ប្រឆាំងនឹង​ក្រុងតេអេ​រ៉ង់​។ 

​គួរ​ជម្រាបជូន​ថា ស្ថានទូត​ដ៏​ធំ​មួយ​ដែល​ត្រូវបាន​សាងសង់​នៅតាម​បណ្តោយ​ដង​ទន្លេ Tigris នៅ​កណ្តាល​ទីក្រុង​បា​កដាត ក្នុងកំឡុងពេល​ការកាន់កាប់​របស់​អាមេរិក បន្ទាប់ពី​ចូលលុកលុយ​ក្នុង​ឆ្នាំ ២០០៣ ដើម្បី​ផ្តួលរំលំ​សា​ដាម ហ៊ូ​សេន ត្រូវបាន​ក្រុម​កងជីវពល​អ៊ីរ៉ាក់​គាំទ្រ​ដោយ​អ៊ីរ៉ង់ នាំគ្នា​ប្រមូលផ្តុំ​គប់​ដុំថ្ម និង​ដុត​ប៉ុស្តិ៍​សន្តិសុខ នៅខាងមុខ​ស្ថានទូត​នា​ថ្ងៃទី​៣១​ខែធ្នូ​ឆ្នាំ​២០១៩​។ មូលហេតុ​ដែល​នាំឲ្យ​ផ្ទុះ​ការតវ៉ា ដោយសារតែ​ពួកគេ​មិន​ពេញចិត្ត និង​ខឹង​អាមេរិក​ដែល​បាន​បើក​ការវាយប្រហារ​តាម​អាកាស ប្រឆាំងនឹង​ក្រុម​កងជីវពល​អ៊ីរ៉ាក់​គាំទ្រ​ដោយ​អ៊ីរ៉ង់ នៅក្នុង​ប្រទេស​អ៊ីរ៉ាក់ បណ្តាលឲ្យ​ស្លាប់​គ្នីគ្នា​ពួកគេ​។ 

​កងទ័ព​អាមេរិក​បាន​បើក​ការវាយប្រហារ​តាម​អាកាស ដោយ​កំណត់​គោលដៅ​លើ​ក្រុម​កងជីវពល​អ៊ីរ៉ាក់​គាំទ្រ​ដោយ​អ៊ីរ៉ង់​កាលពី​ថ្ងៃអាទិត្យ បណ្តាលឲ្យ​ស្លាប់​សមាជិក​កងជីវពល​យ៉ាងហោចណាស់​២៥​នាក់ និង​៥៥​នាក់​រងរបួស​។ ក្រៅពីនោះ ក៏បាន​បំផ្លាញ​ទីស្នាក់ការ​កណ្តាល​របស់​កង​ជីវពល Kataib Hezbollah នៅ​Qaim​ប្រទេស​អ៊ីរ៉ាក់​ផងដែរ​។ មូលហេតុ​ដោយសារតែ​អាមេរិក​ខឹងសម្បា​នឹង​ក្រុម​កងជីវពល​គាំទ្រ​ដោយ​អ៊ីរ៉ង់ ដែល​បាន​វាយប្រហារ​ជា​ច្រើនលើកច្រើនសារ លើ​កងកម្លាំង​អាមេរិក​ប្រចាំ​នៅ​អ៊ីរ៉ាក់ ទើបបានជា​អាមេរិក​អស់​ការអត់ធ្មត់ បើក​ការវាយប្រហារ​សងសឹក​វិញ​៕

ព័ត៌មានផ្សេងទៀត