ចាប់ពី​ថ្ងៃនេះ​តទៅ ​ការឡើង​-​ចុះ​​វង់​ទស្សនា​ជា​ន់ទី​៣​នៃ​ប្រាសាទ​បា​យ័ន្ត​ត្រូវបាន​បិទ​​

01-01-2020 3:53 pm 211

​អាជ្ញាធរ​ជាតិ​អប្សរា បានប្រកាស​បិទ​ចរាច​រណ៍​ឡើង​-​ចុះ​នៅ​វង់​ទស្សនា​ជា​ន់ទី​៣(​ប្រាង្គ​កណ្តាល​)​នៃ​ប្រាសាទ​បា​យ័ន្ត ចាប់ពី​ថ្ងៃទី​១ ខែ​មករា ឆ្នាំ​២០២០ នេះ​តទៅ ដោយសារតែ​កត្តា​អាយុកាល​និង​កត្តា​ផ្សេងៗ​ទៀត​បាន​បង្ក​ឱ្យ​ប្រាសាទ​បា​យ័ន្ត​នេះ មាន​ភាព​សឹក​រេ​ចរិល​នឹង​កំពុង​ប្រឈម​ទៅនឹង​ហានិភ័យ​យ៉ាងធ្ងន់ធ្ងរ​មួយចំនួន​។​

​ក្នុងស្ថានភាព​នេះ បើតាម​អ្នកជំនាញការ​ចំពោះ​កិច្ច​ផ្នែក​អភិរក្ស​នៃ​គណៈកម្មាធិការ​អន្តរជាតិ​កិច្ច​គាំពារ​អភិរក្ស​និង​អភិវឌ្ឍន៍​រមណីយដ្ឋាន​ប្រវត្តិសាស្ត្រ​អង្គរ (​ហៅ​កាត់​ថា អាយ​ស៊ី​ស៊ី​-​អង្គរ​) បានផ្តល់​អនុសាសន៍​ឱ្យ​បិទ​ការ​ទស្សនា​នៅ​ជា​ន់ទី​៣​នៃ​ប្រាសាទ​បា​យ័ន្ត​ដើម្បី​ផ្តល់​លទ្ធភាព​ដល់​ក្រុម​អ្នកជំនាញ​សិក្សា​អំពី​ការខូចខាត និង​បញ្ហា​ប្រឈម​នានា ដើម្បី​រៀបចំ​ផែនទី​ហានិភ័យ ព្រមទាំង​កំណត់​ទីតាំង​អាទិភាព​ក្នុង​ការពង្រឹង​ស្ថានភាព និង​ជួសជុល​ផ្នែក​ដែល​ប្រឈម​នឹង​គ្រោះថ្នាក់​ទាំងអស់នោះ​។​

​ជាមួយគ្នានេះដែរ អាជ្ញាធរ​ជាតិ​អប្សរា ក៏បាន​គូស​បញ្ជាក់ដែរថា ចំពោះ​ទីតាំង​ទស្សនា​សំខាន់ៗ​នៅ​ផ្នែក​ខាងក្រោម​នៃ​ប្រាសាទបាយ័ន​ដែលមាន​ចម្លាក់​ក្បូរ​ក្បាច់រចនា​ដ៏​ល្អ​វិចិត្រ នៅតែ​បើក​ជា​ប្រក្រតី​សម្រាប់​ភ្ញៀវទេសចរ​ជាតិ​-​អន្តរជាតិ​ដដែល​៕


ព័ត៌មានផ្សេងទៀត