​អាមេរិកកំពុងតាមដាន​លើដំណើរការកាត់ក្ដី​របស់តុលាការកម្ពុជាលើលោកកឹម សុខា​

13-12-2019 12:11 pm 577
  ស្តាប់
ស្តាប់ជាសំឡេង

​សហរដ្ឋអាមេរិក កំពុង​តាមដាន​ដំណើរការ​កាត់ក្ដី​ទៅលើ​ប្រធាន​អតីត​គណបក្ស​សង្គ្រោះ​ជាតិ លោក កឹម សុខា ដែល​ចៅក្រម​ជំនុំជម្រះ​សាលាដំបូង​រាជធានី​ភ្នំពេញ នឹង​បើ​សវនាការ​ជំនុំជម្រះ​លើ​អង្គសេចក្ដី នា​ពាក់កណ្ដាល​ខែមករា ឆ្នាំ​២០២០ ខាងមុខនេះ ដើម្បី​បញ្ជាក់ថា​លោក កឹម សុខា ត្រូវ​មានទោស ឬក៏​យ៉ាងណា ពាក់ព័ន្ធ​នឹង​បទចោទប្រកាន់ «​សន្ទិដ្ឋិភាព​ជាមួយ​បរទេស​»​។ 

​ប្រមុខ​ការទូត​អាមេរិក លោក Mike Pompeo ប្រកាសថា សហរដ្ឋអាមេរិក​ប្តេជ្ញាចិត្ត​ខ្ពស់​ក្នុង​ការលើកស្ទួយ​សិទ្ធិមនុស្ស ដោយ​អាមេរិក​កំពុង​ចាត់វិធានការ​ជាក់ស្តែង​ជាច្រើន ដើម្បី​ប្រឆាំងនឹង​អំពើពុករលួយ ការរំលោភ​សិទ្ធិមនុស្ស និង​អំពើ​ជិះជាន់​ទាំងឡាយ​នៅ​ទូទាំង​ពិភពលោក​។ តាមរយៈ​ជំហរ​បែបនេះ សហរដ្ឋអាមេរិក បាន​ដាក់បញ្ចូល​សំណុំរឿង​ព្រហ្មទណ្ឌ​ប្រឆាំងនឹង​ប្រធាន​អតីត​គណបក្ស​សង្គ្រោះ​ជាតិ លោក កឹម សុខា ចូលក្នុង​បញ្ជី​ដែល​ត្រូវ​តាមដាន​ដោយ​យកចិត្តទុកដាក់​។ ប្រមុខ​ការទូត​អាមេរិក​ថ្លែង​បែបនេះ​កាលពី​ថ្ងៃទី​១១ ធ្នូ នៅ​រដ្ឋធានី​វ៉ា​ស៊ីន​តុ​ន សហរដ្ឋអាមេរិក នៅក្នុង​សន្និសីទ​សារព័ត៌មាន​មួយ​ដែល​ផ្ដោតលើ​ព្រឹត្តិការណ៍​អន្តរជាតិ ពាក់ព័ន្ធ​នឹង​នយោបាយ​ការបរទេស​អាមេរិក និង​បញ្ហា​សិទ្ធិមនុស្ស​អន្តរជាតិ​។​

​លោក Mike Pompeo ថ្លែងថា អាមេរិក​មិនមែន​និយាយ​តែ​មាត់​នោះទេ តែ​បាន​ចាត់វិធានការ​ជាក់ស្តែង ក្នុង​ការការពារ​សិទ្ធិសេរីភាព​របស់​ប្រជាពលរដ្ឋ​ជុំវិញ​ពិភពលោក​។ លោក​បាន​ហៅ​ការចូលរួម​ការពារ​សិទ្ធិសេរីភាព​នេះ ថា​ជា​កាតព្វកិច្ច​របស់​អាមេរិក​។ លោក​បញ្ជាក់ថា នេះ​ជា​អ្វីដែល​សហរដ្ឋអាមេរិក​ត្រូវធ្វើ ដើម្បី​ការពារ​សិទ្ធិមនុស្ស​នៅ​គ្រប់​ទីកន្លែង​លើ​ពិភពលោក​៖ «​យើង​ជា​ប្រជាជាតិ​មួយ​ដែល​មិន​ត្រឹមតែ​ឱ្យ​តម្លៃ​លើ​សិទ្ធិ​ដែល​មិនអាច​ដកហូត​បាន​រប​ស់មនុស្ស​គ្រប់រូប​នោះទេ ប៉ុន្តែ​ថែមទាំង​ជា​ប្រជាជាតិ​មួយ​ដែល​បង្កើតឡើង​ដើម្បី​ការពារ​សិទ្ធិ​ទាំងអស់នោះ​ផងដែរ​។ យើង​មិនមែន​ត្រឹមតែ​និយាយ​អំពី​រឿង​សិទ្ធិ​ទេ ប៉ុន្តែ​យើង​ក៏​ធ្វើ​សកម្មភាព​គាំទ្រ​សិទ្ធិ​ទាំង​នោះដែរ​។ យើង​ការពារ​សិទ្ធិ​នៅ​ជុំវិញ​ពិភពលោក ពីព្រោះ​វា​ជា​កាតព្វកិច្ច​របស់​ពួកយើង​ដែល​ត្រូវធ្វើ​ដូច្នេះ​។ ជា​ឧទាហរណ៍ យើង​កំពុង​ឃ្លាំមើល​សវនាការ​កាត់ទោស​មេបក្ស​ប្រឆាំង​នៅ​កម្ពុជា គឺ​លោក កឹម សុខា និង​រឿងរ៉ាវ​ជាច្រើន​ផ្សេងទៀត​»​។​

​សំណុំរឿង​របស់លោក កឹម សុខា ត្រូវបាន​ចៅក្រម​ជំនុំជម្រះ សម្រេច​លើក​ទៅ​បើកសវនាការ​ជំនុំជម្រះ​អង្គសេចក្តី នៅ​ព្រឹក​ថ្ងៃទី​១៥ ខែ​មករា ឆ្នាំ​២០២០ ក្រោយពី​ឆ្លងកាត់​ការ​ស៊ើបសួរ​រយៈពេល​២​ឆ្នាំ​។ សវនាការ​អង្គសេចក្តី គឺ​ដើម្បី​សម្រេច​ថា​លោក កឹម សុខា មានទោស​ពីបទ​សន្ទិដ្ឋិភាព​ជាមួយ​បរទេស ដូច​ការចោទប្រកាន់​ពិតមែន ឬក៏​យ៉ាងណា​? ខណៈ​កន្លងទៅ​ថ្មីៗ​នេះ សហ​មេធាវី​ការពារ​ក្ដី​ឱ្យ​លោក កឹម សុខា បាន​ជំទាស់​ទៅនឹង​សេចក្ដីសម្រេច​របស់​ចៅក្រម​ស៊ើបសួរ​សាលាដំបូង​រាជធានី​ភ្នំពេញ ដែល​បាន​បញ្ជូន​សំណុំរឿង​លោក កឹម សុខា ទៅ​ជំនុំជម្រះ​។ ក្រុម​មេធាវី​ការពារ​ក្ដី​ឱ្យ​លោក កឹម សុខា បាន​ប្ដឹង​ទាស់​ទៅ​សភា​ស៊ើបសួរ​សាលាឧទ្ធរណ៍ តែ​ត្រូវ​សភា​ស៊ើបសួរ​សាលាឧទ្ធរណ៍​បដិសេធ ដោយ​រក្សា​សេចក្ដីសម្រេច របស់​ចៅក្រម​ស៊ើបសួរ​សាលាដំបូង​រាជធានី​ភ្នំពេញ​ទុកជាបានការ​ដដែល​៕

ព័ត៌មានផ្សេងទៀត