​​អភិបាលរង​កំពង់ឆ្នាំង​៖​​​ដី​៤០​ហិច​តា​មិនឱ្យ​អន្តោ​ប្រវេសន៍​វៀតណាម​រស់នៅ​ស្របច្បាប់​ទេ​​

12-12-2019 3:15 pm 922

​ដី​ទំហំ​៤០​ហិច​តា​ដែល​អាជ្ញាធរ​ខេត្តកំពង់ឆ្នាំង បាន​ផ្ដល់ឱ្យ​សម្រាប់​អ្នកធ្វើការ​បំលាស់​ទី​ពី​រស់នៅ​លើទឹក​ក្នុង​ខេត្តកំពង់ឆ្នាំង ចំនួន​ជាង​៤​ពាន់​គ្រួសារ មក​រស់នៅ​លើដី​ទំហំ​៤០​ហិច​តា គឺជា​ដីឯកជន​របស់​ពលរដ្ឋ​ខ្មែរ​ម្នាក់ ឈ្មោះ រស់ ចំរើន ហើយ​ដី​នេះ​ទៀតសោធ គឺ​សម្រាប់​ចែកជូន​ប្រជាពលរដ្ឋ​ខ្មែរ និង​ប្រជាពលរដ្ឋ​ខ្មែរ​ឥស្លាម​។ ដោយឡែក​ជនអន្តោប្រវេសន៍​វៀតណាម ឬ​អន្តោប្រវេសន៍​ដទៃទៀត​វិញ គឺមាន​សិទ្ធិ​ជួល​លើដី​ទំហំ​៤០​ហិច​តា​នោះ ដោយ​គ្មាន​កម្មសិទ្ធិ​រស់នៅ​ស្របច្បាប់​ដូច​ប្រជាពលរដ្ឋ​ខ្មែរ​ឡើយ​។ នេះ​បើតាម​ការអះអាង​ពី​លោក ស៊ុន សុ​វណ្ណា​រិទ្ធិ អភិបាលរង​ខេត្ត​កំពង់ឆ្នាំង នៅក្នុង​ស​ន្និសិទ​សារព័ត៌មាន​ដែល​ធ្វើឡើង​នៅ​ទីស្តីការគណៈរដ្ឋមន្ត្រី នៅ​ព្រឹក​ថ្ងៃទី​១២ ខែ​ធ្នូ ឆ្នាំ​២០១៩​នេះ​។ ជា​បន្ត​សូម​ស្ដាប់​ប្រសាសន៍​លោក​អភិបាលរង​ខេត្ត​កំពង់ឆ្នាំង ដូចតទៅ​៖

សំឡេង​៖

​សូមបញ្ជាក់ថា ការអះអាង​របស់​អភិបាលរង​ខេត្តកំពង់ឆ្នាំង​បែបនេះ ស្របពេល​ដែល​សាធារណៈជន​មួយចំនួន​មាន​ចម្ងល់ និង​ចោទ​ជា​សំណួ​រថា ហេតុអ្វី​ទើប​រដ្ឋាភិបាល ផ្ដល់​ដី​ទំហំ​៤០​ហិច​តា ទៅឱ្យ​ជនអន្តោប្រវេសន៍​វៀតណាម​រស់នៅ​បែបនេះ​? សាធារណៈជន​ថែមទាំង​លើកឡើង​លើ​បណ្ដាញ​សង្គម​ថា ជនអន្តោប្រវេសន៍​វៀតណាម មានសំណាង​ជាង​ជនជាតិខ្មែរ​ដែលជា​ម្ចាស់​ប្រទេស​មួយចំនួន ត្រូវបាន​អាជ្ញាធរ​បណ្ដេញចេញ​ពី​ដី ហើយ​ថែមទាំង​បង្ក្រាប​ប្រសិនបើ​មាន​ការតវ៉ា​ទាមទារ​ដី​នោះ​មកវិញ​៕

ព័ត៌មានផ្សេងទៀត