លោក​ដូណាល់ ត្រាំ​៖​​លោក​គីម ជុង​អ៊ុន​​នឹង​បាត់បង់​​គ្រប់យ៉ាង​​បើ​បន្ដ​​ទង្វើ​អរិភាព​

09-12-2019 10:58 am 368

​ប្រធានាធិបតី​អាមេរិក​លោក​ដូណាល់ ត្រាំ​បាន​និយាយ​កាលពី​ថ្ងៃអាទិត្យ​ថា មេដឹកនាំ​កូរ៉េខាងជើង​លោក​គីម ជុង​អ៊ុន​ប្រឈម​នឹង​ការបាត់បង់​អ្វី​គ្រប់យ៉ាង បើ​នៅ​បន្ដសកម្មភាព​អរិភាព​ហើយ​កូរ៉េខាងជើង​ត្រូវតែ​រំលាយ​កម្មវិធី​នុយក្លេអ៊ែរ​។ លោក​ត្រាំ​លើកឡើង​ដូច្នេះ​តាមរយៈ​ប្រព័ន្ធ​ធ្វី​ត​ទ័​រ គឺ​បន្ទាប់ពី​កូរ៉េខាងជើង​បានប្រកាស​ជោគជ័យ​នៃ​ការ​ធ្វើតេស្ដ​ដ៏​សំខាន់​មួយ​នៅ​មជ្ឈមណ្ឌល​បាញ់​ផ្កាយរណប​សូ​ហេ​។​

​ប្រព័ន្ធ​ផ្សព្វផ្សាយ​រដ្ឋ​កូរ៉េខាងជើង​KCNA​បាន​ចុះផ្សាយ​កាលពី​ព្រឹក​ថ្ងៃអាទិត្យ​ថា កូរ៉េខាងជើង​បាន​ធ្វើតេស្ដ​យ៉ាង​ជោគជ័យ​បំផុត​នៅ​មជ្ឈមណ្ឌល​សូ​ហេ ប៉ុន្ដែ​មិន​បានបញ្ជាក់​ជាការ​ធ្វើតេស្ដ​អ្វី​ឡើយ​។ អ្នកជំនាញ​ផ្នែក​មី​ស៊ី​ល​បាន​និយាយថា​កូរ៉េខាងជើង​ទំនងជា​ធ្វើតេស្ដ​ម៉ាស៊ីន​បាញ់​រ៉ុក​ក្កែ​ត មិនមែនជា​ការបាញ់​មី​ស៊ី​ល​ទេ​។ នៅ​ទីតាំង​នោះ​មន្ដ្រី​អាមេរិក​ធ្លាប់​និយាយថា​កូរ៉េខាងជើង​សន្យា​នឹង​បិទ​ចោល​។ បន្ទាប់ពី​កិច្ចព្រមព្រៀង​លើកដំបូង​ត្រូវបាន​ចុះហត្ថលេខា​នៅ​សិង្ហ​បុរី​ក្នុង​ឆ្នាំ​២០១៨ កូរ៉េខាងជើង​បាន​រុះរើ​មជ្ឈមណ្ឌល​សូ​ហេ ប៉ុន្ដែ​ក្រោយ​កិច្ចចរចា​លើក​ទី​ពីរ​បរាជ័យ​កាលពីដើមឆ្នាំ​២០១៩​នៅ​វៀតណាម ប្រព័ន្ធ​ផ្កាយរណប​អាមេរិក​ចាប់បាន​រូបភាព​មជ្ឈមណ្ឌល​សូ​ហេ​ត្រូវបាន​ជួសជុល​ឡើងវិញ​។​

​តាមរយៈ​ប្រព័ន្ធ​ធ្វី​ត​ទ័​រលោក​ត្រាំ​សង្កត់ធ្ងន់ថា កូរ៉េខាងជើង​ស្ថិតក្រោម​ការដឹកនាំ​រប​ស់លោក​គីម ជុង​អ៊ុន អាច​នឹង​ក្លាយជា​ប្រទេស​មាន​សេដ្ឋកិច្ច​អស្ចារ្យ តែ​កូរ៉េខាងជើង​ត្រូវ​រំលាយ​នុយក្លេអ៊ែរ​តាម​សន្យា​។ លោក​គីម​ជា​មនុស្ស​ឆ្លាត​ណាស់ តែ​លោក​ក៏​អាច​បាត់បង់​គ្រប់យ៉ាង​បើ​នៅ​បន្ដ​ទង្វើ​អរិភាព​។ លោក​គីម​ក៏​ធ្លាប់​បញ្ជាក់​មិន​ចង់ឲ្យ​ទំនាក់ទំនង​ជាមួយ​ប្រធានាធិបតីអាមេ​រិក​ក្លាយជា​រឿង​អាសាបង់​ទេ ហើយក៏​មិន​ចង់​ជ្រៀតជ្រែក​ការបោះឆ្នោត​ប្រធានាធិបតី​អាមេរិក​នៅ​ខែវិច្ឆិកា​ដែរ​។​

​ភាព​តានតឹង​រវាង​អាមេរិក​ជាមួយ​កូរ៉េខាងជើង​បាន​កើនឡើង​កាន់តែខ្លាំង​ក្នុងពេល​ថ្មីៗ គឺ​មុន​កូរ៉េខាងជើង​កំណត់​សុពលភាព​នៃ​ការស្នើឲ្យ​អាមេរិក​ផ្លាស់ប្ដូរ​គោលនយោបាយ និង​ស្នើឲ្យ​ដកចេញ​ខ្លះ​នូវ​ទណ្ឌកម្មសេដ្ឋកិច្ច​។ ដាច់​ឆ្នាំ​២០១៩​នេះ​កូរ៉េខាងជើង​នឹង​ឈប់​ចង់បាន​សម្បទាន​ពី​អាមេរិក​ទៀតហើយ កូរ៉េខាងជើង​ប្រកាស​នឹង​ប្រើ​យុទ្ធសាស្ដ្រ​ថ្មី​។ អ្នកវិភាគ​ខ្លះ​មើលឃើញថា​កូរ៉េខាងជើង​កំពុង​ធ្វើតាម​ផែនការ​ថ្មី​ដែល​គេ​បាន​និយាយ​រួចទៅហើយ ជាក់ស្ដែង​មានការ​ធ្វើតេស្ដ​ដ៏​សំខាន់​មួយ​នៅ​មជ្ឈមណ្ឌល​សូ​ហេ​នេះឯង​។​

​កាលពី​ថ្ងៃ​សៅរ៍​មន្ដ្រី​ទូត​កូរ៉េខាងជើង​ប្រចាំ​អង្គការសហប្រជាជាតិ​លោក​គីម សុង បាន​និយាយ​ក្នុង​សេចក្ដីថ្លែងការណ៍​ថា កូរ៉េខាងជើង​នឹង​លែង​ត្រូវការ​ពេលវេលា​ចរចា​ដ៏​យូរអង្វែង​ជាមួយ​អាមេរិក​ទៀតហើយ​។ បញ្ហា​រំលាយ​នុយក្លេអ៊ែរ​ពេលនេះ​បាន​ដក​ចេញពី​តុ​ចរចា ព្រោះ​វា​ជា​រឿង​លែង​ចាំបាច់​។ វា​ក៏​សបញ្ជាក់​ពី​ការ​បោះជំហាន​ឈានទៅរក​ផ្លូវ​ដើរ​ថ្មី ក្រោយ​កិច្ចចរចា​នុយក្លេអ៊ែរ​បាន​ជាប់គាំង​អស់​ជាច្រើន​ខែ​៕

ព័ត៌មានផ្សេងទៀត