​កម្ពុជា​ប្រឈម​ខ្វះ​រោងចក្រ​​សម្លាប់​មេរោគ​លើ​ផ្លែស្វាយ​​ដើម្បី​នាំចេញ​ទៅ​ទីផ្សារ​អន្តរជាតិ​​

05-12-2019 3:41 pm 196

​បើទោះបីជា​កម្ពុជា​មាន​ទី​ផ្សារ​សម្រាប់​នាំចេញ​ផ្លែស្វាយ ទៅ​លក់​នៅ​ទីផ្សារ​អន្តរជាតិ​យ៉ាងណាក៏ដោយ ក៏​កម្ពុជា​កំពុង​ប្រឈម​ខ្វះ​រោងចក្រ​វិច​ខ្ចប់ និង​កំចាត់​មេរោគ​លើ​ផ្លែស្វាយ សម្រាប់ធ្វើ​ការនាំចេញ​ទៅ​កាន់​ទីផ្សារ​អន្តរជាតិ ជាពិសេស​គឺ​ការនាំចេញ​ទៅកាន់​ប្រទេស​ចិន ហើយ​បាន​អំពាវនាវ​ដល់​វិស័យ​ឯកជន​នានា ក៏ដូចជា​ដៃគូ​អភិវឌ្ឍន៍ ចូលរួម​វិនិយោគ​ទៅលើ​ហេដ្ឋារចនាសម្ព័ន្ធ​ក្នុង​ការកែឆ្នៃ ក៏ដូចជា​ការ​វិច​ខ្ចប់ និង​រោងចក្រ​សម្លាប់​មេរោគ​លើ​ផ្លែស្វាយ​។

​លោក ងិន ឆាយ ប្រតិភូ​រាជរដ្ឋាភិបាល​ទទួលបន្ទុក​ជា​អគ្គនាយក​នៃ​អគ្គនាយកដ្ឋាន​កសិកម្ម បាន​អំពាវនាវ​ដល់​វិស័យ​ឯកជន​នានា ក៏ដូចជា​ដៃគូ​អភិវឌ្ឍន៍ ចូលរួម​វិនិយោគ​ទៅលើ​ហេដ្ឋារចនាសម្ព័ន្ធ​ក្នុង​ការកែឆ្នៃ វិច​ខ្ចប់ និង​រោងចក្រ​សម្លាប់​មេរោគ​លើ​ផ្លែស្វាយ ដើម្បី​អាច​នាំចេញ​ទៅកាន់​ទីផ្សារ​អន្តរជាតិ ពិសេស​នាំចេញ​ទៅកាន់​ទីផ្សារ​ប្រទេស​ចិន​។ លោក​បាន​បញ្ជាក់ថា បច្ចុប្បន្ន​កម្ពុជា កំពុង​ប្រឈម​គ្មាន​រោងចក្រ​សម្លាប់​មេរោគ វិច​ខ្ចប់ និង​កែឆ្នៃ​ផ្លែស្វាយ សម្រាប់​នាំចេញ ហើយ​បើ​កម្ពុជា​មាន​រោងចក្រ​សម្លាប់​មេរោគ វិច​ខ្ចប់ និង​កែឆ្នៃ​ផ្លែស្វាយ នោះ​កម្ពុជា​អាច​នាំចេញ​ផ្លែស្វាយ ទៅកាន់​ទីផ្សារ​អន្តរជាតិ យ៉ាងតិច​៥០​ទៅ​៦០​ម៉ឺន​តោន ក្នុង​ឆ្នាំ​២០២៣ ខាងមុខ ……….

​សំឡេង​៖

​ការអំពាវនាវ​របស់​ប្រតិភូ​រាជរដ្ឋាភិបាល​ទទួលបន្ទុក​ជា​អគ្គនាយក​នៃ​អគ្គនាយកដ្ឋាន​កសិកម្ម​រូបនេះ បាន​ធ្វើឡើង ក្នុង​ស​ន្និសិទ​សារព័ត៌មាន​ស្ដីពី​ប្រភេទ​ពូជ​ស្វាយ និង​ទីផ្សារ​អន្តរជាតិ ដែល​រៀបចំ​ដោយ​អង្គភាព​អ្នកនាំពាក្យ​រាជរដ្ឋាភិបាល នៅ​ព្រឹក​ថ្ងៃទី​៥ ខែ​ធ្នូ ឆ្នាំ​២០១៩​។ លោក ងិន ឆាយ បាន​អះអាងថា បច្ចុប្បន្ន​យើង​មាន​រោងចក្រ​កែឆ្នៃ វិច​ខ្ចប់ និង​សម្អាត​មេរោគ​លើ​ផ្លែស្វាយ​តែ​មួយកន្លែង​ប៉ុណ្ណោះ របស់​ក្រុមហ៊ុន ហ៊ីយ៉ាន់ដាយ (Hyundai) ហើយ​រោងចក្រ​ក្រុមហ៊ុន​នេះ​ទៀតសោធ ក៏​មិនអាច​កែឆ្នៃ វិច​ខ្ចប់ និង​សម្អាត​មេរោគ​លើ​ផ្លែស្វាយ បាន​គ្រប់គ្រាន់​នោះដែរ​។ ដូច្នេះហើយ​ទើប​លោក ធ្វើ​ការអំពាវនាវ​ឱ្យមាន​វិស័យ​ឯកជន​នានា ចូលរួម​វិនិយោគ​លើ​ការកែឆ្នៃ វិច​ខ្ចប់ និង​សម្អាត​មេរោគ​លើ​ផ្លែស្វាយ ដើម្បី​នាំចេញ​។​

​លោក ងិន ឆាយ បាន​គូសបញ្ជាក់ថា ផ្លែស្វាយ​នៅ​កម្ពុជា មាន​៤០​ប្រភេទ បើតាម​ការស្រាវជ្រាវរ​បស់​នាយកដ្ឋាន​កសិកម្ម ជាមួយ​អង្គការ​អន្តរជាតិ​មួយ ហើយ​ត្រូវបាន​កត់ត្រា​ទុក​ប្រភេទ​ផ្លែស្វាយ តែ​៣៦​ទៅ​៣៧​ប្រភេទ​តែប៉ុណ្ណោះ​។ លោក​បាន​គូសបញ្ជាក់​ទៀតថា ផ្លែង​ស្វាយ​ដែល​កម្ពុជា​នាំចេញ​ទៅកាន់​ទីផ្សារ​អន្តរជាតិ ដូចជា​ប្រទេស​វៀត​ណា ថៃ នា​ពេលបច្ចុប្បន្ន គឺ​ប្រភេទ​ផ្លែស្វាយ​កែវ​រមៀត ជា​ប្រភេទ​ផ្លែស្វាយ​កំពុង​ពេញនិយម​។ ដោយឡែក​នាំ​ចេញទៅ​ប្រទេស​ចិន​វិញ គឺ​ចិន​តម្រូវឱ្យ​កម្ពុជា មាន​រោងចក្រ​កែឆ្នៃ​វិច​ខ្ចប់ និង​សម្អាត​មេរោគ​លើ​ផ្លែស្វាយ ទើប​អនុញ្ញាតឱ្យ​នាំចូល​ទៅ​ប្រទេស​ចិន​។ ចំណែក​ប្រទេស​កូរ៉េ វិញ កម្ពុជា​ត្រូវបាន​អនុញ្ញាតឱ្យ​ធ្វើការ​នាំចេញ​ផ្លែស្វាយ​នៅ​ចុង​ខែធ្នូ​ឬ​ដើម​ខែមករា ឆ្នាំ​២០២០ ហើយ​ក្រសួងកសិកម្ម កំពុង​ច​ចារ​ជាមួយ​ប្រទេស​ជប៉ុន និង​សហរដ្ឋអាមេរិក ដើម្បី​អាច​នាំ​ផ្លែស្វាយ​កម្ពុជា ទៅ​លក់​នៃ​ប្រទេស​ទាំងនេះ​ផងដែរ​៕ 

ព័ត៌មានផ្សេងទៀត