ក្រុម​រដ្ឋ​អ៊ីស្លាម​ថា​​​ការចាក់​សម្លាប់​មនុស្ស​​​ក្នុង​ទីក្រុង​ឡុង​ដ៍​ជា​ទង្វើ​សមាជិក​របស់គេ​

01-12-2019 11:15 am 128
ប៉ូលិសចុះពិនិត្យ​កន្លែងកើតហេតុ

ក្រុម​រដ្ឋ​អ៊ីស្លាម​បាន​និយាយថា​ហេតុការណ៍​វាយប្រហារ​សម្លាប់​មនុស្ស កើតឡើង​កាលពី​ថ្ងៃ​សុក្រ​នៅលើ​ស្ពាន​ក្នុង​ទីក្រុង​ឡុង​ដ៍​ប្រទេស​អង់គ្លេស សមាជិក​របស់​ពួកគេ​ម្នាក់​ជា​អ្នកធ្វើ​សកម្មភាព​។ ក្រុម​រដ្ឋ​អ៊ីស្លាម​បាន​ចេញមុខ​អះអាង​ដូច្នេះ តាមរយៈ​ការចុះផ្សាយ​នៅលើ​ទីភ្នាក់ងារសារព័ត៌មាន​Amaq ប៉ុន្ដែ​ពួកគេ​មិនបាន​ផ្ដល់ព័ត៌មាន​លម្អិត​ឡើយ​។ ក្រុម​រដ្ឋ​អ៊ីស្លាម​បន្ថែមថា​ការវាយប្រហារ​នេះ ជា​ការឆ្លើយតប​នឹង​ការអំពាវនាវ​ឲ្យធ្វើ​សកម្មភាព​ក្នុងប្រទេស​គោលដៅ ដែល​ធ្លាប់​ចូលរួម​បង្ក្រាប​ពួកគេ​កន្លងមក​។ 

​សូមបញ្ជាក់ថា បុរស​ម្នាក់​ប្រដាប់​ដោយ​កាំបិទ​នៅក្នុង​ដៃ បាន​ចាក់​សម្លាប់​មនុស្ស​២​នាក់​និង​៣​នាក់​ផ្សេងទៀត​រងរបួស​។ ជនបង្ក​ត្រូវបាន​ប៉ូលិស​បាញ់សម្លាប់​ភ្លាមៗ និង​ប្រកាសថា​ហេតុការណ៍​នេះ​ជា​ការវាយប្រហារ​ភេរវកម្ម​។ ប៉ូលិស​បានកំណត់​អត្តសញ្ញាណ​ជនបង្ក​ឈ្មោះ​Usman Khan អាយុ​២៨​ឆ្នាំ ធ្លាប់​ត្រូវបាន​ផ្តន្ទាទោស​ពីបទ​ប្រព្រឹត្ដ​អំពើ​ភេរវកម្ម​នៅក្នុង​ឆ្នាំ​២០១២ ហើយ​ត្រូវបាន​ដោះលែង​ចេញពី​ពន្ធនាគា​នៅក្នុង​ខែធ្នូ​ឆ្នាំ​២០១៨ ប៉ុន្តែ​ស្ថិតនៅក្រោម​ការតាមដាន​របស់​ប៉ូលិស​៕

ព័ត៌មានផ្សេងទៀត