​NGO​ថា​អាជ្ញាធរ​មួយចំនួន​​នៅតែ​រារាំង​ពួកគេ​ពេល​ចុះ​ធ្វើ​សកម្មភាព​តាម​សហគមន៍​​

25-10-2019 4:11 pm 127

​អង្គការ​សង្គម​ស៊ីវិល​បាន​អះអាងថា អាជ្ញាធរ​មូលដ្ឋាន​មួយចំនួន នៅតែមាន​ការរារាំង​នៅពេលដែល​ពួកគេ​ចុះ​ធ្វើ​សកម្មភាព​នៅ​សហគមន៍​មូលដ្ឋាន ជួប​ជាមួយ​ប្រជាពលរដ្ឋ ក៏ប៉ុន្តែ​ក៏មាន​អាជ្ញាធរ​មូលដ្ឋាន​មួយចំនួន បាន​សហការ​ជាមួយ​ពួកគេ ពេល​ចុះ​ធ្វើ​សកម្មភាព​ម្ដងៗ​ផងដែរ​។

​អាជ្ញាធរ​មូលដ្ឋាន​មួយចំនួន​នៅតែ​មិន​សហការ​ជាមួយ​អង្គការ​សង្គម​ស៊ីវិល ដែល​ចុះទៅ​មូលដ្ឋាន​សហគមន៍​ជួប​ជាមួយ​ប្រជាពលរដ្ឋ ដើម្បី​សម្របសម្រួល ឬ​ដោះស្រាយ​បញ្ហា​ប្រឈម​ផ្សេងៗ ដែល​ប្រជាពលរដ្ឋ​ជួប​ការលំបាក​។ នេះ​បើតាម​លោក តឹក វណ្ណា​រ៉ា នាយក​ប្រតិបត្តិ​វេទិកា​នៃ​អង្គការ​មិន​មែនរដ្ឋាភិបាល​ស្ដីពី​កម្ពុជា (NGOF) ដែល​បាន​បញ្ជាក់ប្រាប់​អ្នកសារព័ត៌មាន​នៅក្នុង​ស​ន្និសិទ​ថ្នាក់ជាតិ​លើក​ទី​១២ ស្ដីពី អភិបាលកិច្ច​ដីធ្លី និង​ធនធានធម្មជាតិ​។​

​លោក តឹម វណ្ណា​រ៉ា ក៏​បានបញ្ជាក់​អំពី​មូលហេតុ​ដែល​អាជ្ញាធរ​មូលដ្ឋាន​មួយចំនួន មិន​សហការ​ជាមួយ​អង្គការ​សង្គម​ស៊ីវិល ដោយសារតែ​ខ្វះ​ការទំនាក់ទំនង និង​ខ្វះ​ការយល់​គ្នា​ទៅវិញទៅមក អំពី​គោល​បំ ណង​របស់​អង្គការ​សង្គម​ស៊ីវិល ដែល​ចុះទៅ​សហគមន៍​មូលដ្ឋាន​ប្រជាពលរដ្ឋ​។ ក៏ប៉ុន្តែ​លោក​ក៏បាន​អះ អាង​ថា អាជ្ញាធរ​មូលដ្ឋាន​មួយចំនួន​ក៏បាន​សហការ​យ៉ាង​ល្អ​ជាមួយ​អង្គការ​សង្គម​ស៊ីវិល​ផងដែរ​………

​សំឡេង​៖

​នាយក​ប្រតិបត្តិ​វេទិកា​នៃ​អង្គការ​មិន​មែនរដ្ឋាភិបាល​ស្ដីពី​កម្ពុជា​រូបនេះ ក៏​បានឱ្យដឹង​ផងដែរ​ថា កន្លងមក​ចំពោះ​បញ្ហា​ដែល​អាជ្ញាធរ​មិន​សហការ​ជាមួយនេះ អង្គការ​សង្គម​ស៊ីវិល ក៏​បានលើកឡើង​ក្នុង​វេទិការ​អង្គការ​សង្គម​ស៊ីវិល​និង​រាជរដ្ឋាភិបាល ដែល​រៀបចំ​ដោយ​ក្រសួងមហាផ្ទៃ ក្រោយមក​ក៏មាន​ជជែក​គ្នា និង​មាន​សំណើរ​ពី​អង្គការ​សង្គម​ស៊ីវិល ទើប​ក្រសួងមហាផ្ទៃ ក៏​សម្រេច​បង្កើត​គណៈកម្មកា​រ​សម្របសម្រួល​មួយ ធ្វើ​ការដោះស្រាយ​ភ្លាមៗ នៅពេលដែល​មាន​ករណី​នេះ​កើតឡើង​។​

​សូមបញ្ជាក់ថា កន្លងមក​អង្គការ​សង្គម​ស៊ីវិល​មួយចំនួន​តែង​ត្អូញត្អែរថា អាជ្ញាធរ​មូលដ្ឋាន​មិន​សហការ​ជាមួយ​ពួកគេ នៅពេលដែល​ពួកគេ​ចុះទៅ​សហគមន៍​មូលដ្ឋាន​ជួប​ជាមួយ​ប្រជាពលរដ្ឋ​។ អង្គការ​សង្គម​ស៊ីវិល​អះអាងថា អាជ្ញាធរ​ខ្លះ​បានមក​រារាំង​សកម្មភាព​របស់​ពួកគេ បើទោះបីជា​ពួកគេ​បញ្ជាក់​អំពី​សកម្មភាព ដែល​ចុះទៅ​ក៏ដោយ​៕

ព័ត៌មានផ្សេងទៀត