កម្ពុជា​ស្នើ​ជប៉ុន​ពន្លឿន​សំណើ​របស់​ខ្លួន​លើ​ការនាំចេញ​ផ្លែស្វាយ​ទៅ​ទីផ្សារ​ជប៉ុន​

07-10-2019 7:17 pm 94
  ស្តាប់
ស្តាប់ជាសំឡេង

​ក្នុង​ជំនួប​ពិភាក្សា​ការងារ​ជាមួយ​លោក Kanji KATO អនុរដ្ឋមន្ត្រី​ក្រសួងកសិកម្ម រុក្ខា​ប្រមាញ់ និង​នេសាទ​ជប៉ុន នៅ​រសៀល​ថ្ងៃ​ទី​៧ តុលា លោក​រដ្ឋមន្ត្រី​វេង សាខុន បាន​ស្នើ​ភាគី​ជប៉ុន​ពន្លឿន​លើ​សំណើ​របស់​កម្ពុជា ក្នុង​ការនាំចេញ​ផលិតផល​ស្វាយ និង​ផលិតផល​ផ្លែឈើ​ដទៃទៀត ទៅ​កាន់​ទីផ្សារ​ជប៉ុន ...

​រដ្ឋមន្ត្រី​ក្រសួង​កសិកម្ម​កម្ពុជា​បាន​ថ្លែងថា ថ្មីៗ​នេះ អង្គការ​JICA​របស់​ជប៉ុន បាន​ជួយ​បង្កើត​មជ្ឈមណ្ឌល​ពិសោធន៍​សារធាតុ​គីមី​និង​វេច​ខ្ចប់​បន្លែ​សុវត្ថិភាព វ៉ាក់សាំង​ការពារ​ជំងឺ​អុតក្តាម​និង​ការងារ​ពង្រីក​សហគម​ន៍​កសិកម្ម ជាងនេះទៅទៀត ជប៉ុន​បាន​អនុញ្ញាត​ឱ្យ​កម្ពុជា​នាំ​ចេញ​ចេកអំបូង​លឿង​ស្រស់​របស់​កម្ពុជា​ទៅ​កាន់​ទីផ្សារ​ជប៉ុន​ផងដែរ ។​

​លោក វេង សាខុន បន្តថា ចំពោះ​ផលិតផល​ស្វាយ ក​ម្ពជា​បាន​កំពុង​ខិតខំ​ជំរុញ​ការងារ​បច្ចេកទេស គុណភាព សុវត្ថិភាព និង​ស្តង់ដារ ធ្វើយ៉ាងណា​ឱ្យ​ផលិតផល​ស្វាយ​កម្ពុជា អាច​នាំ​ចេញ​ទៅ​កាន់​ទីផ្សា​រ​អន្តរជាតិ ពិសេស​ទីផ្សារ​ធំៗ​បី គឺ​ចិន កូរ៉េ និង​ជប៉ុន​នៅពេល​អនាគត ។​

​លោក​រដ្ឋមន្ត្រី​បាន​ស្នើ​ឱ្យ​ភាគី​ជប៉ុន ជួយ​ពិនិត្យ​ពិចារណា ពន្លឿន​សំណើ​របស់​ភាគី​កម្ពុជា លើ​ការនាំចេញ​ផលិតផល​ស្វាយ​ស្រស់ និង​ផ្លែឈើ​ផ្សេងៗ​ទៀត​ទៅ​កាន់​ទីផ្សារ​ជប៉ុន ។​

​លោក​អនុរដ្ឋមន្ត្រី Kanji KATO បាន​ប្រាប់ថា ករណី​ផលិតផល​ស្វាយ ជប៉ុន​បាន​កំពុង​ពិនិត្យ​ពិចារណា ហើយ​នឹង​ឆ្លើយ​តប​មក​កម្ពុជា​វិញ​នៅ​ចុងឆ្នាំ​នេះ ដោយឡែក ផលិតផល​ផ្លែឈើ​ផ្សេងៗ​ទៀត ភាគី​ជប៉ុន​នឹង​ពិចារណា​តាម​សំណើសុំ​របស់​កម្ពុជា ៕

ព័ត៌មានផ្សេងទៀត