នាយករដ្ឋមន្ដ្រី​អង់គ្លេស​​ព្រមាន​នឹង​​ចាកចេញ​ពី​អឺរ៉ុប​​ដោយ​គ្មាន​កិច្ចព្រមព្រៀង​

03-10-2019 5:22 pm 144
  ស្តាប់
ស្តាប់ជាសំឡេង

​នាយករដ្ឋមន្ដ្រី​អង់គ្លេស​លោក​បូរី​ស ច​ន​សុន​កាលពី​ថ្ងៃទី​០២​តុលា បានបង្ហាញ​ពី​ផែនការ​ចុងក្រោយ​របស់លោក​ទាក់ទង​នឹង​ការដឹក​ដៃ​អង់គ្លេស​ចេញពី​អឺរ៉ុប​។ លោក​បានប្រកាស​ព្រមាន​ដល់​មេដឹកនាំ​អឺរ៉ុប​ថា អង់គ្លេស​នឹង​ដើរចេញ​ដោយ​គ្មាន​កិច្ចព្រមព្រៀង​តាម​កាលកំណត់​នៅ​ថ្ងៃទី​៣១​តុលា ប្រសិនបើ​ពួកគេ​មិន​ទទួលយក​សំណើ​ដែល​បាន​ដាក់ជូន​ទេ​។ ការប្រកាស​របស់លោក​នាយករដ្ឋមន្ដ្រី​ដូច្នេះ បានធ្វើឲ្យ​មេដឹកនាំ​អឺរ៉ុបនិង​បក្សប្រឆាំង​អង់គ្លេស​ព្រួយបារម្ភ​ជាខ្លាំង​។ ព្រួយបារម្ភ​ពាក់ព័ន្ធ​នឹង​ភាពចលាចល​សេដ្ឋកិច្ច ប្រសិនបើ​អង់គ្លេស​សម្រេច​បញ្ចប់​ភាពជា​សមាជិក​អឺរ៉ុប​៤៦​ឆ្នាំ​របស់ខ្លួន​ត្រឹម​ពេលនេះ ដោយ​គ្មាន​កិច្ចព្រមព្រៀង​ត្រឹមត្រូវ​។​

​លោក​ច​ន​សុន​ធ្លាប់​ព្រមាន​ថា នោះ​គឺជា​ការផ្ដល់ឲ្យ​ចុងក្រោយ​របស់លោក​ហើយ ប៉ុន្ដែ​សេចក្ដីសម្រេច​ថ្មី​ពុំ​ទទួលបាន​ការឆ្លើយតប​ល្អប្រសើរ​ទេ​។ សមាជិកសភា​សហភាព​អឺរ៉ុប​បាន​និយាយថា សភា​អឺរ៉ុប​ដំបូង​ឡើយ​បញ្ចេញ​ប្រតិកម្ម​ថា វា​មិនមែនជា​ផែនការ​វិជ្ជមាន​ទាំងស្រុង​ឡើយ​។ មានន័យថា​ទោះបីជា​ចំណុច​ខ្លះ​អាច​ទទួលយកបាន ប៉ុន្ដែ​នៅមាន​ចំណុច​មួយចំនួន​គ្រោះថ្នាក់​ដដែល​។ 

​យ៉ាងណាមិញ​លោក​នាយករដ្ឋមន្ដ្រី​នៅតែ​អះអាងថា រដ្ឋាភិបាល​របស់លោក​មាន​ពេល​ដល់​ថ្ងៃទី​១១​តុលា ដើម្បី​ដាក់ចេញ​នូវ​គោលការណ៍​សម្របសម្រួល​។ ដូច្នេះ​លោក​អាច​បញ្ចូល​គោលការណ៍​ទៅក្នុង​របៀបវារៈ សម្រាប់​កិច្ចប្រជុំ​មេដឹកនាំ​អឺរ៉ុប​ក្នុង​ទីក្រុង​ព្រុច​សែល​នៅ​ថ្ងៃទី​១៧-១៨​តុលា​បាន​។ លោក​សង្កត់ធ្ងន់​នៅក្នុង​កិច្ចប្រជុំ​គណបក្ស​អភិរក្ស​របស់លោក​ថា ចូរ​កុំ​មាន​ការសង្ស័យ​ទៀត អ្វីដែល​ជា​ជម្រើស​គឺថា ជា​ជម្រើស​មិនមាន​កិច្ចព្រមព្រៀង​ទេ​។ វា​មិនមែនជា​លទ្ធផល​ដែល​ខំ​ស្វែងរក​ទាល់តែសោះ ប៉ុន្ដែ​វា​គឺជា​លទ្ធផល​ដែលមាន​ការត្រៀមខ្លួន​រួចជាស្រេច​។​

​សូមបញ្ជាក់ថា ផែនការ​ថ្មី​របស់លោក​ច​ន​សុន​រួមបញ្ចូល​បទប្បញ្ញត្ដិ​ជា​មូលដ្ឋាន​មួយចំនួន ក្នុងនោះ​មាន​ការកំណត់​ពេលវេលា​ដែលមាន​សក្ដានុពល​រយៈ​ពេល​៤​ឆ្នាំ ដែល​មេដឹកនាំ​សហភាព​អឺរ៉ុប​បាន​ច្រានចោល​យ៉ាង​ដាច់អហង្ការ​កន្លងមក​។ ចំពោះ​ផែនការ​ចាកចេញ​ពី​អឺរ៉ុប​របស់​អង់គ្លេស​នេះ បាន​ជាប់គាំង​តាំងពី​ក្រោយ​បោះឆ្នោត​ប្រជាមតិ​ឆ្នាំ​២០១៦​មកម្ល៉េះ​៕

ព័ត៌មានផ្សេងទៀត