ក្រសួង​អប់រំ​៖ លទ្ធផល​បាក់​ឌុប​មិន​ប្រែប្រួល បិទ​ការតវ៉ា​

26-09-2019 7:31 pm 375
  ស្តាប់
ស្តាប់ជាសំឡេង

​ក្រសួង​អប់រំ យុវជន និង​កីឡា នៅ​ថ្ងៃនេះ​បាន​ប្រកាស​បិទ​បញ្ចប់​ការតវ៉ា​ចំពោះ​លទ្ធផល​នៃ​ការប្រឡង​សញ្ញាបត្រ​មធ្យមសិក្សា​ទុតិយភូមិ និង​បាន​សង្កត់ធ្ងន់ថា លទ្ធផល​នៃ​ការប្រឡង គឺ​មិន​មាន​ការប្រែប្រួល​ទេ...

​ក្រសួង​អប់រំ យុវជន និង​កីឡា នៅ​ថ្ងៃនេះ​បាន​ប្រកាសថា ក្រោយ​បញ្ចប់​ការ​ធ្វើ​កោសល្យវិច័យ គណៈកម្មការ​ពិនិត្យ និង​ដោះស្រាយ​ការតវ៉ា​របស់​បេក្ខជន បាន​រកឃើញថា លទ្ធផល​នៃ​ការប្រឡង​សញ្ញាបត្រ​មធ្យមសិក្សា​ទុតិយភូមិ សម័យ​ប្រឡង ១៩ សីហា ២០១៩ មិន​មាន​ការប្រែប្រួល​ទេ ។​

​សេចក្តីប្រកាស​ព័ត៌មាន​របស់​ក្រសួង​អប់រំ ចុះ​ថ្ងៃ​ទី​២៦​បានបញ្ជាក់​ថា លទ្ធផល​ប្រឡង​ដែល​បាន​ប្រកាស​នៅ​ថ្ងៃ​ទី​០៩ និង​ថ្ងៃ​ទី​១០ ខែ​កញ្ញា គឺជា​លទ្ធផល​ដែល​ឆ្លើយតប​ទៅនឹង​គោលការណ៍​ទាំង​បួន​នៃ​ការប្រឡង គឺ​គោលការណ៍​ច្បាប់ យុត្តិធម៌ តម្លាភាព និង​លទ្ធផល​ទទួលយកបាន ។ ឈរ​លើ​មូលដ្ឋាន​នេះ គណៈកម្មការ​សូម​ប្រកាស​បញ្ចប់​ការទទួល​ពាក្យ​តវ៉ា​របស់​បេក្ខជន និង​បញ្ចប់​ដំណើរការ​ពិនិត្យ និង​ដោះស្រាយ​ការតវ៉ា ចាប់ពី​ថ្ងៃ​ចេញ​សេចក្តីប្រកាស​ព័ត៌មាន​នេះ​តទៅ ។​

​គូសបញ្ជាក់ថា មួយ​ថ្ងៃ​បន្ទាប់​ពី​ការប្រកាស​លទ្ធផល​ជា​សាធារណៈ គឺ​នៅ​ថ្ងៃទី​១១ កញ្ញា បេក្ខជន​មួយ​ចំនួន​តូច ដែល​ពុំ​ពេញចិត្ត​នឹង​លទ្ធផល​នៃ​ការប្រឡង​សញ្ញាបត្រ​មធ្យមសិក្សា​ទុតិយភូមិ​បាន​ដាក់ពាក្យ​តវ៉ា​មក​ក្រសួង​អប់រំ យុវជន និង​កីឡា ដើម្បី​ស្នើ​ឱ្យ​មាន​ការពិនិត្យ​ឡើងវិញ​លើ​លទ្ធផល​នៃ​ការប្រឡង​របស់ខ្លួន ។ រហូត​ដល់​ថ្ងៃ​ទី​២០ កញ្ញា ក្រសួង​ទទួល​បាន​ពាក្យ​តវ៉ា​ពី​បេក្ខជន​មួយចំនួន ក្នុងនោះ មាន​ទាំង​បេក្ខជន​ប្រឡង​ជាប់ តែ​មិន​ពេញចិត្ត​នឹង​និទ្ទេស​ដែល​ខ្លួន​ទទួលបាន និង​មាន​បណ្តឹងតវ៉ា​ពី​បេក្ខជន​ដែល​ប្រឡង​ធ្លាក់ ។​

​ការប្រឡង​សញ្ញាបត្រ​មធ្យមសិក្សា​ទុតិយភូមិ​នៅ​ឆ្នាំ​នេះ ត្រូវបាន​ធ្វើឡើង​នៅ​កាល​ថ្ងៃទី​១៩ សីហា ដោយ​មាន​បេក្ខជន​ចុះ​ឈ្មោះ​ប្រឡង​សរុប​ចំនួន ១១៧.០៤៣​នាក់ ស្រី ៦០.៤២៧​នាក់ និង​មាន​មណ្ឌល​ប្រឡង​ចំនួន ២០២​មណ្ឌល ។​

​លទ្ធផល​នៃ​ការប្រឡង​ត្រូវបាន​បង្ហាញ​ឱ្យដឹងថា មាន​បេក្ខជន​ប្រឡង​ជាប់​ស្ថាពរ​ចំនួន ៧៩.០៥២​នាក់ ត្រូវជា​៦៨,៦២% ក្នុងនោះ បេក្ខជន​ទទួលបាន​និទ្ទេស​A​ចំនួន​៤៤៣​នាក់ និទ្ទេស​B​ចំនួន​២.៤៣០​នាក់ និទ្ទេស​C​ចំនួន​៥.៨៤៧​នាក់ និទ្ទេស​D​ចំនួន​១៤.១០០​នាក់ និង​និទ្ទេស​E​ចំនួន ៥៦.២៣២​នាក់ ៕

ព័ត៌មានផ្សេងទៀត