បុរស​ខ្លាំង​​អាមេរិក​​និង​កូរ៉េខាងជើង​​នៅ​តែ​ចង់បង្ហាញ​ថា​​កិច្ចចរចា​​ពិត​ជា​សំខាន់​

17-09-2019 1:35 pm 419
លោកគីម ជុងអ៊ុន(ឆ្វេង)​និងលោកដូណាល់ ត្រាំពេលជួបគ្នា​កន្លងមក

​តាំង​ពី​ចូលកាន់​តំណែង​ភ្លាមៗ លោក​ដូណាល់ ត្រាំ​ប្រធានាធិបតី​អាមេរិក ត្រូវបាន​គេ​ចាត់ទុក​ជា​បុរស​ចិត្ដឆៅ និយាយ​យ៉ាង​ណា​ធ្វើ​យ៉ាងនោះ ហើយ​ក៏​ត្រូវបាន​គេ​ចាត់ទុកថា​ជា​មេដឹកនាំ​ល្មោភ​សង្គ្រាម​ផងដែរ​។ រីឯ​មេដឹកនាំ​កូរ៉េខាងជើង​លោក​គីម ជុង​អ៊ុន​វិញ​រឹតតែ​មិនបាច់​និយាយ ព្រោះ​លោក​ជា​មេដឹកនាំ​ផ្ដាច់ការ ហេតុ​នេះ​គ្មាន​អ្វី​ប្លែក​ទេ​ដែល​លោក​ជា​មនុស្ស​កាច ហើយក៏​មិន​បាច់​និយាយ​ពី​រឿង​ធ្វើ​សង្គ្រាម​ដែរ ព្រោះ​លោក​អាច​កំដ​បាន​គ្រប់ពេល​។ តែ​រឿង​ដែល​ភ្ញាក់ផ្អើល​បំផុត​និង​ធ្វើឲ្យ​ពិភពលោក​ស្ងើចសរសើរ គឺ​លោក​ត្រាំ​និង​លោក​គីម​បែរ​ជា​អាច​អង្គុយ​ចរចា​គ្នា​បាន​។ ទោះបីជា​ការ​អនុវត្ដ​តាម​កិច្ចព្រមព្រៀង​រូ​មហាក់​ជាប់គាំង​នាពេល​បច្ចុប្បន្ន តែ​មេដឹកនាំ​ទាំង​ពីរ​មិន​បោះបង់​វិធីសាស្ដ្រ​យក​បញ្ហា​ដាក់​លើ​តុ​ចរចា​ឡើយ​។ តើ​បុរស​ខ្លាំង​ទាំងពីរ​ប្ដេជ្ញា​យ៉ាង​ណា​ខ្លះ​ក្នុង​ការដោះស្រាយ​បញ្ហា​ប្រឈម​? 

​ជា​បន្ដ​សូម​ស្ដាប់​នាទី​វិភាគ​ព្រឹត្ដិការណ៍អ​ន្ដ​រ​ជាតិ រៀបចំ​ជូន​ដោយ​ពេញ ផេង​ដូចតទៅ​៖

​ក្នុង​រយៈពេល​ថ្មីៗ​នេះ​ស្ថានភាព​នៅ​លើ​ឧបទ្វីប​កូរ៉េ ហាក់​តានតឹង​បង្ក​ជា​ការព្រួយបារម្ភ​បន្ដិច​ពី​សំណាក់​អន្ដរជាតិ​ក៏​ដូចជា​អ្នកតាមដាន​ស្ថានការណ៍​។ ព្រួយបារម្ភ​ព្រោះតែ​កូរ៉េ​ខាងជើង​បាន​ធ្វើតេស្ដ​មី​ស៊ី​ល​ឡើង​វិញ​ដល់​ទៅ​៨​លើក ក្រោយ​ស្ងប់ស្ងាត់​តាំងពី​ចុងឆ្នាំ​២០១៧​។ មី​ស៊ី​ល​ដែល​ហោះ​ចេញពី​កូរ៉េខាងជើង​ជាថ្មី ត្រូវបាន​គេ​ចាត់ទុក​ជា​សកម្មភាព​បង្ហាញថា កូរ៉េខាងជើង​លែង​យកចិត្ដទុកដាក់​នឹង​កិច្ចព្រមព្រៀង​ជាមួយ​អាមេ​រិក​ទៀត​ហើយ​។ កូរ៉េ​ខាងជើង​បាន​ព្រមព្រៀង​ជាមួយ​អាមេរិក​នឹង​ចាប់ផ្ដើម​រំលាយ​ចោល​កម្ម​វិធី​នុយក្លេអ៊ែរ ដើម្បី​ដោះដូរ​ការបន្ធូរបន្ថយ​ទណ្ឌកម្ម​សេដ្ឋកិច្ច​។ ប៉ុន្ដែ​ដំណើរការ​រំលាយ​នុយក្លេអ៊ែរ​ត្រូវ​ជាប់គាំង ពោល​គឺ​ការ​អនុវត្ដ​តាម​សេចក្ដីប្រកាស​រួម​ចេញ​ក្រោយ​កិច្ច​ជំនួប​លើក​ដំបូង​ជា​ប្រវត្ដិសាស្ដ្រ​ក្នុង​ប្រទេស​សិង្ហបុរី ធ្វើបាន​តែ​មួយ​រយៈពេល​ខ្លី​ប៉ុណ្ណោះ​។​

​លោក​គីម ជុង​អ៊ុន​មេដឹកនាំ​កូរ៉េខាងជើង និង​លោក​ដូណាល់ ត្រាំ​ប្រធានាធិបតី​អាមេរិក បាន​ជួបគ្នា​ជា​បន្ដបន្ទាប់​ចរចា​ពី​បញ្ហា​ជាប់គាំង ប៉ុន្ដែ​កិច្ចចរចា​ត្រូវ​បរាជ័យ​ទាំងស្រុង​។ បរាជ័យ​ដោយសារតែ​ភាគី​ទាំងពីរ​ប្រកាន់​ជំហរ​តឹងរ៉ឹង​រៀងៗ​ខ្លួន មិន​ព្រម​បន្ទន់​ឥរិយាបថ​អត់ឱន​ឲ្យ​គ្នា​។ តួ​យ៉ាង​ក្នុង​កិច្ច​ជំនួប​លើក​ទី​ពីរ​នៅ​វៀតណាម កូរ៉េខាងជើង​ស្នើឲ្យ​អាមេរិក​បន្ធូរបន្ថយ​ទណ្ឌកម្ម​ខ្លះ ប៉ុន្ដែ​អាមេរិក​មិន​ព្រម​តែ​ចង់​ឲ្យ​កូរ៉េ​ខាងជើង​បោះបង់​កម្មវិធី​នុយក្លេអ៊ែរ​ជាមុនសិន​។ ភាព​រឹងរូស​នេះ​បាន​ធ្វើ​ឲ្យ​កិច្ច​ជំនួប​នៅ​ហាណូយ​កាលពី​ថ្ងៃ​ទី​២៧-២៨​ខែ​កុម្ភ​ឆ្នាំ​២០១៩ ត្រូវ​បិទ​បញ្ចប់​ដោយ​គ្មាន​កិច្ចព្រមព្រៀង​អ្វី​ទាំងអស់​។ 

​បន្ទាប់ពី​នោះ​ជំនួប​លើក​ទី​បី​បាន​ធ្វើឡើង​ជា​ថ្មី​ម្ដង​ទៀត​កាលពី​ថ្ងៃ​ទី​៣០​ខែមិថុនា នៅ​តំបន់​ព្រំដែន​កូរ៉េ​ទាំងពីរ តែ​វា​គ្រាន់​ជា​ការជួប​គ្នា​រយៈពេល​ខ្លី​ដោយ​គ្មាន​ព្រៀងទុក ហេតុ​នេះ​ពុំ​មាន​ការពិភាក្សា​កិច្ចការ​ជា​ដុំកំភួន​ទេ​។ ជំនួប​កាលនោះ​មេដឹកនាំ​ទាំងពីរ​បាន​ប្រកាស​នឹង​បន្ដ​កិច្ចខិតខំ​ប្រឹងប្រែង ស្វែងរក​វិធីសាស្ដ្រ​ដោះស្រាយ​ភាព​តានតឹង​។ ក្រោយ​ជំនួប​លើក​ទី​បី​អាមេរិក​និង​កូរ៉េខាងត្បូង​បានប្រកាស​ចាប់ផ្ដើម​សមយុទ្ធ​ប្រចាំ​ឆ្នាំ​ឡើង​វិញ ដែល​សមយុទ្ធ​នេះហើយ​បាន​ធ្វើ​ឲ្យ​កូរ៉េ​ខាងជើង​ចេញ​ប្រតិកម្ម​។ កូរ៉េ​ខាងជើង​បាន​ធ្វើតេស្ដ​មី​ស៊ី​ល​៨​លើក ហើយ​លោក​គីម ជុង​អ៊ុន​បាន​គំរាម​ទៅ​កូរ៉េខាងត្បូង​ឲ្យ​បញ្ឈប់​សមយុទ្ធ​ជាបន្ទាន់ បើ​ចង់បាន​ដំណោះស្រាយ​ដោយសន្ដិភាព​លើ​ឧបទ្វីប​កូរ៉េ​។​

​ប៉ុន្ដែ​ការ​ធ្វើ​តេស្ដ​មី​ស៊ី​ល​របស់​កូរ៉េ​ខាងជើង លោក​ដូណាល់ ត្រាំ​មិន​បាន​ចាត់ទុក​ជា​រឿង​ធំ​ទេ ហើយ​លោក​ក៏​មិន​បាន​បញ្ជា​ឲ្យ​ផ្អាក​សមយុទ្ធ​ជាមួយ​កូរ៉េ​ខាងត្បូង​ដែរ​។ មិន​ត្រឹម​មិន​ខឹង​នឹង​លោក​គីម ជុង​អ៊ុន លោក​ត្រាំ​បាន​ទាំង​បង្ហាញ​ភាពជឿ​ទុកចិត្ដ​លើ​លោក​គីម​កាន់តែខ្លាំង ហ៊ាន​អះអាង​ថា​លោក​គីម​នៅតែ​ចង់បាន​ការចរចា​ដោយ​សន្ដិភាព​។ លោក​ត្រាំ​បានប្រកាស​ចង់​ជួប​ជាមួយ​លោក​គីម​ជា​លើក​ទី​បួន ប៉ុន្ដែ​មិន​បាន​បញ្ជាក់​កាលបរិច្ឆេទ​ច្បាស់លាស់​ទេ​។ មន្ដ្រី​អាមេរិក​និង​កូរ៉េខាងជើង​ក៏​ចាប់ផ្ដើម​ទាក់ទង​គ្នា​ឡើងវិញ ដើម្បី​រៀបចំ​កិច្ច​ជំនួប​នេះ​។ 

​រឿង​ដែល​គួរឲ្យភ្ញាក់ផ្អើល​មេដឹកនាំ​កូរ៉េខាងជើង​លោក​គីម ជុង​អ៊ុន បាន​អញ្ជើញ​ប្រធានាធិបតី​អាមេរិក​លោក​ដូណាល់ ត្រាំ ឲ្យធ្វើ​ទស្សនកិច្ច​ទៅ​កាន់​ទីក្រុ​ង​ព្យុង​យ៉ាង​។ ការអញ្ជើញ​ធ្វើឡើង​នៅក្នុង​លិខិត​មួយ​ច្បាប់​ផ្ញើ​ទៅកាន់​លោក​ត្រាំ​កាលពី​ខែ​សីហា ដែល​លិខិត​នោះ​លោក​ត្រាំ​បានទទួល​កាលពី​សប្ដាហ៍​ទី​បី​ក្នុង​ខែ​សីហា​។​

​នេះ​ជា​លិខិត​ទី​ពីរ​ដែល​លោក​ត្រាំ​ទទួលបាន​ពី​លោក​គីម​ក្នុង​រយៈពេល​មួយ​ខែ ហើយ​បាន​ផ្ញើ​ទៅ​ចន្លោះ​ពេល​អាមេរិក​និង​កូរ៉េខាងជើង​កំពុង​ជាប់​គាំង​លើ​កិច្ច​ពិភាក្សា​រំលាយ​កម្មវិធី​នុយក្លេអ៊ែរ​។ ក្នុង​លិខិត​លោក​គីម​បាន​បង្ហាញ​ពី​គោលបំណង​របស់​លោក ចង់​ជួប​លោក​ត្រាំ​ក្នុង​កិច្ចប្រជុំ​ម្ដងទៀត យក​បញ្ហា​សេសសល់​មក​ពិភាក្សា​ជា​ថ្មី​។ 

​ឆ្លើយតប​ចំពោះ​ការអញ្ជើញ​របស់​លោក​គីម ជុង​អ៊ុន លោក​ដូណាល់ ត្រាំ​បាន​និយាយថា ពេល​នេះ​មិនមែន​ជា​ពេលវេលា​ត្រឹមត្រូវ សម្រាប់​ការបំពេញ​ទស្សនកិច្ច​ទៅ​កាន់​ទីក្រុង​ព្យុងយ៉ាង​ប្រទេស​កូរ៉េខាងជើង​នោះទេ​។ ប៉ុន្តែ​លោក​នឹង​ទៅ​នៅ​ពេលវេលា​សមស្រប​ណា​មួយ​នា​ថ្ងៃ​អនាគត ដោយ​អាស្រ័យ​លើ​អ្វី​ដែល​កើតឡើង​។ អាស្រ័យ​ទៅលើ​អ្វី​ដែល​កើតឡើង ទំនង​លោក​ត្រាំ​ចង់​សំដៅ​ទៅលើ ការចរចា​រំលាយ​នុយក្លេអ៊ែរ​កូរ៉េខាងជើង​ដែល​កំពុង​ជាប់​គាំង​។ បន្ថែម​លើ​នេះ​លោក​ត្រាំ​ក៏​សង្ឃឹម​ដែរ​ថា លោក​គីម ជុង​អ៊ុន​នឹង​ពេញចិត្ត​នៅក្នុង​ការបំពេញ​ទស្សនកិច្ច​នៅ​សហរដ្ឋអាមេរិក​វិញ​ដូចគ្នា​។ លោក​ត្រាំ​នៅតែ​សរសើរ​ពី​ទំនាក់ទំនង​ជាមួយ​លោក​គីម​ថា​ពិតជា​ល្អប្រសើរ​។ 

​ជារួម​ដ្បិត​មិន​ទាន់​ឯកភាព​ថា​នឹង​ជួប​គ្នា​នៅ​កន្លែង​ណា​និង​ពេល​ណា​ឲ្យ​ពិតប្រាកដ ប៉ុន្ដែ​ការ​បោះដៃ​ឲ្យ​គ្នា​ទៅវិញទៅមក​ដូច្នេះ សបញ្ជាក់​កាន់តែច្បាស់​ថា​លោក​ដូណាល់ ត្រាំ​និង​លោក​គីម ជុង​អ៊ុន មិន​បោះបង់​ចោល​គោលបំណង​ជួបចរចា​ដោះស្រាយ​វិបត្ដិ​ដោយ​សន្ដិភាព​ឡើយ​។ វា​ក៏​ជា​អ្វី​ដែល​អន្ដរជាតិ​កំពុង​ចង់បាន​ដូចគ្នា​។ ចំពោះ​ជំនួប​លើក​ទី​បួន​ប្រសិន​រៀបចំ​ឡើង​មែន ក៏​ទំនងជា​មាន​លទ្ធផល​ផ្លែផ្កា​អាច​ទទួលយកបាន មិន​ដូច​ជំនួប​លើក​ទី​ពីរ​និង​លើក​ទី​បី​ឡើយ ។ មូលហេតុ​គឺ​ថា​ភាគី​ទាំងពីរ​បាន​សិក្សា​ស្វែងយល់​ពី​គ្នា​កាន់តែច្រើន សមល្មម​នឹង​អាច​រក​ចំណុចរួម​ឃើញ​ហើយ​។​

​គួរ​បញ្ជាក់​ឡើងវិញ​ថា បើ​គិត​ពី​ជំនួប​រវាង​លោក​ត្រាំ​ជាមួយ​លោក​គីម​បាន​ធ្វើឡើង​បី​ដង​ហើយ​។ លើក​ទី​មួយ​ចាប់ផ្ដើម​នៅ​ថ្ងៃ​ទី​១២​ខែ​មិថុនា​ឆ្នាំ​២០១៨​នៅ​សិង្ហ​បុរី លើក​ទី​ពីរ​នៅ​ថ្ងៃទី​២៧-២៨​ខែ​កុម្ភៈ​ឆ្នាំ​២០១៩​នៅ​ទីក្រុង​ហាណូយ​ប្រទេស​វៀតណាម និង​លើក​ទី​បី​នៅ​ថ្ងៃ​ទី​៣០​ខែ​មិថុនា​ឆ្នាំ​២០១៩​នៅ​តំបន់​ព្រំដែន​កូរ៉េ​។ ជំនួប​ទាំងបី​លើក​មាន​តែ​ជំនួប​លើក​ទី​មួយ​ប៉ុណ្ណោះ​ដែល​ជោគជ័យ ក្រៅពី​នេះ​គ្មាន​ទទួល​លទ្ធផល​អ្វី​ទាំងអស់​៕

ព័ត៌មានផ្សេងទៀត