ប្រមុខរដ្ឋ​ស្តីទី​នៃ​កម្ពុជា​ថា កម្ពុជា​ទុក​ឡាវ​ជា​មិត្ត​ដ៏​ល្អ​

14-09-2019 10:41 am 87
  ស្តាប់
ស្តាប់ជាសំឡេង

​ក្នុង​ជំនួប​ជាមួយ​លោកនាយក​រដ្ឋមន្ត្រី​នៃ​សាធារណរដ្ឋ​ប្រជាធិបតេយ្យ​ប្រជាមានិត​ឡាវ កាល​ពី​ម្សិលមិញ លោក សាយ ឈុំ បាន​អះអាង​បញ្ជាក់ថា ប្រទេស​កម្ពុជា បានចាត់ទុក​ប្រទេស​ឡាវ គឺជា​មិត្ត​ដ៏​ល្អ ហើយ​ប្រទេស​ទាំង​ពីរ នឹង​បន្ត​ជួយ​គ្នា​ទៅវិញទៅមក ទាំង​ក្នុង​ពេល​បច្ចុប្បន្ន​និង​អនាគត...

​ប្រមុខរដ្ឋ​ស្តីទី​នៃ​ប្រទេស​កម្ពុជា លោក សាយ ឈុំ បាន​វាយតម្លៃ​ខ្ពស់​ចំពោះ​ចំណងមិត្តភាព និង​កិច្ចសហប្រតិបត្តិការ​ដ៏​ល្អ​រវាង​ប្រទេស​កម្ពុជា និង​ប្រទេស​ឡាវ និង​បាន​បញ្ជាក់ថា ចំណង​មិត្តភាព​នេះ បាន​នាំមក​នូវ​ផលប្រយោជន៍​ដ៏​ធំធេង​ទៅវិញទៅមក សម្រាប់​ប្រជាជន និង​ប្រទេស​ទាំង​ពីរ ។​

​ក្នុង​ជំនួប​ជាមួយ​លោក ថង​លូន ស៊ី​ស៊ូ​លី​ត នាយករដ្ឋមន្ត្រី​នៃ​សាធារណរដ្ឋ​ប្រជាធិបតេយ្យ​ប្រជាមានិត​ឡាវ នៅ​ព្រឹក​ថ្ងៃទី​១៣ កញ្ញា លោក​បាន​គូសបញ្ជាក់ថា ប្រទេស​កម្ពុជា​ចាត់ទុក​ប្រទេស​ឡាវ ជា​ដៃគូ​ដ៏​ល្អ ជា​មិត្ត​ល្អ ជា​បងប្អូន​ល្អ និង​ជា​អ្នកជិតខាង​ល្អ ហើយ​ត្រៀម​គ្រប់​លក្ខណៈសម្បត្តិ បន្ត​ជួយ​គាំទ្រ​គ្នា​ទៅវិញទៅមក ក្នុងពេល​បច្ចុប្បន្ន​និង​អនាគត ។​

​លោក​បាន​បង្ហាញ​នូវ​ជំនឿ​ចិត្ត​ថា ក្នុង​ដំណើរ​ទស្សនកិច្ច​ជា​ផ្លូវការ​របស់​លោកនាយក​រដ្ឋមន្ត្រី​សាធារណរដ្ឋ​ប្រជាធិបតេយ្យ​ប្រជាមានិត​ឡាវ​នៅ​កម្ពុជា​នេះ គឺ​មាន​សារៈសំខាន់​ណាស់ ទៅ​ដល់​ការ​បន្ត​ខិតខំ​រក្សា​ប្រពៃណី​ដ៏​ល្អ​នៃ​ចំណង​មិត្តភាព កិច្ចសហប្រតិបត្តិការ​រវាង​ប្រទេស និង​ប្រជាជន​ទាំង​ពីរ​ឱ្យ​កាន់តែ​ល្អប្រសើរ និង​រឹងមាំ​ថែម​ទៀត ។​

​យ៉ាងណាក៏ដោយ ក្នុងជំនួប​នោះ លោក ថង​លូន ស៊ី​ស៊ូ​លី​ត បានបង្ហាញ​ជំនឿ​ចិត្ត​ថា ប្រទេស​ទាំង​ពីរ នឹង​បន្ត​ពូន​ជ្រុំ​ទំនាក់ទំនង និង​កិច្ចសហប្រតិបត្តិការ​ឱ្យ​កាន់តែ​ល្អប្រសើរ​ជាងនេះទៅទៀត ។ លោក​សង្ឃឹមថា អង្គការនីតិប្បញ្ញត្តិ​នៃ​ប្រទេស​ទាំង​ពីរ នឹង​បន្ត​ពង្រឹង​ពង្រីក​ទំនាក់ទំនង និង​កិច្ចសហប្រតិបត្តិការ​ជាមួយគ្នា​ឱ្យ​កាន់តែ​រឹងមាំ​បន្ថែមទៀត ៕

 ពាក្យគន្លឹះ  កម្ពុជា-ឡាវ

ព័ត៌មានផ្សេងទៀត