ប្រធានាធិបតី​​អ៊ីរ៉ង់​​ប្រកាស​​នឹង​អភិវឌ្ឍ​​បច្ចេកវិទ្យា​​ផលិត​​នុយក្លេអ៊ែរ​

05-09-2019 4:05 pm 150

​ប្រធានាធិបតី​អ៊ីរ៉ង់​លោក​ហាសាន រ៉ូ​ហានី​បាន​និយាយថា ប្រទេស​របស់លោក​នឹង​ចាប់ផ្ដើម​អភិវឌ្ឍ​បច្ចេកវិទ្យា​ថ្មីៗ ដើម្បី​ពន្លឿន​ការចម្រាញ់​សារធាតុ​អ៊ុយ​រ៉ា​ញ៉ូម ជា​សារធាតុ​សំខាន់បំផុត​ក្នុង​ការផលិត​អាវុធ​នុយក្លេអ៊ែរ​។ លោក​រ៉ូ​ហានី​បង្ហាញ​ផែនការនេះ​នៅក្នុង​សន្និ​សីទ​កាសែត​កាលពី​ថ្ងៃ​ពុធ ដោយ​បន្ថែមថា​អ៊ីរ៉ង់​នឹង​ជំរុញ​ការស្រាវជ្រាវ​ក៏ដូចជា​ការអភិវឌ្ឍ​គ្រប់​ប្រភេទ​ទាំងអស់​លើ​បច្ចេកវិទ្យា​ថ្មីៗ ហើយនឹង​ចាប់ផ្ដើម​ពី​ថ្ងៃទី​០៦​ខែកញ្ញា​តទៅ​។​

​វិធានការ​របស់​អ៊ីរ៉ង់​នៅពេលនេះ​ក្នុង​គោលបំណង​ប្រឆាំង​ទណ្ឌកម្ម​របស់​អាមេរិក ដែល​នឹង​អាចធ្វើឲ្យ​អ៊ីរ៉ង់​ងាក​កាន់តែ​ឆ្ងាយ​ពី​ការប្ដេជ្ញាចិត្ដ​ក្នុង​កិច្ចព្រមព្រៀង​នុយក្លេអ៊ែ​រ​ឆ្នាំ​២០១៥​។ អ៊ីរ៉ង់​បន្ដ​លើកឡើង​ម្ដង​ហើយ​ម្ដង​ទៀតថា ទណ្ឌកម្ម​អាមេរិក​បាន​រារាំង​មិនឲ្យ​អ៊ីរ៉ង់​ទទួលបាន​ផលប្រយោជ​ន៍​សេដ្ឋកិច្ច ដែល​បាន​សន្យា​ក្នុង​កិច្ចព្រមព្រៀង​។ 

​លោក​រ៉ូ​ហានី​សង្កត់ធ្ងន់ផង​ដែ​រថា ការស្រាវជ្រាវ​និង​ការអភិវឌ្ឍ​នឹង​អនុវត្ដ​ក្នុង​គោលដៅ​សន្ដិភាព ស្ថិតក្រោម​ការត្រួតពិនិត្យ​របស់​ទីភ្នាក់ងារ​ថាមពលបរមាណូ​អន្ដរជាតិ​។ ការអភិវឌ្ឍ​បច្ចេកវិទ្យា​ថ្មី​នឹង​បង្កើន​សកម្មភាព​ចម្រាញ់​អ៊ុយ​រ៉ា​ញ៉ូម ប៉ុន្ដែ​លោក​រ៉ូ​ហានី​មិនបាន​បញ្ជាក់ពី​កម្រិ​តដែល​អ៊ីរ៉ង់​អាច​ស្វែងរក​នោះទេ​។ ចំពោះ​អ្នកនាំពាក្យ​អ៊ីរ៉ង់​សម្រាប់​ទីភ្នាក់ងារ​ថាមពលបរមាណូ​អន្ដរជាតិ បាន​ព្រមាន​កាលពី​ថ្ងៃ​អង្គារ​ថា ប្រសិនបើ​អ៊ីរ៉ង់​ចង់​អ៊ីរ៉ង់​អាច​បង្កើន​កម្រិត​ចម្រាញ់​សារធាតុ​អ៊ុយ​រ៉ា​ញ៉ូម បាន​រហូតដល់​២០​ភាគរយ​ក្នុង​រយៈពេល​ពីរ​ថ្ងៃ​។​

​គួរ​បញ្ជាក់ថា អ៊ីរ៉ង់​ធ្លាប់​ទទូច​ឲ្យ​ចក្រភព​អង់គ្លេស បារាំង អាល្លឺម៉ង់ ដែលជា​សមាជិក​ក្នុង​កិច្ចព្រមព្រៀង​នុយក្លេអ៊ែរ​ឆ្នាំ​២០១៥ ជួយ​បង្កើន​សម្ពាធ​លើ​ទីក្រុង​វ៉ាស៊ីនតោន​ដើម្បី​ជួយ​បន្ធូរបន្ថយ​ទណ្ឌកម្ម​។ ចំណែក​ក្រុមអ្នកតាមដាន​ស្ថានការណ៍​បាន​និយាយថា ខណៈ​កំពុង​ចាត់វិធានការ​ថ្មី​អ៊ីរ៉ង់​ក៏​កំពុង​ស្វែងរក​លទ្ធភាព ដែល​អនុញ្ញាតឲ្យ​មានការច​រចាជាមួយ​មហាអំណាច​អឺរ៉ុប​ដែរ ដើម្បី​ទទួលបាន​ការគាំទ្រ​ជាក់លាក់​ផ្នែក​សេដ្ឋកិច្ច​៕

ព័ត៌មានផ្សេងទៀត