រដ្ឋមន្ដ្រី​​ប៉ា​គី​ស្ថាន​​មួយរូប​ថា​​អាច​ប្រើ​​នុយក្លេអ៊ែរ​​វាយប្រហារ​​ឥណ្ឌា​បាន​

02-09-2019 5:29 pm 491
រូបភាព​អាវុធ​នុយក្លេអ៊ែរ​​របស់​ប៉ាគីស្ថាន

​រដ្ឋមន្ដ្រី​មួយរូប​របស់​ប៉ា​គី​ស្ថាន​បានប្រកាស​ព្រមាន​ថា ប៉ា​គី​ស្ថាន​អាច​បើក​ការវាយប្រហារ​ដោយ​ប្រើ​នុយក្លេអ៊ែរ​លើ​ប្រទេស​ឥណ្ឌា​បាន​។ ការលើកឡើង​ដូច្នេះ​ហាក់​ដុត​ឲ្យ​ភ្លើងកំហឹង​ឆេះ​កាន់តែខ្លាំង ខណៈ​ប៉ា​គី​ស្ថាន​និង​ឥណ្ឌា​កំពុង​ផ្ទុះ​ភាព​តានតឹង​ស្រាប់​។ ចាប់តាំងពី​ឥណ្ឌា​ប្រកាស​ដក​ស្វ័យភាព​នៅ​តំបន់​កា​ស្មៀ ហើយ​អាច​នឹងមាន​ផែនការ​ដាក់ពង្រាយ​ទ័ព​នៅ​ទីនោះ ប៉ា​គី​ស្ថាន​កាន់តែ​មិន​សប្បាយចិត្ដ​។ ប៉ា​គី​ស្ថាន​ថា​ឥណ្ឌា​ធ្វើ​ដូច្នេះ​ជា​ប្រកាស​លុបចោល​ការយោគយល់​ទៅវិញទៅមក រឿង​អី​ដែល​ប៉ា​គី​ស្ថាន​ត្រូវ​តាម​លួងលោម​ឥណ្ឌា​គ្រប់ពេល​។ 

​លោក​រដ្ឋមន្ដ្រី​Sheikh Rashid Ahmed​បញ្ជាក់​បន្ថែមថា ពេលវេលា​សម្រាប់​ការតស៊ូ​ដើម្បី​ទាមទារ​សេរីភាព​ចុងក្រោយ​បាន​មកដល់​ហើយ ហើយ​សង្គ្រាម​ជាមួយ​ប្រទេស​ឥណ្ឌា​នឹង​ក្លាយជា​ជម្រើស​ចុងក្រោយ​សម្រាប់​ពេលនេះ​។ លោក​អះអាងថា​ប៉ា​គី​ស្ថាន​មាន​គ្រាប់បែក​ផ្ទុក​នុយក្លេអ៊ែរ​ចន្លោះ​ពី​១២៥-២៥០​ក្រាម អាច​បំផ្លាញ​អ្វីដែល​ប៉ា​គី​ស្ថាន​ចង់​បំផ្លាញ​បាន​។ លោក​ក៏​ព្រមាន​ទៅ​នាយករដ្ឋមន្ដ្រី​ឥណ្ឌា​ថា បើ​អាច​គួរតែ​ចៀសឲ្យផុត​ពី​សង្គ្រាម​។ ការចរចា​ពិតជា​អាចទៅរួច​ប្រសិន​ឥណ្ឌា​ចាត់វិធានការ​ឆ្ពោះទៅរក​ដំណោះស្រាយ​បញ្ចប់​ជម្លោះ​នៅ​កា​ស្មៀ តែបើ​ឥណ្ឌា​ចង់​ធ្វើសង្គ្រាម​នោះ​ឥណ្ឌា​អាច​បែក​ទៅជា​២២​ផ្នែក​។​

​លោក​Ahmed​ត្រូវបាន​គេ​ដឹងថា ធ្លាប់បាន​និយាយ​បង្ក​ភាពចម្រូងចម្រាស​រួចមក​ហើយ​កន្លងមក​។ កាលពី​សប្ដាហ៍​មុន​លោក​បាន​សន្និដ្ឋានថា​សង្គ្រាម​រវាង​ប៉ា​គី​ស្ថាន​និង​ឥណ្ឌា អាច​ផ្ទុះឡើង​ក្នុង​រង្វង់​ខែវិច្ឆិកា ស្របពេល​មាន​របាយការណ៍​ថា មានការ​ដាក់ពង្រាយ​ក​ង​ទ័ព​នៅ​ជិត​តំបន់​ព្រំដែន​ជាមួយ​ឥណ្ឌា​។ កាលពី​ថ្ងៃ​អង្គារ​សប្ដាហ៍​មុន​ប៉ា​គី​ស្ថាន​បាន​ចល័ត​ទ័ព និង​ក្រុម​កុម្មង់ដូ​ពិសេស​ទៅ​កាន់តំបន់​ជួរមុខ​ព្រំដែន​ផងដែរ​។ ប្រភព​មិន​បញ្ចេញ​ឈ្មោះ​បានឲ្យដឹងថា ការ​ដាក់ពង្រាយ​ទ័ព​បញ្ជាក់ថា ភាពចម្រូងចម្រាស​នៅ​តំបន់​ភាគ​ខាងលិច​ប្រទេស​ឥណ្ឌា​កំពុង​ក្លាយជា​ជម្លោះ​រយៈពេល​ខ្លី​ហើយ​។​

​សូម​រម្លឹកថា ភាព​តានតឹង​រវាង​ប្រទេស​នុយក្លេអ៊ែរ​ទាំងពីរ កើនឡើង​កាន់តែខ្លាំង​ចាប់តាំងពី​ទីក្រុង​ញូវដេលី​របស់​ឥណ្ឌា បានធ្វើ​វិសោធនកម្ម​មាត្រា​៣៧០ ដែល​បានផ្ដល់​ឋានៈ​ពិសេស​ដល់​ក្រុង​ចាម​មូ​និងក្រុង​កា​ស្មៀ​។ កា​ស្មៀ​គឺជា​ឆ្អឹង​នៃ​ជម្លោះ​ចាប់តាំងពី​តំបន់​នេះ ទទួលបាន​ឯករាជ្យ​ពី​ចក្រភព​អង់គ្លេស​ក្នុង​ឆ្នាំ​១៩៤៧​។ រដ្ឋាភិបាល​ប្រទេស​ទាំង​ពីរបាន​គ្រប់គ្រង​តំបន់​កា​ស្មៀ​ម្ខាង​ម្នាក់ ប៉ុន្ដែ​មិន​ភ្លេច​ឡើយ​ចេតនា​ចង់​បានមក​គ្រប់គ្រង​ទាំងមូល​៕

ព័ត៌មានផ្សេងទៀត