​អង្គការ​(JMAS)​ជប៉ុន​​ស្វែងរក​ដៃគូ​អភិវឌ្ឍន៍​​តំបន់​ដែល​ខ្លួន​បាន​បោសសម្អាត​មីន​រួច​​

30-08-2019 11:14 am 130

​អង្គការ​សកម្មភាព​កំចាត់មីន​របស់​ជប៉ុន ហៅ​កាត់​ថា (JMAS) បាន​អំពាវនាវ​ស្វែករក​ដៃគូ​អភិវឌ្ឍន៍​តំបន់​ចំការមីន ដែល​ខ្លួន​បាន​បោសសម្អាត​មីន​រួចរាល់​។ អង្គការ (JMAS) បាន​បញ្ជាក់ថា ការស្វែងរក​ដៃគូ​សម្រាប់​ធ្វើ​ការអភិវឌ្ឍន៍​ចំការមីន នៅ​តំបន់​ដែល​ខ្លួន​បាន​បោសសម្អាត​រួចរាល់​នេះ គឺ​ដើម្បី​ជួយ​ដល់​ប្រជាពលរដ្ឋ​ដែល​រស់នៅ​ទីនោះ​។

​តំណាង​ប្រធាន​អង្គការ​សកម្មភាព​កំចាត់មីន​របស់​ជប៉ុន ហៅ​កាត់​ថា (JMAS) ប្រចាំ​នៅ​កម្ពុជា លោក Noriyoshi Suenaga បាន​ស្នើឱ្យ​ប្រព័ន្ធ​ផ្សព្វផ្សាយ ជួយ​ផ្សព្វផ្សាយ​ស្វែងរក​ដៃគូ​អភិវឌ្ឍន៍​តំបន់​ចំការមីន ដែល​ខ្លួន​បាន​បោស​ម្អាត​រួច ដើម្បី​ជួយ​ដល់​សហគមន៍​ប្រជាពលរដ្ឋ ដែល​រស់នៅ​ទីនោះ​។ លោក​បាន​គូសបញ្ជាក់ថា បច្ចុប្បន្ន​មាន​អង្គការ​ដៃគូ​មួយចំនួន បាន​សហការ​ជាមួយ​អង្គការ (JMAS) ធ្វើ​ការអភិវឌ្ឍន៍​បាន​ខ្លះ​ហើយ តែ​នៅ​តំបន់​មួយចំនួនទៀត ដែល​ខ្លួន​បាន​បោសសម្អាត​មីន​រួចរាល់ នៅ​មិនទាន់មាន​ដៃគូ​អភិវឌ្ឍន៍​ឡើយ​……………

​សំឡេង​៖ 

​តំណាង​ប្រធាន​អង្គការ​សកម្មភាព​កំចាត់មីន​របស់​ជប៉ុន​រូបនេះ បាន​គូសបញ្ជាក់​ទៀតថា តំបន់​ដែល​បាន​បោសសម្អាត​មីន​រួច បើ​ពុំមាន​ការអភិវឌ្ឍន៍​ទេ ដី​នោះ​នឹង​ទំនេរ​ចោល​ធ្វើឱ្យ​ព្រៃ​ដុះ​ជិត ប៉ុន្តែ​បើ​យើង​បានធ្វើ​ការអភិវឌ្ឍន៍​វិញ នឹង​ជួយ​ទៅដល់​ប្រជាពលរដ្ឋ​រស់នៅ​ទីនោះ មាន​ការងារ​ធ្វើ មាន​ជីវភាព​កាន់តែ​ប្រសើរឡើង​។ ដូច្នេះហើយ​ទើប​អង្គការ​សកម្មភាព​កំចាត់មីន (JMAS) កៀរគរ​ស្វែងរក​ដៃគូ ដើម្បី​ធ្វើ​ការអភិវឌ្ឍន៍​នៅ​តំបន់​ដែល​ខ្លួន​បាន​បោសសម្អាត​មីន​រួចរាល់​។​

​សូមបញ្ជាក់ថា ការលើកឡើង​របស់​តំណាង​ប្រធាន​អង្គការ​សកម្មភាព​កំចាត់មីន​របស់​ជប៉ុន បាន​ធ្វើឡើង​ក្នុង​ស​ន្និសិទ​សារព័ត៌មាន​របស់​អង្គការ​សកម្មភាព​កំចាត់មីន (JMAS) នៅ​ស្ថានទូត​ជប៉ុន នា​ថ្ងៃទី​២៩ ខែ​សីហា ឆ្នាំ​២០១៩​។ យ៉ាងណាក៏ដោយ​បើតាម​អង្គការ​សកម្មភាព​កំចាត់មីន (JMAS) បានឱ្យដឹងថា ខ្លួន​ចាប់ផ្ដើម​សកម្មភាព​បោសសម្អាត​មីន នៅក្នុង​ប្រទេស​កម្ពុជា ចាប់តាំងពី​ឆ្នាំ​២០០២ ហើយ​បាន​ពង្រីក​សកម្មភាពរ​បស់​ខ្លួន ដើម្បី​ធ្វើ​ការអភិវឌ្ឍន៍​សហគម​ន៍​នៅ​តំបន់​ដែល​សម្អាត​គ្រាប់មីន​រួចរាល់​។​

​បើតាម​អង្គការ (JMAS) បាន​ឱ្យដឹងទៀតថា តំបន់​ដែល​ខ្លួន​ធ្វើ​សកម្មភាព​បោសសម្អាត​គ្រាប់មីន​មិនទាន់​ផ្ទុះ​នោះ រួមមាន ខេត្ត​បាត់ដំបង និង​ខេត្តបន្ទាយមានជ័យ ហើយ​បើតាម​គម្រោង (JMAS) នឹង​បន្តធ្វើ​ការងារ​ខ្លួន​នៅ​ប្រទេស​កម្ពុជា ប្រសិនបើ​រដ្ឋាភិបាល​ជ​ប៉ុន នៅតែ​បន្ត​ផ្ដល់​ថវិកា​ដល់​អង្គការ (JMAS) ធ្វើ​សកម្មភាព​នៅ​ប្រទេស​កម្ពុជា​៕

ព័ត៌មានផ្សេងទៀត