ប៉ា​គី​ស្ថាន​ហ្វឹកហាត់​បាញ់​មី​ស៊ី​ល​ឆ្លង​ទ្វីប​ដោយ​ជោគជ័យ​

29-08-2019 3:52 pm 277

​អ្នកនាំពាក្យ​កងកម្លាំងប្រដាប់អាវុធ​ប៉ា​គី​ស្ថាន​លោក​Asif Ghafoor បាន​អះអាងថា យោធា​ប៉ា​គី​ស្ថាន​បាន​អនុវត្ត​ការហ្វឹកហាត់ ការបាញ់​មី​ស៊ី​ល​ឆ្លង​ទ្វីប ប្រភេទ Ghaznavi ប្រកបដោយ​ជោគជ័យ​។ មី​ស៊ី​នេះ មាន​សមត្ថភាព​បញ្ជូន​ក្បាល​គ្រាប់​ជាច្រើន​ប្រភេទ​។ សមយុទ្ធ​នេះ បាន​កើតឡើង​នៅពេល​ភាព​ប្រទូសរ៉ាយ រវាង​ប៉ា​គី​ស្ថាន​និង​ឥណ្ឌា​បាន​កើនឡើង បន្ទាប់​លោក​ណារិន ដ្រា​មូឌី​នាយករដ្ឋមន្ត្រី​ឥណ្ឌា បានសម្រេច​លុបចោល​សិទ្ធិ្ធ​ស្វ័យភា​ពនៅ​តំបន់​កា​ស្មៀ​រ​។ ការ​ថ្លែង​របស់លោក​មូឌី ធ្វើឡើង​ក្នុងឱកាស នៃ​ការ​ប្រារព្វ​ទិវា​បុណ្យ​ឯករាជ្យ​ជាតិ នៅ​ថ្ងៃទី​១៥​ខែសីហា​ឆ្នាំ​២០១៩​។​

​ចំពោះ​ប៉ា​គី​ស្ថាន យល់ថា ឥណ្ឌា​ទំនង​មាន​គម្រោង​ប្រើប្រាស់​កងទ័ព ឲ្យធ្វើ​អ្វី​ម្យ៉ាង​នៅទីនោះ​។ ប៉ា​គី​ស្ថាន​បាន​ឆ្លើយតប​យ៉ាង​កំហឹង ដើម្បី​ប្រឆាំងនឹង​ការសម្រេច​ដក​ស្វ័យភាព​នេះ ដោយ​ភ្លាមៗ​បាន​ផ្អាក​ការធ្វើ​ពាណិជ្ជកម្ម​ទ្វេភាគី និង​កាត់បន្ថយ​ទំនាក់ទំនង​ការទូត​ឥណ្ឌា​។ បន្ថែម​លើ​នេះ ប៉ា​គី​ស្ថាន បាន​គំរាមថា​ត្រៀមខ្លួន ដើម្បី​ទប់ទល់​ជាមួយ​ឥណ្ឌា​ថែមទៀត​ផង​។​

​ឥណ្ឌា​និង​ប៉ា​គី​ស្ថាន ដែលជា​ប្រទេស​មាន​នុយក្លេអ៊ែរ​ដូចគ្នា មាន​ប្រវត្ត​ឈ្លោះទាស់ទែង​គ្នានៅ​កា​ស្មៀរ​ជា​យូរណាស់​មកហើយ​។ ពោល តាំងពី​ឥណ្ឌា​និង​ប៉ា​គី​ស្ថាន នៅ​ជា​ប្រទេស​តែមួយ​រួមគ្នា​ម្ល៉េះ​។ អំឡុងពេល​ឥណ្ឌា​ស្ថិតក្រោម​អាណានិគម​ចក្រភព​អង់គ្លេស កា​ស្មៀរ គឺជា​រដ្ឋ​មួយ​នៅក្នុង​រដ្ឋ​សហព័ន្ធ​ឥណ្ឌា​។ ក្រោយ​អង់គ្លេស បញ្ចប់​អាណានិគម​ប្រគល់​ឯករាជ្យ ក៏បាន​ពុះ​ចែក​ទឹកដី​ឥណ្ឌា​ជា​ពីរ គឺ​ឥណ្ឌា​និង​ប៉ា​គី​ស្ថាន​។ ចំណែក​តំបន់​កា​ស្មៀរ នៅតែ​ជា​ចំណុច​ប្រទាញប្រទុង​គ្នា រហូត​ភាគី​ទាំងពីរ​ឥណ្ឌា​និង​ប៉ា​គី​ស្ថាន លើកទ័ព​ទៅ​បញ្ឈរជើង​នៅ​តំបន់​នោះ ហើយ​ជម្លោះ​ចាប់ផ្តើម​ផ្ទុះឡើង ចាប់តាំងពី​ពេល​នោះមក​៕

ព័ត៌មានផ្សេងទៀត