មន្រ្ដីជាន់ខ្ពស់ក្រសួងមហាផ្ទៃ ណែនាំដល់អ្នកប្រើប្រព័ន្ធបច្ចេកវិទ្យា ជៀសវាងប្រើដើម្បីកេងប្រវ័ញ្ចផ្លូវភេទកុមារ

ក្នុងសិក្ខាសាលាស្តីពី”កិច្ចបង្ការ និងការ​ឆ្លើយតប នឹងបទល្មើសផ្លូវភេទលើកុមារ ក្នុងវិស័យ​ទេសចរណ៍”នៅថ្ងៃទី២៧ ខែសីហានេះ លោកស្រីជូ ប៊ុនអេង រដ្ឋលេខាធិការ ក្រសួងម​ហាផ្ទៃ និងជាអនុប្រធានអចិន្រ្តៃយ៍ ​នៃ​គណៈកម្មាធិការជាតិ​ប្រយុទ្ធប្រឆាំង ការជួញដូរមនុស្ស បានណែនាំឲ្យអ្នកប្រើប្រាស់ ប្រព័ន្ធបច្ចេកវិទ្យា​ទាំងអស់ ចូលរួមប្រើប្រាស់ឲ្យ​បានត្រឹមត្រូវ និងមានប្រយោជន៍ដល់សង្គមជាតិ ជៀសវៀងការប្រើ​ប្រាស់​ដើម្បី​កេង​ប្រវ័ញ្ច ឬធ្វើអំពើមិនសមរម្យ​ណាមួយលើផ្លូវភេទកុមារ។

លោកស្រីជូ ប៊ុនអេង បានថ្លែងក្នុងអង្គសិក្ខាសាលានេះថា”បច្ចុប្បន្នយើងសង្កេតថាការប្រើប្រា​ស់ប្រព័ន្ធបច្ចេកវិទ្យានានា ពិសេសបណ្តាញទំនាក់ទំនងសង្គម កំពុងពេញនិយមប្រើប្រាស់នូវគ្រប់មជ្ឈដ្ឋាន ដូច្នេះប្រសិន​បើអ្នកប្រើ​ប្រាស់​មិន​ត្រឹមត្រូវ និងក្នុងបំណងទុច្ចរិតណាមួយនោះ វានឹងបង្កឲ្យមានបទល្មើស និងជនរងគ្រោះ ដែលជាអនិតិជន​កាន់តែច្រើន តាមរយៈប្រ​ព័ន្ធបច្ចេកវិទ្យានេះ”។

មន្រ្ដីជាន់ខ្ពស់ក្រសួងមហាផ្ទៃរូបនេះ ក៏បានកត់សម្គាល់ឃើញ ថា ការកើនឡើងនូវរូបភាពអាសអាភាស​ នៅតាមគេហទំព័រនានា កំពុងតែកាន់តែរីកសាយភាយយ៉ាងច្រើន ដែលនេះក៏ជាកក្តាមួយក្នុងការ​បង្កើត​ ឲ្យមាន​អំពើ​រំលោភបំពានផ្លូវភេទលើកុមារផងដែរ។ លោកស្រីជូ ប៊ុនអេង ថា ក្នុងរយៈកាលកន្លងមក ដើម្បីទប់ស្កាត់ និងបង្ការបញ្ហានេះ ក្រសួងមហាផ្ទៃ បានបង្កើតនាយកដ្ឋានប្រឆាំងបទល្មើសបច្ចេកវិទ្យា។

ជាមួយគ្នានេះលោកស្រី ក៏បានអំពាវនាវដល់អ្នកពាក់ព័ន្ធ ពិសេសអាណាព្យាបាល ត្រូវតែបង្កើន​ការយកចិត្តទុកដាក់​បន្ថែមទៀត ព្រោះថាការងារនេះត្រូវ មានការចូលរួមពីគ្រប់ស្ថានប័នពាក់ព័ន្ធ និងដៃគូរអភិវឌ្ឍន៍​ផ្សេងៗ ដើម្បី​បំពេញ​នូវអ្វីដែលខ្វះខាត ដើម្បីឈានដល់ការលុបបំបាត់អំពើកេងប្រវ័ញ្ចលើកុមារ។

សូមជម្រាប ថា បច្ចុប្បន្នក្រសួងមហាផ្ទៃ ដែលមានគណៈកម្មាធិការជាតិប្រយុទ្ធ​ប្រឆាំង​​អំពើជួញដូរមនុស្ស ជាសេនាធិការលើការងារនេះ បានដាក់ចេញនូវវិធានការចំពោះមុខ៣​ចំណុចសំខាន់ៗ​រួម​មាន៖ទី១-ការប៉ាន់​ប្រមា​​ណ​​ទៅលើទំហំ នៃការហូរចូលរបស់ភ្ញៀវទេសចរ (ទាំងទេសចរណ៍ខ្មែរ និងបរទេស) ដែលមាននិន្នាការលើអំពើពេស្យាចារ។ ទី២-ត្រូវមានភាពជឿនលឿនផ្នែកបច្ចេកវិទ្យា ក៏ដូចជាផ្លាស់ប្ដូរឥរិយាបថ​របស់​មនុ​ស្សនៅក្នុងសង្គម។ ទី៣-ត្រូវបង្កើនការស្រាវជ្រាវ ដាក់ការសង្ស័យជាមុនដើម្បីត្រៀមបង្ការ ទប់ស្កាត់​ជាមុន ដោយមិនត្រូវទុកឲ្យរូបភាពនោះមកដល់នោះទេ។ គួរឲ្យដឹងផងដែរ ថា គណៈកម្មាធិការប្រយុទ្ធប្រឆាំង​អំពើ​ជួញដូរ​មនុស្ស បានដាក់ខេត្តចំនួន៥ ដែលជាខេត្តមុខព្រួញ ត្រូវតែបង្កើនប្រព័ន្ធការពារលើកុមារ ដែលងាយរង​គ្រោះក្នុងនោះរួមមាន៖ខេត្តកំពត, សៀមរាប, ព្រះសីហនុ និងរាជធានីភ្នំពេញ៕