មេដឹកនាំ​ហុងកុង​ថា​​ការចរចា​​និង​ការគោរព​គ្នា​​ជា​ផ្លូវ​ដើរ​ចេញ​ពី​ភាពចលាចល​

21-08-2019 4:11 pm 530
មេដឹកនាំហុងកុងលោកស្រីខា​រី ឡា​ម

​មេដឹកនាំ​ហុងកុង​លោកស្រី​ខា​រី ឡា​ម​បាន​និយាយ​កាលពី​ថ្ងៃ​អង្គារ​ថា លោកស្រី​សង្ឃឹម​ការតវ៉ា​ដោយ​សន្ដិភាព​ប្រឆាំង​រដ្ឋាភិបាល​កាលពី​ចុង​សប្ដាហ៍​មុន គឺជា​ការ​ចាប់ផ្ដើមមៃ​កិច្ចខិតខំ​ប្រឹងប្រែង​ស្ដារ​ភាពស្ងប់ស្ងាត់​ឡើងវិញ​។ លោកស្រី​ក៏​បើកឱកាស​សម្រាប់​ការចរចា​ជាមួយ​ក្រុមបាតុករ​ផងដែរ​។ កាលពី​ថ្ងៃអាទិត្យ​ចុង​សប្ដាហ៍​មុន​មាន​មនុស្ស​រាប់ពាន់នាក់​នាំគ្នា​ប្រមូលផ្ដុំ ដែលជា​សប្ដាហ៍​ទី​១១​គិត​តាំងពី​ផ្ទុះ​បាតុកម្ម​នៅ​ហុងកុង​។ 

​លោកស្រី​ខា​រី ឡា​ម​បាន​និយាយថា លោកស្រី​សង្ឃឹម​យ៉ាង​ស្មោះត្រង់​ថា​នេះ​គឺជា​ការចាប់​ផ្ដើម​ធ្វើឲ្យ​សង្គមមាន​សន្ដិភាព​ឡើ​ង​វិញ និង​រុញច្រាន​អំពើហិង្សា​ទៅឲ្យ​ឆ្ងាយ​។ លោកស្រី​ថា​នឹង​ចាប់ផ្ដើម​ការងារ​ជាបន្ទាន់ ដើម្បី​បង្កើតឲ្យមាន​កិច្ច​ចរចា ដែល​កិច្ចចរចា​នឹង​ផ្អែកលើ​ការគោរព​និង​យោគយល់​គ្នា​ទៅវិញទៅមក​។ វា​ជា​ការស្វែងរក​ផ្លូវ​មួយ​សម្រាប់​ហុងកុង​នា​ពេលបច្ចុប្បន្ន ដើម្បី​ដើរ​ចេញពី​ភាពចលាចល​។​

​កំហឹង​បាន​ផ្ទុះឡើង​នៅ​ហុងកុង​តាំងពី​ថ្ងៃទី​០៩​ខែមិថុនា ប្រឆាំង​សេចក្ដីព្រាងច្បាប់​ធ្វើ​បត្យាប័ន​ជាមួយ​ចិន​។ សេចក្ដីព្រាងច្បាប់​អនុញ្ញាតឲ្យ​បញ្ជូនជន​សង្ស័យ​ទៅកាត់​ទោសនៅ​ចិន ប៉ុន្ដែ​ក្រុមបាតុករ​គាំទ្រ​ប្រជាធិបតេយ្យ​ថា​ធ្វើបែបនេះ អាច​ប៉ះពាល់​ដល់​សិទ្ធិសេរីភាព ពិសេស​ជនសង្ស័យ​អាច​រង​នូវ​អំពើ​អ​យុត្ដិធម៌​នានា​។ ការតវ៉ា​ក៏​រីក​រាលដាល​កាន់តែ​ធំ រហូត​ផ្ទុះ​អំពើហិង្សា​បណ្ដាលឲ្យ​មនុស្ស​របួស​ជា​ច្រើននាក់ និង​ចាប់ខ្លួន​រាប់រយ​នាក់​ទៀត​។ បច្ចុប្បន្ន​នៅ​ពុំទាន់​មាន​សញ្ញា​បង្ហាញថា ការតវ៉ា​អាច​នឹង​បញ្ចប់​បាន​នោះទេ​។​

​ចិន​បាន​ព្រមាន​កាលពី​សប្ដាហ​មុន​ដែរថា ខ្លួន​នឹងមិន​អង្គុយ​មើល​ភាពចលាចល ដែល​កំពុង​កើតឡើង នៅក្នុង​ទីក្រុង​ហុងកុង​នោះទេ ខណៈដែល​ប្រធានាធិបតី​អាមេរិក លោក​ដូណាល់ ត្រាំ​បានបង្ហាញ​ការព្រួយបារម្ភ​ចំពោះ​ហា​នី​ភ័យ នៃ​ការឆ្លើយតប​ដោយ​ហិង្សា​ចំពោះ​ការតវ៉ា​។ លោក ត្រាំ បាន​ជំរុញ​សម​ភាគី​ចិន​ឲ្យ​ជួប​ជាមួយ​ក្រុមបាតុករ​។​

​ចំណែក​ទីប្រឹក្សា​សន្តិសុខ​ជាតិ​អាមេរិក លោក​ច​ន ប៊ុល​តុ​ន​បាន​ព្រមាន​ក្រុង​ប៉េកាំង ប្រឆាំងនឹង​ការប្រើ​វិធានការ​បង្ក្រាប​លើ​ក្រុមបាតុករ​នៅ​ហុងកុង ដូច​អ្វីដែល​ចិន​ធ្លាប់​ចាត់វិធានការ​បង្ក្រាប​យ៉ាង​សាហាវ ទៅលើ​ក្រុមបាតុករ​នៅ​ទីលាន​ធាន​អាន​មេន​ក្នុង​ក្រុង​ប៉េកាំង​កាលពី​ឆ្នាំ​១៩៨៩​។ ឆ្លើយតប​នឹង​ការលើកឡើង​របស់លោក​ច​ន ប៊ុល​តុ​ន ទីភ្នាក់ងារសារព័ត៌មាន​រដ្ឋ​ចិន​បាន​ចុះផ្សាយ​ដោយ​បង្ហាញ​ការប្តេជ្ញាចិត្តថា នឹងមិន​មានរឿង​ដដែលៗ​កើតឡើង​ជាថ្មី ដូច​នៅ​ទីលាន​ធាន​អាន​មេន​នោះទេ​៕

ព័ត៌មានផ្សេងទៀត