កម្ពុជា​ជា​ប្រទេស​នាំចេញ​កង់​ធំ​លំដាប់​ទី​២​លើ​ពិភពលោក​

21-08-2019 12:02 pm 187
  ស្តាប់
ស្តាប់ជាសំឡេង

​កម្ពុជា គឺជា​ប្រទេស​នាំចេញ​កង់​ធំ​បំផុត​លំដាប់​ទី​២ ក្នុង​ពិភពលោក​ទៅ​កាន់​ទីផ្សារ​អឺរ៉ុប ប៉ុន្តែ​សម្ភារៈ និង​គ្រឿង​បង្គុំ​មួយចំនួន ត្រូវ​នាំចូល​ពី​ប្រទេស​ក្នុង​តំបន់​។ រដ្ឋមន្ត្រី​ក្រសួង​ពាណិជ្ជកម្ម​លោក​ប៉ាន សូរ​ស័ក្តិ ក៏​បាន​ស្នើ​ឯកអគ្គរាជទូត​វិសាមញ្ញ និង​ពេញ​សមត្ថភាព​ជប៉ុន ប្រចាំ​នៅ​កម្ពុជា លោក ហូ​រីណូ​អូជិ ហ៊ី​ដេ​ហ៊ី​ហ្សា (Horinouchi Hidehisa)​ដែល​ចប់​អាណត្តិ​នៅ​កម្ពុជា  ជួយ​កៀងគរ​វិនិយោគិន​ពី​ប្រទេស​ជប៉ុន មក​បណ្តាក់ទុន​លើ​ការផលិត​គ្រឿង​បង្គុំ និង​សម្ភារ​ទោចក្រយាន ដើម្បី​លើកស្ទួយ​ឧស្សាហកម្ម​កម្មន្តសាល និង​ពង្រីក​ការនាំចេញ​ផលិតផល​សម្រេច​ទៅ​កាន់​ទីផ្សារ​អន្តរជាតិ បន្ថែមទៀត​។ 

«​កម្ពុជា គឺជា​ប្រទេស​នាំចេញ​កង់​ធំ​បំផុត​លំដាប់​ទី​២ ក្នុង​ពិភពលោក ទៅ​កាន់​ទីផ្សារ​អឺរ៉ុប ប៉ុន្តែ​សម្ភារៈ និង​គ្រឿង​បង្គុំ​មួយចំនួន ត្រូវ​នាំចូល​ពី​ប្រទេស​ក្នុង​តំបន់​។ ដូច្នេះ​បើ​សិន​មាន​ក្រុមហ៊ុន​ផលិត​កង់​ដូចជា Shimano មក​វិនិយោគ​លើ​ឧស្សាហកម្ម​នេះ គឺ​ពិត​ជា​ការប្រសើរ ពីព្រោះ​កម្ពុជា​កំពុង​ប្រែក្លាយ​ពី​ប្រទេស​ប្រើប្រាស់​កម្លាំង ទៅ​ជា​ប្រើប្រាស់​ជំនាញ ដើម្បី​ជំរុញ​ការធ្វើ​ពិពិធ​កម្ម​កំណើនសេដ្ឋកិច្ច ដូច​បាន​កំណត់​នៅក្នុង​គោលនយោបាយ​អភិវឌ្ឍន៍​ឧស្សាហកម្ម​កម្ពុជា ឆ្នាំ​២០១៥-២០២៥»​។ នេះ​ជា​ប្រសាសន៍​របស់​លោក ប៉ាន់ សូរ​ស័ក្ត រដ្ឋមន្ត្រី​ក្រសួង​ពាណិជ្ជកម្ម នៅក្នុង​ជំនួប​ពិភាក្សា​ជាមួយ​ឯកអគ្គរាជទូត​ជប៉ុន ដែល​បាន​ចប់​អាណត្តិ​កាល​ពី​ថ្ងៃទី​២០ ខែ​សីហា ឆ្នាំ​២០១៩​។​

​លោក​រដ្ឋមន្ត្រី ក៏​បាន​ថ្លែងអំណរគុណ​ដល់​លោក ឯកអគ្គរាជទូត និង​រដ្ឋាភិបាល​ជប៉ុន ដែល​បាន​ផ្តល់​ជំនួយឥតសំណង​យ៉ាងច្រើន​សន្ធឹកសន្ធាប់​ដល់​កម្ពុជា ដើម្បី​កសាង​លទ្ធិប្រជាធិបតេយ្យ និង​អភិវឌ្ឍន៍​សង្គម​សេដ្ឋកិច្ច​។ ទន្ទឹមនឹងនេះ លោក​រដ្ឋមន្ត្រី ក៏​បាន​ស្នើ​ភាគី​ជប៉ុន បន្ត​ជួយ​គាំទ្រ​ការអភិវឌ្ឍ​កម្ពុជា​ថែមទៀត រាប់​តាំងពី​វិស័យ​អប់រំ ហេដ្ឋារចនាសម្ព័ន្ធ សុខាភិបាល កសិកម្ម និង​អភិវឌ្ឍន៍​ជនបទ​។​

​ជា​ការឆ្លើយតប លោក ហូ​រីណូ​អូជិ ហ៊ី​ដេ​អ៊ី​ហ្សា បាន​សម្តែង​សេចក្តី​សោមន្ស ចំពោះ​វឌ្ឍនភាព​ទំនាក់ទំនង និង​កិច្ចសហប្រតិបត្តិការ​គ្រប់​វិស័យ​រវាង​កម្ពុជា​-​ជប៉ុន និង កំណែទម្រង់ ដែល​បាន​ដាក់ចេញ​ដោយ​រាជរដ្ឋាភិបាល​កម្ពុជា ដើម្បី​ជួយ​សម្រួល​ការធ្វើ​ធុរកិច្ច​របស់​វិនិយោគិន​ជប៉ុន ជាពិសេស​ការនាំ​ចូល​ទំនិញ​នៅ​តាម​មាត់​ច្រក​ព្រំដែន​។​

​លោក ឯកអគ្គរាជទូត ក៏​បាន​សន្យា​បន្ត​ជួយ​គាំទ្រ​ការអភិវឌ្ឍ​សេដ្ឋកិច្ច​កម្ពុជា តាមរយៈ​ការជំរុញ​វិនិយោគិន​ជប៉ុន ឱ្យ​ចូលមក​បណ្តាក់ទុន​កាន់​ច្រើន​ថែមទៀត ដើម្បី​បង្កើត​ការងារ​ជូន​ប្រជាជន និង​ចូលរួម​កាត់បន្ថយ​ភាពក្រីក្រ​៕

ព័ត៌មានផ្សេងទៀត