តុលាការ​សម្រេច​ចោទប្រកាន់​មន្ត្រី​សុរិយោដី​ខេត្ត​ពោធិ៍​ទាំង​៣​នាក់​ចំនួន​៣​បទល្មើស​

31-07-2019 3:48 pm 749
  ស្តាប់
ស្តាប់ជាសំឡេង

​ព្រះរាជអាជ្ញារង នៃ​តំណាង​អយ្យការ​អម​សាលាដំបូង​រាជធានី​ភ្នំពេញ បានសម្រេច​ចោទប្រកាន់​ប្រធាន អនុប្រធាន និង​មន្ត្រី​សុរិយោដី​ខេត្ត​ពោធិ៍សាត់​ទាំង ៣​នាក់ ដែល​ពាក់ព័ន្ធ​នឹង​អំពើពុករលួយ​ចំនួន ៣​បទល្មើស​។

​ក្រោយ​បញ្ចប់​ការសួរនាំ តំណាង​អយ្យការ​អម​សាលាដំបូង​រាជធានី​ភ្នំពេញ នៅ​ថ្ងៃ​ទី​៣១ ខែកក្កដា​នេះ បានសម្រេច​ចោទប្រកាន់ មន្ត្រី​សុរិយោដី​ទាំង ៣​នាក់​នេះ ចំនួន​៣​បទល្មើស​រួមមាន​៖ ទី​១៖ បទ​វិតិក្រម តាម​ក្រម​ព្រហ្មទណ្ឌ​, ទី​២៖ បទ​រំលោភ​អំណាច តាម​ច្បាប់​ស្ដីពី​ការប្រឆាំង​អំពើ​ពុករលួយ និង​ទី​៣៖ បទ​សម្អាត​ប្រាក់ តាម​ច្បាប់​ស្ដីពី​ការប្រឆាំង​ការសម្អាត​ប្រាក់ និង​ហិរញ្ញវត្ថុ​។​

​ប្រធាន អនុប្រធាន និង​មន្ត្រី​មន្ទីរ​សុរិយោដី​ខេត្តពោធិ៍សាត់​ទាំង​៣​រូប ដែល​ត្រូវបាន​តុលាការ​ចោទប្រកាន់​ចំនួន​៣​បទល្មើស​នេះ​រួមមាន​៖

១៖ ឈ្មោះ លៀម ប៊ុន​រឿន ប្រធាន​មន្ទីរ​សុរិយោដី​ខេត្ត​ពោធិ៍សាត់​

២៖ ឈ្មោះ ជាង វុទ្ធី អនុប្រធាន​មន្ទីរ​ទទួល​ការងារ​សំណង់​

៣៖ ឈ្មោះ តែ ប៊ុនថេង មន្ត្រី​សុរិយោដី​ខេត្ត​ទទួលបន្ទុក​ច្រក​។​

​សូមបញ្ជាក់​ថា មន្ត្រី​សុរិយោដី​ខេត្តពោធិ៍សាត់​ទាំង​៣​រូប ត្រូវបាន​បញ្ជូន​ទៅកាន់ សាលាដំបូង​រាជធានី​ភ្នំពេញ នៅ​រសៀល​ថ្ងៃ​ទី​៣០ ខែកក្កដា បន្ទាប់​ពី​អង្គភាព​ប្រឆាំង​អំពើពុករលួយ បាន​ឃាត់ខ្លួន កាលពី​ថ្ងៃ​ទី​២៧ ខែកក្កដា ដោយ​សង្ស័យ​ប្រព្រឹត្ត​អំពើពុករលួយ គប់គិត​ទារលុយ​ពី​ម្ចាស់​ដី ដោយ​ខុសច្បាប់​ចំនួន ១០​ម៉ឺន​ដុល្លារ​ជា​ថ្នូរ​ចេញ​ច្បាប់​សាងសង់​។ ការចុះ​ទៅ​ឃាត់ខ្លួន​នេះ ដឹកនាំ​ដោយ​លោក ឱម យ៉ិនទៀង ប្រធាន​អង្គភាព​ប្រឆាំង​អំពើពុករលួយ​៕

ព័ត៌មានផ្សេងទៀត