អ៊ីរ៉ង់​​និង​ប្រទេស​​មហាអំណាច​​បើក​កិច្ចពិភាក្សា​​បន្ទាន់​​មួយ​ស្ដីពី​​កិច្ចព្រមព្រៀង​​នុយក្លេអ៊ែ​រ​

29-07-2019 4:25 pm 377
រូបភាពក្នុងកិច្ចប្រជុំបន្ទាន់មួយ

​អ៊ីរ៉ង់​និង​ប្រទេស​ហត្ថលេខី​ក្នុង​កិច្ចព្រមព្រៀង​នុយក្លេអ៊ែរ​អ៊ីរ៉ង់​ចុះ​ឆ្នាំ​២០១៥ បានរៀបចំ​កិច្ចពិភាក្សា​ថ្នាក់​អនុរដ្ឋមន្ដ្រី ដើម្បី​ជា​កិច្ចប្រឹងប្រែង​ជួយសង្គ្រោះ​កិច្ចព្រមព្រៀង​។ មន្ដ្រីជាន់ខ្ពស់​មកពី​ប្រទេស​អ៊ីរ៉ង់ អង់គ្លេស បារាំង អាល្លឺម៉ង់ និង​ប្រទេស​ផ្សេងទៀត បាន​ជួបគ្នា​ក្នុង​ទីក្រុង​វី​យែន​ប្រទេស​អូទ្រីស​កាលពី​ថ្ងៃអាទិត្យ សម្រាប់​កិច្ចពិភាក្សា​បន្ទាន់​មួយ​។​

​បន្ទាប់ពី​កិច្ចប្រជុំ​កាលពី​ថ្ងៃអាទិត្យ អនុ​រដ្ឋមន្ដ្រីការបរទេស​អ៊ីរ៉ង់​បាន​និយាយថា ស្ថានភាព​ក្នុង​កិច្ចប្រជុំ​គឺ​ល្អប្រសើ​រណាស់ ប៉ុន្ដែ​មិនអាច​ដោះស្រាយបាន​គ្រប់​រឿង​ទេ​។ លោក​បញ្ជាក់​ពី​គោលបំណង​នឹង​រៀបចំ​កិច្ចប្រជុំ​ថ្នាក់​រដ្ឋមន្ដ្រី​ក្នុងពេល​ឆាប់ៗ​។​

​សូមបញ្ជាក់ថា ការព្រួយបារម្ភ​បាន​កើតឡើង​ជុំវិញ​ការ​រស់​ឡើងវិញ​នៃ​កិច្ចព្រមព្រៀង​នុយក្លេអ៊ែរ​អ៊ីរ៉ង់ ក្រោយ​អ៊ីរ៉ង់​កាលពីដើម​ខែកក្កដា​នេះ បាន​បង្កើន​ការ​ចម្រាញ់​សារធាតុ​អ៊ុយ​រ៉ា​ញ៉ូម​ឡើងវិញ លើស​កម្រិត​ដែល​កិច្ចព្រមព្រៀង​បានកំណត់​។ អ៊ីរ៉ង់​ធ្លាប់​ត្អូញត្អែ​ថា​ខ្លួន​មិនបាន​ទទួល​ផលប្រយោជន៍​ផ្នែក​សេដ្ឋកិច្ច ដូច​អ្វីដែល​បាន​សន្យា​ក្នុង​កិច្ចព្រមព្រៀង​ចុះ​ឆ្នាំ​២០១៥​ទេ​។ អ៊ីរ៉ង់​បន្ទោស​ថា​ករណីនេះ​ដោយសារតែ​សហរដ្ឋអាមេរិក ដកខ្លួន​ចេញពី​កិច្ចព្រមព្រៀង​កាលពី​ខែឧសភា​ឆ្នាំ​២០១៨៕

ព័ត៌មានផ្សេងទៀត