​NGO៖​​​ការ​បំបៅ​ដោះកូន​​ដោយ​ម្សៅ​ទឹកដោះគោ​​ជួប​ហា​នី​ភ័យ​ខ្ពស់​ដល់​ទារក​​

27-07-2019 10:50 am 502
  ស្តាប់
ស្តាប់ជាសំឡេង

អង្គការ​សង្គម​ស៊ីវិល ដែល​ធ្វើ​ការស្រាវជ្រាវ​ខាង​ផ្នែក​បំបៅ​ដោះ​កូននៅ​កម្ពុជា បានឱ្យដឹងថា ការ​បំបៅ​ដោះកូន​ដោយ​ម្សៅ​ទឹកដោះគោ ជួប​ហា​នី​ភ័យ​ខ្ពស់ជាង​ការ​បំបៅ​ដោះ​កូន​ដោយ​ទឹកដោះ​ម្ដាយ ហើយ​អង្គការ​សង្គម​ស៊ីវិល​ទាំងនេះ បាន​ជំរុញ​ឱ្យ​ប្រព័ន្ធ​ផ្សព្វផ្សាយ​នៅ​កម្ពុជា ជួយ​ផ្សព្វផ្សាយ​ពី​ផលប៉ះពាល់​ដោយ​ការ​បំបៅ​ដោះ​កូន​ដោយ​ម្សៅ​ទឹកដោះគោ​ផងដែរ។

​ការ​បំបៅកូន​ដោយ​ទឹកដោះ​ម្ដាយ ពិតជា​មាន​សារសំខាន់​ណាស់​សម្រាប់​ទារក​តូចៗ ដែល​ទើបតែ​ប្រសូត្រ​ឡើង​រហូតដល់​រយៈពេល​៦​ខែ​។ ផ្ទុយទៅវិញ​ប្រសិនបើ​ការ​បំបៅ​ដោះកូន ដោយ​ប្រើ​ម្សៅ​ទឹកដោះគោ ទារក​តូចៗ​ដែល​ទើបតែ​ប្រសូត្រ​នឹង​ជួប​ហា​នី​ភ័យ​ខ្ពស់ រហូត​ឈានដល់​បាត់បង់​ជីវិត​ទៀតផង​។ នេះ​បើ​ការបញ្ជាក់​ពី​អង្គការ​សង្គម​ស៊ីវិល ដែលស្រាវ​ជ្រាវ​លើ​ផ្មែក​ការ​បំបៅដោះកូន​ នៅក្នុង​សិក្ខាសាលា​ជាមួយ​អ្នកសារព័ត៌មាន ដែល​ប្រព្រឹត្តធ្វើ​រយៈពេល​ពីរ​ថ្ងៃ ពោលគឺ​ចាប់ពី​ថ្ងៃទី​២៥-២៦ ខែកក្កដា ឆ្នាំ​២០១៩​។​

​លោក ហ៊ូ ក្រើន នាយក​ប្រចាំ​ប្រទេស​នៃ​អង្គការ ហេឡែន ខេ​ល​ល័​រ អន្តរជាតិ មានប្រសាសន៍ថា ការ​បំបៅកូន​ដោយ​ទឹកដោះ​ម្ដាយ ពិតជា​មាន​សារសំខាន់​ណាស់​សម្រាប់​ទារក​តូចៗ ព្រោះ​វា​អាច​ផ្ដល់​អាហារូបត្ថម្ភ​គ្រប់គ្រាន់​ទៅដល់​ទារក​នោះ និង​ធ្វើឱ្យ​ទារក​មាន​ប្រព័ន្ធ​ការពារ​ជំងឺ​ផ្សេងៗ (​អង់ទីគ័​រ​) ជាង​ទារក ដែល​បំបៅ​ដោយ​ម្សៅ​ទឹកដោះគោ​។ លោក​ក្រើន បាន​អះអាងថា ការ​បំបៅ​ដោះកូន​ដោយ​ម្សៅ​ទឹកដោះគោ ធ្វើឱ្យ​ទារក​នោះ​ងាយ​រងគ្រោះ​ជាង​ការ​បំបៅ​ដោះកូនដោយ​ទឹកដោះ​ម្ដាយ ដោយសារ​កង្វះ​អាហារូបត្ថម្ភ ធ្វើឱ្យ​ប្រព័ន្ធការ​ពារ​របស់​ទារក មិនអាច​ការពារ និង​ទប់ទល់​នូវ​ការ​រាតត្បាត​ជំងឺ​ផ្សេងៗ​……………

​សំឡេង​៖

​នាយក​ប្រចាំ​ប្រទេស​នៃ​អង្គការ ហេឡែន ខេ​ល​ល័​រ អន្តរជាតិ​រូបនេះ បាន​គូសបញ្ជាក់ថា ការខាតបង់​ថវិកា ដោយសារ​ការ​បំបៅ​ដោះកូន​ដោយ​ម្សៅ​ទឹកដោះគោ​នោះ គឺ​ចំណាយ​ទៅលើ​ទឹកដោះគោ ដែល​រកឃើញថា មាន​ប្រមាណ​ជិត ១១០​លាន​ដុល្លារ ការព្យាបាល​ជំងឺ​របស់​ទារក និង​ម្តាយ ដែលមាន​ប្រមាណ​ជាង​១​លាន​ដុល្លារ មរណៈភាព​របស់​ទារ​ក និង​ការខាតបង់​ធនធានមនុស្ស និង​បញ្ហា​មួយចំនួនទៀត​។ 

​លោក ហ៊ូ ក្រើន បន្តថា ការ​បំបៅកូន​ដោយ​ទឹកដោះ​ម្តាយ គឺជា​ការវិនិយោគ​ដ៏​ប្រសើរ​បំផុត ដើម្បី​កាត់បន្ថយ​បញ្ហា​កង្វះ​អាហារូបត្ថម្ភ​កុមារ​។ ប៉ុន្តែ​រយៈពេល​ប៉ុន្មាន​ឆ្នាំ​ចុងក្រោយ​នេះ ការ​បំបៅ​ដោះកូន​ដោយ​ទឹកដោះ​ម្ដាយ​មាន​ការធ្លាក់ចុះ។ លោក​បាន​អះអាងថា តាមរយៈ​ការស្រាវជ្រាវ បាន​រកឃើញថា ការ​បំបៅកូន​ដោយ​ទឹកដោះ​ម្ដាយ បាន​ធ្លាក់ចុះ​ពី​ចំនួន ៧៣.៥​ភាគរយ​នៅ​ឆ្នាំ​២០១០ មកដល់​ចំនួន ៦៤.៦​ភាគរយ​នៅ​ឆ្នាំ​២០១៤​កន្លងមក​។ លោក​បន្ថែមថា ដោយឡែក តួលេខ​នៃ​ការ​បំបៅ​ទារក​ដោយ​ដប​ទឹកដោះគោ បាន​កើនឡើង​ឆាប់រហ័ស​ពី​ចំនួន ១១.៨​ភាគរយ​នៅ​ឆ្នាំ​២០០៥ ដល់​ចំនួន ២៤.៧​ភាគរយ​នៅ​ឆ្នាំ​២០១០ ហើយ​កើនឡើង​ដល់​ចំនួន​ជាង ៣០​ភាគរយ​នៅ​ឆ្នាំ​២០១៤​។ 

​លោក​បាន​ពន្យល់ថា ការ​ចុះថយ​នៃ​ការបំ​បៅដោះ​ម្តាយ​នេះ ដោយសារការចុះ​ខ្សោយ​នៃ​ការអនុវត្ត​អនុក្រឹត​លេខ​១៣៣ នៅមានកម្រិត ការរីក​រាលដាល​នៃ​ការផ្សព្វផ្សាយ​លក់​ផលិតផល​ជំនួស​ទឹកដោះ​ម្តាយ កង្វះខាត​ចំណេះដឹង​អំពី​ការ​បំបៅ​ទឹកដោះ​ម្តាយ ខ្វះខាត​ការគាំទ្រ​ពី​សមាជិកគ្រួសារ និង​សង្គម ច្បាប់​លំហែ​មាតុភាព​នៅមានកម្រិត និង​ខ្វះខាត​ការគាំទ្រ​នៅ​កន្លែងធ្វើការ ព្រមទាំង​ការ​ចំណាកស្រុក​ដើម្បី​ស្វែងរក​ឱកាស​ការងារ​។​

​របាយការណ៍​ស្រាវជ្រាវ​រួមមួយ​ដែល​ត្រូវបាន​ធ្វើឡើង​រួមគ្នា​ដោយ​អង្គការ​ទស្សនៈ​ពិភពលោក និង​អង្គការ Helen Keller អន្តរជាតិ​កាលពី​ឆ្នាំ​២០១៨ កន្លងមក បាន​រកឃើញថា ៩៨​ភាគរយ នៃ​ផលិតផល​ម្សៅ​ទឹកដោះគោ បាន​រំលោភ​លើអនុ​ក្រឹត​លេខ​១៣៣ របស់​រដ្ឋាភិបាល​កម្ពុ​ជា ដូចជា ពុំមាន​សារ​ជា​ភាសា​ខ្មែរ​ពេញលេញ ពុំមាន​សារ​លើកកម្ពស់​គុណ​តម្លៃ​ទឹកដោះ​ម្ដាយ និង​ពុំមាន​សារ​ព្រមាន​ពី​គ្រោះថ្នាក់​នៃ​ការ​បំបៅកូន​ដោយ​ម្សៅ​ទឹកដោះគោ​នោះឡើយ​។​

​របាយការណ៍​អង្គការ​សុខភាព​ពិភពលោក បាន​រកឃើញថា ការ​បំបៅ​ទារក​ដោយ​ម្សៅ​ទឹកដោះគោ បានធ្វើឲ្យ​ខាតបង់​ថវិកា​ដល់ទៅ ៣៤១​ពាន់​លាន​ដុល្លារ​នៅ​ទូទាំង​ពិភពលោក​ក្នុង​មួយឆ្នាំៗ​។ អង្គការ​សុខភាព​ពិភពលោក បាន​ឲ្យដឹងទៀតថា ការ​បំបៅ​ទារក​ដោយ​ទឹកដោះ​ម្ដាយ អាច​ជួយសង្គ្រោះ​ជីវិត​មនុស្ស​ជាង ៨២​ម៉ឺន​នាក់ និង​ជួយសង្គ្រោះ​ស្ត្រី​ដល់​ទៅ ២​ម៉ឺន​នាក់ ពី​ជំងឺមហារីក​សុដន់​ក្នុង​មួយឆ្នាំៗ​។ អង្គការ​មួយ​នេះ បានលើកឡើង​ទៀតថា ការ​បំបៅ​ទារក​ដោយ​ទឹកដោះ​ម្ដាយ ក៏​ជួយ​ដល់​ដំណើរ​លូតលាស់​រាង្គ​កាយ និង​បញ្ញា​របស់​កុមារ ហើយ​វា​ពាក់ព័ន្ធ​យ៉ាងខ្ពស់​ទៅនឹង​លទ្ធផល​សិក្សា និង​សមត្ថភាព​របស់​ក្មេង​នា​ពេលអនាគត​ផងដែរ​៕

ព័ត៌មានផ្សេងទៀត