អង់គ្លេស​​លុបចោល​​ជើងហោះហើរ​​ទៅ​អេ​ហ្ស៊ី​ប​ដោយសារ​​បញ្ហា​សុវត្ថិភាព​

21-07-2019 2:15 pm 260
រូបភាពអ្នកដំណើរនៅអាកាសយានដ្ឋានក្នុងក្រុងឡុងដ៍ប្រទេសអង់គ្លេស

​ក្រុមហ៊ុន​អាកាសចរណ៍​អង់គ្លេស​British Airways បាន​លុបចោល​ជើងហោះហើរ​ទាំង​អស់ពី​ទីក្រុង​ឡុង​ដ៍ ទៅកាន់​ទីក្រុង​គែរ​នៃ​ប្រទេស​អេ​ហ្ស៊ី​បរយៈពេល​មួយ​សប្ដាហ៍​ពេញ​។ អ្នកដំណើរ​ដែល​គ្រោង​នឹង​ធ្វើដំណើរ​តាម​យន្ដហោះ​ទៅ​ទីក្រុង​គែរ ត្រូវបាន​ជូនដំណឹង​ថា​ការហោះហើរ​របស់​ពួកគេ​ត្រូវបាន​លុបចោល ដែល​គ្មាន​ជម្រើស​ផ្សេង​ឡើយ​ក្រៅពី​រង់ចាំ​រយៈពេល​មួយ​សប្ដាហ៍​។ ពាក់ព័ន្ធ​នឹង​ការលុបចោល​ជើងហោះហើរ​បណ្ដោះអាសន្ន​នេះ ជា​ការប្រុងប្រយ័ត្ន​លើ​បញ្ហា​សុវត្ថិភាព ប៉ុន្ដែ​ក្រុមហ៊ុន​មិនបាន​ផ្ដល់ព័ត៌មាន​លម្អិត​ទេ​។ 

​អ្នកនាំពាក្យ​ក្រុមហ៊ុន​អាកាសចរណ៍​ក្រុង​គែរ​ប្រទេស​អេ​ហ្ស៊ី​ប បាន​ប្រាប់​អ្នកសារព័ត៌មាន​ថា​ខាង​អាកាសយានដ្ឋាន មិនបាន​ទទួល​ការជូនដំណឹង​ជាមុន​ពី​ក្រុមហ៊ុន​BA​ទាក់ទង​នឹង​ការផ្លាស់ប្ដូរ​នេះ​ទេ​។ ចំណែក​អ្នកនាំពាក្យ​ក្រុមហ៊ុន​BA​បាន​និយាយថា ក្រុមហ៊ុន​តែងតែ​ពិនិត្យឡើងវិញ​ពី​ការរៀបចំ​សន្ដិសុខ ដូច្នេះ​ក្រុមហ៊ុន​ត្រូវ​ផ្អាក​ជើងហោះហើរ​មួយ​សប្ដាហ៍​សិន​។ សុវត្ថិភាព​និង​សន្ដិសុខ​របស់​អតិថិជន​និង​បុគ្គលិក​នៅលើ​យន្ដហោះ គឺជា​រឿង​អាទិភាព​បំផុត ហើយ​ក្រុមហ៊ុន​នឹងមិន​អនុញ្ញាតឲ្យ​មាន​ការហោះ​ហើរ​ឡើយ លុះត្រាតែ​មាន​សុវត្ថិភាព​គ្រប់គ្រាន់​៕

ព័ត៌មានផ្សេងទៀត