តួ​ក​គី​ចាត់ទុក​ការ​សម្រេចចិត្ដ​​របស់​អាមេរិក​ជា​រឿង​​អយុត្ដិធម៌​បំផុត​

19-07-2019 8:49 am 812

​មួយថ្ងៃ​បន្ទាប់ពី​អាមេរិក​សម្រេចចិត្ដនឹង​ដកតួក​គី​ចេញ​ពីកម្ម​វិធី​យន្ដហោះ​ចម្បាំង​F-35 ជា​កម្មវិធី​មួយ​ដឹកនាំ​ដោយ​អាមេរិក​ផ្ទាល់ តួ​ក​គី​កាលពី​ថ្ងៃទី​១៨​កក្កដា​បាន​លើកឡើងថា អាមេរិក​ធ្វើ​ដូច្នេះ​គឺ​ប្រឆាំងនឹង​ស្មារតី​សម្ព័ន្ធមិត្ដ​ហើយ​។ រដ្ឋាភិបាល​តួ​ក​គី​ក៏​ប្រកាស​ឲ្យ​ប្រទេស​សមាជិក​ណា​តូ​ទាំងអស់ បដិសេធ​ការសម្រេចចិត្ដ​របស់​សហរដ្ឋអាមេរិក​។ 

​ការខ្វែងគំនិត​ជាមួយ​ប្រទេស​សម្ព័ន្ធ​ដ៏​យូរអង្វែង​មួយ​នេះ កើតឡើង​ក្រោយពេល​រដ្ឋាភិបាល​លោក​ដូណាល់ ត្រាំ បាន​ព្រមាន​និង​ទុកពេល​ឲ្យ​តួ​ក​គី​យូរ​គួរសម ដើម្បី​លុបចោល​ផែនការ​ទិញ​ប្រព័ន្ធ​ការពារ​មី​ស៊ី​ល​S-400​ពី​រុស្ស៊ី ប៉ុន្ដែ​តួ​ក​គី​មិនបាន​ធ្វើតាម​ការស្នើសុំរ​បស់​អាមេរិក​ទេ​។ មិនតែប៉ុណ្ណោះ​តួ​ក​គី​បាន​ទាំង​ទទួល​សម្ភារ​សម្រាប់​ដំឡើង​ប្រព័ន្ធ​ការពារ​មី​ស៊ី​ល ដែល​ដឹក​ទៅដល់​តួ​ក​គី​ជា​លើកដំបូង​កាលពី​សប្ដាហ៍​មុន​ទៀត ជាហេតុ​ធ្វើឲ្យ​អាមេរិកខឹង​កាន់តែខ្លាំ​ង​។​

​ដូច​បាន​អះអាង​ហើយ​ថា​ប្រព័ន្ធ​ការពារ​មី​ស៊ី​ល​S-400 មិនត្រូវ​គ្នា​នឹង​យន្ដហោះ​ចម្បាំង​អាមេរិក​F-35 ទើប​អាមេរិក​សម្រេច​ត្រូវតែ​ដក​តួ​ក​គី​ចេញពី​កម្មវិធី​យន្ដហោះ​ចម្បាំង​នេះ​។ អាមេរិក​ចាត់ទុក​ប្រព័ន្ធ​ការពារ​មី​ស៊ី​ល​S-400 ជា​ឧបករណ៍​ជំនួយ​ដល់​ការ​ស៊ើបការណ៍​របស់​រុស្ស៊ី អាច​លួច​យក​ទិន្នន័យ​នៃ​យន្ដហោះ​ចម្បាំង​F-35​។ អ៊ីចឹង​ទេ​ដាច់ខាត​ត្រូវតែ​ដក​តួ​ក​គី​ចេញ​ឲ្យ​ខាន​តែ​បាន កុំឲ្យ​ប៉ះពាល់​ដល់​កម្មវិធី​យន្ដហោះច​ម្បាំង​ដ៏​ទំនើប​បំផុត​ក្នុង​លោក​របស់​អាមេរិក​។​

​ប៉ុន្ដែ​សម្រាប់​តួ​ក​គី​ចាត់ទុក​ទង្វើ​នេះ​ជា​រឿង​មិន​យុត្ដិធម៌ ហើយក៏​ចេញ​សេចក្ដីថ្លែការណ៍​មួយ​ទាត់ចោ​លភ្លាមៗ​។ ក្រសួងការបរទេស​តួ​ក​គី​បានបញ្ជាក់​ក្នុង​សេចក្ដីថ្លែងការណ៍​ថា ជំហាន​ធ្វើ​ឡើងជា​ឯកតោភាគី​ដូច្នេះ មិន​គោរព​ទៅតាម​ស្មារតី​សម្ព័ន្ធភាព​ឡើយ ហើយក៏​គ្មាន​ឈរលើ​មូលដ្ឋាន​ស្របច្បាប់​ណាមួយ​ដែរ​។ វា​មិន​ត្រឹមតែ​ជា​រឿង​អ​យុត្ដិធម៌​សម្រាប់​តួ​ក​គី ហើយ​ការដែល​អាមេរិក​អះអាងថា​ប្រព័ន្ធ​ការពារ​មី​ស៊ី​ល​S-400 អា​ធ្វើឲ្យ​ចុះខ្សោយ​សមត្ថភាព​យន្ដហោះ​F-35 ក៏​ជា​រឿង​មិន​សម​ហេតុផល​ទៀត​។ តួ​ក​គី​សូម​អំពាវនាវ​ដល់​សហ​រដ្ឋ​អាមេរិកឲ្យ​ត្រឡប់មក​ដើរផ្លូវ​ត្រូវ​វិញ កុំ​បង្កកំហុស​តទៅទៀត​ព្រោះ​នឹង​បំផ្លាញ​ដល់​យុទ្ធសាស្ដ្រ​ទំនាក់ទំនង​ប្រទេស​ទាំងពីរ​៕

ព័ត៌មានផ្សេងទៀត