ប៉ា​គី​ស្ថាន​បើក​ផ្លូវអាកាស​ឡើងវិញ ក្រោយ​ផ្អាក​ដោយសារ​ផ្ទុះ​ជម្លោះ​ជាមួយ​ឥណ្ឌា​

16-07-2019 3:43 pm 183

​នៅ​ថ្ងៃទី​១៦​ខែកក្កដា​ឆ្នាំ​២០១៩​នេះ ប៉ា​គី​ស្ថាន​បាន​ជូនដំណឹង អំពី ការបើក​ដំណើរការ​ផ្លូវអាកាស ស្ថិតនៅ​ប៉ែក​ខាងកើត​ប្រទេស អូសបន្លាយ​តាម​បណ្តោយ​ព្រំដែន​ឥណ្ឌា​និង​ប៉ា​គី​ស្ថាន ឡើងវិញ ក្រោយ​ផ្អាក​អស់​រយៈពេល​ជិត​៥​ខែ​។ នៅ​ក្នុងនោះ គេ​នឹង​អនុញ្ញាតឲ្យ​ជើងហោះហើរ​ស៊ីវិល​ទាំងអស់ អាចធ្វើ​ចរាចរណ៍​បាន​ជាធម្មតា​។ ប៉ា​គី​ស្ថាន​បាន​បិទ មិនឲ្យ​ធ្វើចរាចរណ៍​ផ្លូវអាកា​ស​បណ្តោះអាសន្ន កាលពី​ថ្ងៃទី​២៦​ខែកុម្ភៈ​ឆ្នាំ​២០១៩ នៅពេល​ផ្ទុះ​ជម្លោះ​ជាមួយ​ប្រទេស​ឥណ្ឌា នៅ​តំបន់​ព្រំដែន​ប៉ា​គី​ស្ថាន​-​ឥណ្ឌា​។

​ឥណ្ឌា​បាន​បើក​ការវាយប្រហារ​ក្នុង​ដែនដី​ប៉ា​គី​ស្ថាន ដោយ​ផ្តោតលើ​គោលដៅ​ក្រុម​សកម្ម​ប្រយុទ្ធ ដើម្បី​សងសឹក ចំពោះ​ការ​បំផ្ទុះ​គ្រាប់បែក​អត្តឃាត នៅ​តំបន់​កា​ស្មៀគ្រប់គ្រង​ដោយ​ឥណ្ឌា បាន​ផ្តាច់ជីវិត​ទាហាន​ឥណ្ឌា​ជាង​៤០​នាក់​។ ឥណ្ឌា​ចោទ​ប៉ា​គី​ស្ថាន​ថា បានផ្តល់​ជម្រក​ឲ្យ​ក្រុម​សកម្មប្រយុទ្ធ​ស្នាក់នៅ ហើយ​ក្រុម​សកម្មប្រយុទ្ធ​នេះ តែងតែ​លួច​ឆ្លង​ព្រំដែន មក​វាយប្រហារ​លើ​ឥណ្ឌា​ជារឿយៗ​។ ឥណ្ឌា​និង​ប៉ា​គី​ស្ថាន​មិនសូវ​ត្រូវរ៉ូវ​គ្នា​ទេ គឺ​ងាយ​នឹង​ផ្ទុះ​ជម្លោះ​ជាមួយគ្នា​ណាស់ ដោយសារតែ​ប្រទេស​ទាំងពីរ​នេះ ធ្លាប់មាន​ប្រវត្ត​ឈ្លោះ​គ្នា​រឿង​ដែនដី​នៅ​តំបន់​កា​ស្មៀ​យ៉ាង​ជូរចត់​។ កា​ស្មៀ​ត្រូវបាន​ពុះ​ចែកជា​ពីរ ម្ខាង​ឥណ្ឌា​គ្រប់គ្រង​និង​ម្ខាង​ទៀត​ប៉ា​គី​ស្ថាន​គ្រប់គ្រង ចាប់តាំងពី​បញ្ចប់​ការគ្រប់គ្រង ដោយ​អាណានិគម​អង់គ្លេស​នៅ​ឆ្នាំ ១៩៤៧​។ ប៉ុន្តែ​ភាគី​ទាំងពីរ នៅតែ​បន្ត​ចោទប្រកាន់ ថា​បាន​ឈ្លានពាន​លើ​ទឹកដី​គ្នា​ទៅវិញទៅមក​៕

ព័ត៌មានផ្សេងទៀត