កម្ពុជា​ស្នើ​អង្គការ​​WTO​​និង​អង្គការ​ពាណិជ្ជកម្ម​​អន្តរជាតិ​ជួយ​គាំទ្រ​ពាណិជ្ជកម្ម​​នៅ​កម្ពុជា​​

03-07-2019 11:02 am 143
  ស្តាប់
រូបភាពពីFN
ស្តាប់ជាសំឡេង

​ក្នុង​កិច្ចប្រជុំ​ក្រុមប្រឹក្សា​ចម្រុះ​លើក​ទី​៥៣ (53rd Joint Advisory Group Meeting) ដែល​ប្រព្រឹត្តទៅ​នៅ​ទីស្នាក់ការ​អង្គការ​ពាណិជ្ជកម្ម​ពិភពលោក​នៅ​ថ្ងៃទី​០២ កក្កដា ឆ្នាំ​២០១៩ រដ្ឋមន្ត្រី​ក្រសួងពាណិជ្ជកម្ម កម្ពុជា លោក​ប៉ាន សូរ​ស័ក្តិ បាន​អំពាវនាវ​ដល់​អង្គការ​ពាណិជ្ជកម្ម​ពិភពលោក (WTO), មជ្ឈមណ្ឌល​ពាណិជ្ជកម្ម​អន្តរជាតិ និង​អង្គការ UNCTAD បន្ត​ផ្តល់ជំនួយ និង​គម្រោង​នានា ជួយ​គាំទ្រ​ដល់​វិស័យ​ពាណិជ្ជកម្ម​នៅ​កម្ពុជា ដើម្បី​ជំរុញ​ការអភិវឌ្ឍ​សេដ្ឋកិច្ច​ពាណិជ្ជកម្ម ដែល​អាច​បង្កើន​ចំណូល កាត់បន្ថយ​ភាព​ក្រ​ក្រី និង​បង្កើត​ការងារ​សម្រាប់​ពលរដ្ឋ​កម្ពុជា​។​

​សារៈសំខាន់​នៃ​កិច្ចប្រជុំ​នេះ គឺ​រាយការណ៍​ពី​សកម្មភាព​ពី​ឆ្នាំ​២០១៨ និង​ផ្តោត​សំខាន់​លើ​ទំនាក់ទំនង និង​ការរួមចំណែក​របស់​មជ្ឈមណ្ឌល​ពាណិជ្ជកម្ម​អន្តរជាតិ អង្គការ​ពាណិជ្ជកម្ម​ពិភពលោក និង​អង្គការ UNCTAD ក្នុង​ការជួយ​គាំទ្រ​ដល់​ប្រទេស​ដែលមាន​សេដ្ឋកិច្ច​តូច និង​ទន់ខ្សោយ តាមរយៈ​ការផ្តល់​គម្រោង​ជាច្រើន ដើម្បី​ជំរុញ​ការអភិវឌ្ឍ និង​ជួយ​ឲ្យសម្រេចបាន​នូវ​គោលដៅ​អភិវឌ្ឍន៍​ប្រកបដោយ​ចីរភាព​ក្នុង​ឆ្នាំ​២០៣០​។​

​ក្រុម​អង្គការ​ពាណិជ្ជកម្ម​អន្តរជាតិ​ទាំងនេះ បានបញ្ជាក់​ពី​ជំហរ​ក្នុង​បន្តសកម្មភាព និង​គម្រោង​នានា ក្នុង​ការបន្ត​ជួយ​ដល់​ប្រទេស​កំពុងអភិវឌ្ឍន៍ និង​ប្រទេស​អភិវឌ្ឍន៍​តិចតួច ដើម្បី​ជួយ​ជំរុញ​ការអភិវឌ្ឍ និង​វិស័យ​ពាណិជ្ជកម្ម តាមរយៈ​ការផ្តល់​អនុសាសន៍ និង​ការ​ផ្តល់ជំនួយ​បច្ចេកទេស និង​ហិរញ្ញវត្ថុ​ផងដែរ​។​

​លោក​ប៉ាន សូរ​ស័ក្តិ បានចាត់ទុក​ការបញ្ជាក់​ជំហរ​ខាងលើ ថា​ជា​ការចូលរួម​គាំទ្រ​ការអនុវត្ត​យុទ្ធសាស្ត្រ​សមាហរណកម្ម​ពាណិជ្ជកម្ម សម្រាប់​កម្ពុជា​កន្លងមក ក្នុងនោះ មាន​ការអភិវឌ្ឍន៍​ធនធានមនុស្ស និង​ជំនាញ ការពង្រឹង​ភាព​ប្រកួតប្រជែង​របស់​សហគ្រាស​ធុន​តូច និង​មធ្យម និង​ការជួយ​ដល់​សហគ្រាស​កម្ពុជា​មួយ​ចំនួន​ចូលរួម​ក្នុង​ពិព័រណ៍​នាំចេញ​នាំចូល​ចិន​លើក​ទី​២ នៅ​ទីក្រុង​សៀង​ហៃ ក្នុង​ឆ្នាំ​២០១៩៕

ព័ត៌មានផ្សេងទៀត