ជីវប្រវត្តិ​​សង្ខប​​សម្ដេច​ព្រះម​ហាក្សត្រី​នរោ​ត្ត​ម​មុនិនាថ ​សីហនុ​​

18-06-2019 9:13 am 1582
​ព្រះមហាក្សត្រី នរោត្តម មុនិនាថ សីហនុ ព្រះវររាជ​មាតា​ជាតិខ្មែរ ក្នុង​សេរីភាព សេចក្ដីថ្លៃថ្នូរ និង​សុភមង្គល​។​

​ថ្ងៃទី​១៨ មិថុនា​នេះ ជា​ព្រះ​រាជពិធី​ចម្រើន​ព្រះជន្ម​របស់​សម្តេច​ព្រះវររាជ​មាតា​ជាតិខ្មែរ​គម្រប់ ៨៣ យាង​ចូល ៨៤​ព្រះវស្សា​។ ប្រជារាស្ត្រ​ខ្មែរ​គ្រប់​លំដាប់ថ្នាក់​ត្រូវបាន​ឈប់សម្រាក​ដើម្បី​អបអរ​ទិវា​បុណ្យជាតិ ហើយ​ព្រះបរមរាជវាំង ក៏​ប្រារព្ធ​ពិធី​ផ្លូវ​ការថ្វាយ​ព្រះមហាក្សត្រី នរោត្តម មុនិនាថ សីហនុ ដោយមាន​នាម៉ឺន​សព្វ​មុខមន្ត្រី​ចូល​បង្គំ​គាល់​ថ្វាយព្រះពរ​។ ឆ្លៀត​ក្នុងឱកាស​នេះវិទ្យុវាយោ សូម​រម្លឹក​ពី​ព្រះរាជ​ជីវប្រវត្តិ​សង្ខេប​របស់​សម្តេចម៉ែ​៖

​ព្រះមហាក្សត្រី នរោត្តម មុនិនាថ សីហនុ មាន​ព្រះនាម​ដើម​ថា ប៉ូល​-​ម៉ូ​និក អ៊ី​ហ្ស​ហ្ស៊ី Paule Monique IZZI ប្រសូត​នៅ​ថ្ងៃទី​១៨ ខែ មិថុនា​ឆ្នាំ​១៩៣៦ នាទី​ក្រុង​សាយ​ហ្គ​ន ឬ​ហូជីមិញ​។ ព្រះបិតា​ព្រះនាម ហ្ស​ង់ ហ្វ្រង់​ស្វ័រ អ៊ី​ហ្ស​ហ្ស៊ី (Jean François Izzi) ជា​ជនជាតិ​បារាំង ដើមកំណើត​អ៊ីតាលី បាន​ទទួលមរណភាព​នៅ​សង្គ្រាមលោកលើកទី​២​។ ព្រះ​មាតា​ព្រះនាម ប៉ុម ពាង (Pomme Peang) ជា​ជនជាតិ​វៀតណាម​។​ទ្រង់មាន​ជេដ្ឋភ​គិនី ឬ​បងស្រី​ម្នាក់​នាម អាន​-​ម៉ា​រី អ៊ី​ហ្ស​ហ្ស៊ី Anne-Marie IZZI ។​

​កាលពី​នៅ​វ័យ​កុមារភាព ទ្រង់​បាន​សិក្សា​រៀនសូត្រ​នៅ​សាលាបឋមសិក្សា​ព្រះ​នរោត្តម និង មធ្យមសិក្សា នៅ​វិទ្យាល័យ​ព្រះស៊ីសុវត្ថិ និង នៅ​វិទ្យាល័យ​ដេ​កាត ក្រុងភ្នំពេញ​។​កញ្ញា​ចេះ និង ប្រើប្រាស់​ភាសា​ខ្មែរ​បារាំង និង អង់គ្លេស​។​នៅ​ចុង​ទសវត្សរ៍​ឆ្នាំ​១៩៦០ ព្រះអង្គ​ជា​ប្រធាន​កាកបាទក្រហម​ខ្មែរ ហើយ​មកដល់​បច្ចុប្បន្ន ជា​ប្រធានកិត្តិយស​កាកបាទក្រហម​កម្ពុជា​។​

​នៅ​ខែ មេសា ឆ្នាំ​១៩៥២ កញ្ញា ប៉ូល ម៉ូ​និក អ៊ី​ស៊ី បាន​រៀប​អភិសេក​ជាមួយ​ព្រះមហាក្សត្រ នរោត្តម សីហនុ ជា​លក្ខណៈ​ឯកជន ហើយ​រៀប​អភិសេក​ជា​ផ្លូវការ នៅ​ឆ្នាំ​១៩៥៥​។ ក្រោយ​រាជាភិសេក ទ្រង់មាន​បុត្រា​២​ព្រះអង្គ គឺ​ព្រះបាទ នរោត្តម សីហមុនី ជា​មហាក្សត្រ​បច្ចុប្បន្ន និង ព្រះបាទ នរោត្តម នរិន្ទ្រ​ពង្ស ដែល​បាន​សោយ​ទិវង្គត​ដោយសារ​រោគាពាធ​។​

​លុះដល់​ឆ្នាំ​១៩៩២ អ្នក​ម្នាង ម៉ូ​និក ត្រូវបាន​ព្រះករុណា​សម្ដេច​នរោត្តម សីហនុ ប្រទាន​គោរមងារ​ជា​សម្ដេចព្រះ​ជាយា​។ មួយឆ្នាំ​បន្ទាប់មក អ្នក​ម្នាង​ទទួល​គោរមងារ​ជា​សម្ដេចព្រះ​មហេសី ហើយ​នៅ​ឆ្នាំ​១៩៩៦ ទ្រង់​ទទួលបរម​ងារ​ជា សម្ដេច​ព្រះរាជអគ្គមហេសី​។ ក្រោយមកទៀត ទ្រង់​ត្រូវបាន​ថ្វាយព្រះបរ​ម​ងារ​ថា​ជា ព្រះវររាជ​មាតា​ជាតិខ្មែរ ក្នុង​សេរីភាព សេចក្ដីថ្លៃថ្នូរ និង​សុភមង្គល​។​

​គួរ​បញ្ជាក់ថា សម្តេច​ព្រះវររាជ​មាតា​ជាតិខ្មែរ ឬ សម្តេចម៉ែ ទ្រង់​ជា​មហេសី​តែមួយ​ក្នុងចំណោម​មហេសី​និង អ្នក​ម្នាង​ទាំង​៧ របស់​អតីតព្រះមហាក្សត្រ​ខ្មែរ ដែល​បានទទួល​ព្រះ​ស្រឹង្គារ ក្តីស្រឡាញ់ មេត្តា ប្រោសប្រណី​យ៉ាង​ខ្លាំងក្លា​ពី​ព្រះ​ស្វាមី​ក្នុង​រយៈពេល​ដ៏​យូរលង់​ជាង​កន្លះ​សតវត្សរ៍​កន្លងទៅនេះ​។ ព្រះអង្គ​បាន​យាង​តាម​អតីតព្រះមហាក្សត្រ​ទៅ​ស្ទើរ​គ្រប់ទិសទី​ក្នុង​គ្រប់​កាលៈទេសៈ មិន​ថា​ក្នុងសម័យ​តស៊ូ​ក្រោយ​រដ្ឋប្រហារ ១៨ មីនា ១៩៧០ សម័យ​កម្ពុជា​ប្រជាធិបតេយ្យ​ខ្មែរក្រហម សម័យ​ការតស៊ូ​ត្រីភាគី​នៅ​តំបន់​ជាយដែន​ខាងលិច ឬ​សម័យ​ព្រះរាជាណាចក្រ​កម្ពុជា​ទី​២ នោះឡើយ​។​

​នៅ​ថ្ងៃទី​១៨ មិថុនា គឺជា​ព្រះរាជ​ពិធី​បុណ្យចម្រើនព្រះជន្ម​គម្រប់​៨៣ យាង​ចូល​៨៤ ព្រះវស្សា​របស់​សម្តេចព្រះ​មហាក្សត្រី នរោត្តម មុនីនាថ សីហនុ​។​ប្រជាពលរដ្ឋ សិស្សានុសិស្ស និង​មន្ត្រីរាជការ​ក៏​ត្រូវបាន​ឈប់សម្រាក​មួយថ្ងៃ​។​ក្នុងឱកាស​ទិវា​ចម្រើន​ព្រះជន្ម​ប្រកបដោយ​នក្ខត្តឫក្ស​ដ៏​ឧត្តម​នេះ ប្រជារាស្ត្រ​ខ្មែរ​ប្រុស​-​ស្រី ក៏​បាននាំគ្នា​ថ្វាយ​សព្ទសាធុការ​យ៉ាង​កង​រំពង ចំពោះ​ព្រះ​មាតា​ជាតិ​ដ៏​ជាទីគោរព​ស្រឡាញ់​របស់ខ្លួន​ផងដែរ​៕

 


ព័ត៌មានផ្សេងទៀត