ADB​ផ្តល់​ជិត​$៨​លាន​អភិវឌ្ឍ​ឧទ្យាន​ថាមពល​ពន្លឺព្រះអាទិត្យ​កម្លាំង​១០០​មេហ្គា​វ៉ាត់​នៅ​កម្ពុជា​

24-05-2019 7:38 pm 838
  ស្តាប់
ស្តាប់ជាសំឡេង

​ធនាគារ​អភិវឌ្ឍន៍អាស៊ី (ADB) នៅ​ថ្ងៃ​ទី​២៤ ឧសភា បាន​សម្រេច​ផ្តល់​ជំនួយ​ជិត​៨​លាន​ដុល្លារ​អាមេរិក​ដល់​កម្ពុជា ដើម្បី​គាំទ្រ​ការសាងសង់​ឧទ្យាន​ថាមពល​ពន្លឺព្រះអាទិត្យ កម្លាំង​១០០​មេហ្គា​វ៉ាត់ ។ បន្ថែម​ពីលើ​នេះ ក៏​មាន​ជំនួយ ឥត​សំណង​ជាង​១៤​លាន​ដុល្លារ​ផ្សេងទៀត គាំទ្រ​ដល់​ការអភិវឌ្ឍ​សមត្ថភាព​របស់​អគ្គិសនី​កម្ពុជា និង​អាជ្ញាធរ​អគ្គិសនី​កម្ពុជា...

​ធនាគារ​អភិវឌ្ឍន៍អាស៊ី (ADB) បានអនុម័ត​ឥណទាន​សម្បទាន​ចំនួន ៧,៦៤​លាន​ដុល្លារ​អាមេរិក ដើម្បី​គាំទ្រ​ដល់​ការសាងសង់​ឧទ្យាន​ថាមពល​ពន្លឺព្រះអាទិត្យ​កម្លាំង​១០០​មេហ្គា​វ៉ាត់ ក្នុង​ខេត្ត​កំពង់ឆ្នាំង និង​កសាង​ប្រព័ន្ធ​បញ្ជូន​អគ្គិសនី ត​ភ្ជាប់​ទៅ​នឹង​បណ្តាញ​ចែកចាយ​ចម្បង​ក្បែរ​រាជធានី​ភ្នំពេញ ។​

​សេចក្តីប្រកាស​ព័ត៌មាន​ចុះ​ថ្ងៃ​ទី​២៤ ឧសភា ថា បន្ថែម​ពីលើ​ឥណទាន​សម្បទាន​របស់ ADB ក៏​មាន​ឥណទាន​សម្បទាន ១១​លាន​ដុល្លារ និង​៣​លាន​ដុល្លារ ជា​ហិរញ្ញប្បទាន​ឥត​សំណង ដែល​ទទួលបាន​ពី​មូលនិធិ​អាកាសធាតុ​យុទ្ធសាស្ត្រ តាមរយៈ​កម្មវិធី​ពង្រីក​ថាមពល​កើតឡើង​វិញ ។​

​បន្ថែម​ពី​នេះ ក៏​មាន​ហិរញ្ញប្បទាន​ឥត​សំណង​សម្រាប់​ជំនួយ​បច្ចេកទេស​ចំនួន ៥​សែន​ដុល្លារ ផ្តល់​ដោយ​មូលនិធិ e-Asia និង​ភាព​ជា​ដៃគូ​ចំណេះដឹង​នៃ​សាធារណរដ្ឋ​កូរ៉េ ដើម្បី​គាំទ្រ​ដល់​ការអភិវឌ្ឍ​សមត្ថភាព​របស់​អគ្គិសនី​កម្ពុជា និង​អាជ្ញាធរ​អគ្គិសនី​កម្ពុជា ។​

​លោក Pradeep Tharakan ប្រធាន​ក្រុម​អ្នកឯកទេស​ផ្នែក​ការប្រែប្រួល​អាកាសធាតុ​របស់ ADB ថ្លែងថា ការ​មាន​ប្រភព​ថាមពល​ដែល​គួរឱ្យ​ជឿជាក់​បាន មាន​និរន្តរភាព និង​តម្លៃ​សមរម្យ ពិតជា​មាន​សារសំខាន់​សម្រាប់​ការអភិវឌ្ឍ​សេដ្ឋកិច្ច​របស់​ប្រទេស​ដែល​កំពុង​មាន​ការរីក​ចម្រើន​យ៉ាង​ឆាប់រហ័ស​ដូច​កម្ពុជា ។ 

​លោក​បន្តថា ជំនួយ​របស់ ADB នឹង​មិន​គ្រាន់តែ​ជួយ​ធ្វើ​ពិពិធ​កម្ម​ប្រភព​ថាមពល​របស់​កម្ពុជា តាមរយៈ​ការអភិវឌ្ឍ​ថាមពល​ពន្លឺព្រះអាទិត្យ​ទេ វា​ក៏​នឹង​ជួយ​ឱ្យ​កម្ពុជា​សម្រេចបាន​នូវ​គោលដៅ​កាត់បន្ថយ​ឧស្ម័ន​ផ្ទះ​កញ្ចក់​របស់ខ្លួន យោង​តាម​កិច្ចព្រមព្រៀង ស្តី​ពី​អាកាសធាតុ​នៅ​ទីក្រុង​ប៉ារីស​ដែរ ។​

​ក្នុង​ឆ្នាំ​២០១៨ កម្ពុជា​អាច​ផ្គត់ផ្គង់​អគ្គិសនី តាមរយៈ​បណ្តាញ​ដែល​បាន​តម្លើង​រួចរាល់ សរុប​ចំនួន ២.១៧៥ មេហ្គា​វ៉ាត់ ក្នុងនោះ ថាមពល​ពី​វា​រី​អគ្គិសនី​ចំនួន ១.៣៣០​មេហ្គា​វ៉ាត់ ឬ​ប្រមាណ ៦២% និង​ការផលិត​ថាមពល​អគ្គិសនី​ពី​ឥន្ធនៈហ្វូស៊ីល ចំនួន​៧៨០​មេហ្គា​វ៉ាត់ ឬ​ប្រមាណ​៣៦% ។ 

ADB ថា ទោះបី​កម្ពុជា​មាន​ពន្លឺព្រះអាទិត្យ​ច្រើន តែ​សមត្ថភាព​ផលិត​ថាមពល​អគ្គិសនី​ពី​ពន្លឺព្រះអាទិត្យ​នាពេល​បច្ចុប្បន្ន គឺ​ត្រឹមតែ​១០​មេហ្គា​វ៉ា​ត់ប៉ុណ្ណោះ ។ យោងតាម​ការសិក្សា​របស់​ADB កម្ពុជា​អាច​បន្ថែម​ថាមពល​ពន្លឺ​ព្រះអាទិត្យ​ប្រមាណ​២០០​មេហ្គា​វ៉ាត់ ទៅ​ក្នុង​បណ្តាញ​ចែកចាយ ត្រឹម​ឆ្នាំ​២០២១ ដោយ​ប្រើប្រាស់​បច្ចេកវិទ្យា​ដែល​មាន​ស្រាប់ និង​ដោយ​មិន​ប៉ះពាល់​ដល់​បណ្តាញ​ចែកចាយ ៕

ព័ត៌មានផ្សេងទៀត