ប៉ា​គី​ស្ថាន៖​​ខ្មាន់កាំភ្លើង​ចូលបាញ់ប្រហារ​ក្នុង​សណ្ឋាគារ ប្រឆាំង​ជន​ជាតិចិន​និង​ភ្ញៀវ​បរទេស​ផ្សេងទៀត​

12-05-2019 12:07 pm 1282
  ស្តាប់
សណ្ឋាគារដែលរងនូវការបាញ់ប្រហារ
ស្តាប់ជាសំឡេង

​ខ្មាន់កាំភ្លើង​មិន​ស្គាល់​អត្តសញ្ញាណជាច្រើននាក់ បាន​សម្រុកចូល​ក្នុង​សណ្ឋាគារ​លំដាប់​ផ្កាយ​ប្រាំ Pearl Continental ស្ថិតនៅ​ភាគ​និរតី​នៃ​ទីក្រុង​កំពង់ផែ Gwadar នៃ​ប្រទេស​ប៉ា​គី​ស្ថាន ដោយបាន​បាញ់សម្លាប់​អ្នកយាម​ម្នាក់​ឲ្យស្លាប់​បាត់​បង់ជីវិត និង​មនុស្ស​២​នាក់​ទៀត​របួស​។ ហេតុការណ៍ដែលកើតឡើងកាលពីថ្ងៃសៅរ៍​នេះ មាន​ការបាញ់​តបត​គ្នា​ទៅវិញទៅមក រវាង​កងកម្លាំង​សន្តិសុខ​និង​ពួក​ខ្មាន់កាំភ្លើង​ផងដែរ ដោយ​កងកម្លាំង​សន្តិសុខ បាន​បាញ់សម្លាប់​ខ្មាន់កាំភ្លើង​៣​នាក់​។ ដោយឡែក ភ្ញៀវ​នៅក្នុង​សណ្ឋាគារ​ភាគច្រើន ត្រូវបាន​គេ​ជម្លៀសចេញ​។​

​ពាក់ព័ន្ធ​នឹង​ការបាញ់ប្រហារ​នេះ កងទ័ព​រំដោះ​តំបន់​Balochistan ដែលជា​ក្រុម​ប្រយុទ្ធប្រឆាំង ដើម្បី​ទាមទារ​ស្វ័យភាព បានប្រកាសថា ជា​ថ្វីដៃ​របស់​គ្នីគ្នា​ពួកគេ​។ នៅក្នុង​សេចក្តីថ្លែងការណ៍​មួយ ក្រុម​នេះ​បាន​អះអាងថា ការវាយប្រហារ​គឺ សំដៅលើ​អ្នក​វិនិយោគិន​ជន​ជាតិចិន​និង​ជនបរទេស​ផ្សេងទៀត ដែល​មក​អភិវឌ្ឍ នាំយក​ប្រយោជន៍​ចេញពី​តំបន់​នេះ​។​

Gwadar គឺជា​កំពង់ផែ​យុទ្ធសាស្ត្រ​មួយ ស្ថិតនៅលើ​សមុទ្រ Arabian ដែល​កំពុង​ត្រូវបាន​អភិវឌ្ឍ ជា​ផ្នែក​មួយ​នៃ​របៀង​សេដ្ឋកិច្ច​ប្រទេស​ប៉ា​គី​ស្ថាន និង​ដែលជា​ផ្នែក​មួយ នៃ​គម្រោង​ហេដ្ឋារចនាសម្ព័ន្ធ ផ្លូវ​មួយ​និង​ខ្សែក្រវ៉ាត់​មួយ​របស់​ចិន​។ នៅក្នុង​សណ្ឋាគារ​ដ៏​ប្រណិត ដែល​រង​នូវ​ការវាយប្រហារ​នេះ ភាគច្រើន​ជនបរទេស​ស្នាក់នៅ ហើយ​នៅ​ក្នុងនោះ ក៏មាន​បុគ្គលិក​ជន​ជាតិចិន ដែល​ធ្វើ​ការងារ​នៅក្នុង​គម្រោង ផ្លូវ​មួយ​ខ្សែក្រវ៉ាត់​មួយ​របស់​ចិន​ផងដែរ​។​

នាយករដ្ឋមន្ត្រី​ប៉ា​គី​ស្ថាន​លោក Imran Khan បានចេញ​សេចក្តីថ្លែងការណ៍​ថ្កោលទោស​ការវាយប្រហារ​នេះ និង​ថា​ជា​ការប៉ុនប៉ង ដើម្បី​បំផ្លិចបំផ្លាញ​គម្រោង​សេដ្ឋកិច្ច​និង​ភាពរុងរឿង​។ ចំណែកឯ​ស្ថានទូត​ចិន នៅក្នុង​ទីក្រុង​អ៊ីស្លាម​បាត ក៏បាន​ចេញមក​ថ្កោលទោស ចំពោះ​ការវាយប្រហារ​នេះដែរ​។​

សូមបញ្ជាក់ថា​មុន​ផ្ទុះ​ការវាយប្រហារ​នេះ គឺ​កងកម្លាំង​សន្តិសុខ​ត្រូវបាន​គេ​បញ្ជា​ឲ្យ​ប្រុង​ជើងការ​ទុក​រួចទៅហើយ ដើម្បី​ត្រៀម​បង្ក្រាប​សកម្មភាព​អសន្តិសុខ នៅ​អំឡុង​ពិធីបុណ្យ​Ramadan របស់​អ្នក​កាន់សាសនា​អ៊ីស្លាម ដែល​ចាប់ផ្តើម​នៅ​ដើម​ខែឧសភា​នេះ​។ ព្រោះតែ​ក្រុម​សកម្ម​ប្រយុទ្ធ តែង​ឆ្លៀត​យក​ឱកាស​នេះ បង្កចលាចល​នៅ​ក្នុងប្រទេស​៕

ព័ត៌មានផ្សេងទៀត