ចន្លោះ​ពេល​​តានតឹង​​ជាមួយ​អាមេរិក​​អ៊ីរ៉ង់​​ប្រកាស​​នឹង​វិល​​ទៅរក​​កម្មវិធី​​នុយក្លេអ៊ែរ​វិញ​

08-05-2019 4:04 pm 474
  ស្តាប់
រូបភាពប្រធានាធិបតីអ៊ីរ៉ង់ចុះពិនិត្យ​រោងចក្រនុយក្លេអ៊ែរ
ស្តាប់ជាសំឡេង

​ប្រទេស​អ៊ីរ៉ង់​បានប្រកាសថា​ខ្លួន​នឹង​ដកចេញ​នូវ​ការ​អនុវត្ដ​មួយចំនួន ដែលមាន​ក្នុង​កិច្ចព្រមព្រៀង​នុយក្លេអ៊ែរ​អ៊ីរ៉ង់ បាន​ចុះហត្ថលេខា​ជាមួយ​ប្រទេស​មហាអំណាច​៥+១​ក្នុង​ឆ្នាំ​២០១៥​។ ការប្រកាស​ដូច្នេះ​ធ្វើឡើង​ស្របពេល​អ៊ីរ៉ង់ កំពុង​រង​សម្ពាធ​បន្ថែម​ពី​អាមេរិក​ក្នុងពេល​ប៉ុន្មាន​សប្ដាហ៍​ថ្មីៗ​នេះ​។ ប្រធានាធិបតី​អ៊ីរ៉ង់​លោក​Hassan Rouhani បាន​ថ្លែង​សុន្ទរកថា​តាម​ប៉ុស្ដិ៍​ទូរទស្សន៍​នៅ​ថ្ងៃទី​០៨​ឧសភា​នេះ​ថា អ៊ីរ៉ង់​នឹង​កាត់បន្ថយ​ការប្ដេជ្ញាចិត្ដ​របស់ខ្លួ​ន​ដែល​មានចារ​ក្នុង​កិច្ចព្រមព្រៀង ប៉ុន្ដែ​មិនមែន​ឈប់​អនុវត្ដ​តាម​កិច្ចព្រមព្រៀង​ទាំងស្រុង​ទេ​។ 

​ការប្រកាស​នេះ​ធ្វើឡើង​ក្នុង​រយៈពេល​មួយឆ្នាំ បន្ទាប់ពី​អាមេរិក​ដកខ្លួន​ចេញពី​កិច្ចព្រមព្រៀង​ជា​ឯកតោភាគី ដោយ​ជំទាស់​នឹង​ប្រទេស​ហត្ថលេខី​ផ្សេងទៀត​។ លោក​Rouhani​និយាយថា​ប្រទេស​ហត្ថលេខី​មាន​បារាំង អង់គ្លេស អាល្លឺម៉ង់ រុស្ស៊ី និង​ចិន ត្រូវបាន​ជូនដំណឹង​ពី​ករណីនេះ​រួចហើយ​។ លោក​ក៏បាន​ចោទប្រកាន់​ពី​ភាព​រឹងរូស​របស់​អាមេរិក​ធ្វើឲ្យប៉ះពាល់​ដល់​កិច្ចព្រមព្រៀង ព្រោះតែ​វា​ជា​ផលប្រយោជន៍​នៅក្នុង​តំបន់ និង​ផលប្រយោជន៍​សម្រាប់​ពិភពលោក ប៉ុន្ដែ​មិនមែនជា​សត្រូវ​របស់​អ៊ីរ៉ង់ ទើប​អាមេរិក​មិនបាន​ប្រឹងប្រែង​ជួយ​ឡើយ​តាំងពី​ឆ្នាំ​២០១៥​។​

​លោក​ប្រធានាធិបតី​អ៊ីរ៉ង់​បាន​បន្ថែមថា លោក​នឹង​បន្ដ​រក្សាទុក​សារធាតុ​អ៊ុយ​រ៉ា​ញ៉ូម​នៅក្នុង​ប្រទេស​ជាជាង​នាំចេញ​ទៅ​ក្រៅ ហើយ​លោក​គំរាម​នឹង​ចាប់ផ្ដើម​ដំណើរការ​កម្មវិធី​នុយក្លេអ៊ែ​រ គឺ​ផលិត​អ៊ុយ​រ៉ា​ញ៉ូម​ដែល​មានគុណ​ភាពខ្ពស់​ឡើងវិញ​ក្នុង​រយៈពេល​៦០​ថ្ងៃ​។ 

​សូមបញ្ជាក់ថា ស្ថិតក្រោម​កិច្ចព្រមព្រៀង​ចុះ​ក្នុង​ឆ្នាំ​២០១៥ អ៊ីរ៉ង់​ត្រូវបាន​ហាមឃាត់​លើ​មហិច្ឆតា​ផលិត​នុយក្លេអ៊ែរ ជា​ថ្នូរ​នឹង​ការដកហូត​ទណ្ឌកម្ម​សេដ្ឋកិច្ច​។ ក្នុងនោះ​អ៊ីរ៉ង់​ត្រូវបាន​អនុញ្ញាតឲ្យ​រក្សា​ទុកសា​ធា​រណ​អ៊ុយ​រ៉ា​ញ៉ូម​ក្នុង​បរិមាណ​កំណត់មួយ រួមទាំង​កំណត់​ពី​ចំនួន​នៃ​ការនាំចេញ​ផងដែរ​។ ប៉ុន្ដែ​បញ្ហាលំបាក​កើតឡើង​កាន់​តែ​ខ្លាំង​សម្រាប់​អ៊ីរ៉ង់ នៅពេល​អាមេរិក​សម្រេច​ដកហូត​លែងឲ្យ​អ៊ីរ៉ង់​នាំ​សារធាតុ​អ៊ុយរ៉ា​ញ៉ូម​ដែល​ស្ដុក​ទុក​ចេញទៅ​ក្រៅ បង្ខំ​ឲ្យ​អ៊ីរ៉ង់​ផ្អាក​ការ​ចម្រាញ់​សារធាតុ​អ៊ុយ​រ៉ា​ញ៉ូម​ដែល​បានកំណត់​។ អ៊ីរ៉ង់​ប្រកាសថា​ស្ថានភាព​បច្ចុប្បន្ន ខ្លួន​មិនអាច​គោរព​ទៅតាម​ការកំណត់​ឲ្យ​រក្សា​អ៊ុយ​រ៉ា​ញ៉ូម​និង​ទឹកដែល​ប្រើប្រាស់​ក្នុង​ការចម្រាញ់​ទៀត​បានទេ​៕

ព័ត៌មានផ្សេងទៀត