​រដ្ឋមន្ត្រី​ទេសចរណ៍​​កំណត់​ទិសដៅ​​រៀបចំ​បុណ្យ​សមុទ្រ​​ឆ្នាំនេះ​ឱ្យ​ល្អ​ជាង​មុន​​

07-05-2019 11:25 am 444
  ស្តាប់
ស្តាប់ជាសំឡេង

​រដ្ឋមន្ត្រី​ទេសចរណ៍ និង​អភិបាលខេត្ត​កំពត កំណត់​ទិសដៅ​រៀបចំ​បុណ្យ​សមុទ្រ​ឆ្នាំនេះ ឱ្យបាន​ល្អ​ជាង​មុន ខណៈ​ពិធីបុណ្យ​សមុទ្រ​លើក​ទី​៨​នេះ នឹង​ត្រូវធ្វើឡើង​នៅ​អំឡុង​ខែធ្នូ ឆ្នាំ​២០១៩ នា​ទឹកដី​ខេត្ត​កំពត​។ ជាមួយគ្នានេះ​លោក ថោង ខុន ក៏បាន​ប្រកាស​ដាក់​អនុសាសន៍​មួយចំនួន​ដើម្បី​ត្រៀម​រៀបចំ​ពិធីបុណ្យ​សមុទ្រ​នា​ឆ្នាំនេះ​ផងដែរ​។

​នៅក្នុង​កិច្ចប្រជុំ​ត្រៀម​រៀបចំ​ពិធីបុណ្យ​សមុទ្រ​លើក​ទី​៨ (​ជុំ​ទី​២) នា​ថ្ងៃទី​០៦ ខែ​ឧសភា ឆ្នាំ​២០១៩ នៅ​សាលា​ខេត្តកំពត លោក ថោង ខុន រដ្ឋមន្ត្រី​ក្រសួងទេសចរណ៍ និង​លោក ជាវ តា​យ អភិបាលខេត្ត​កំពត បានប្រកាស​ដាក់​ទិសដៅ​ជាច្រើន ដើម្បី​ត្រៀម​រៀបចំ​ពិធីបុណ្យ​សមុទ្រ​លើក​ទី​៨ ឱ្យ​កាន់តែ​អធិកអធម​ជាង​ឆ្នាំមុនៗ​។ លោក ថោង ខុន បាន​លើកឡើងថា ខេត្ត​កំពត មាន​សក្ដានុពល​ខ្ពស់​សម្រាប់​អភិវឌ្ឍន៍​វិស័យ​ទេសចរណ៍ ក្នុងនោះ​មាន​ទីក្រុង​បេតិកភណ្ឌ រមណីយដ្ឋាន​ទេសចរណ៍ធម្មជាតិ​យ៉ាងច្រើន​សម្បូរបែប មាន​តំបន់​ក​សិ​ទេសចរណ៍​។​

​រដ្ឋមន្ត្រី​ក្រសួងទេសចរណ៍​រូបនេះ បានប្រកាស​ដាក់​អនុសាសន៍​មួយចំនួន​ផងដែរ ដូចជា​៖

១. ជំរុញ​មាន​ការរៀបចំ «​វិថី​ម្ហូបអាហារ​» ឬ​ហៅថា Food Street នៅ​ទីតាំង​ណាមួយ​នៃ​ពិធីបុណ្យ​សមុទ្រ​ខាងមុខ​ឱ្យបាន​ល្អប្រសើរ ហើយ Food Street នេះ ក៏​ទុកជា​ផលិតផល​ទេសចរណ៍​អចិន្ត្រៃយ៍ សម្រាប់​ទីក្រុង​កំពត​ផងដែរ​។​

២. ស្នើសុំ​ក្រសួង​សាធារណការ និង​ដឹក​ជញ្ជួន​ជួយ​ពន្លឿន​ការជួសជុល​ផ្លូវជាតិ​លេខ​៣ ផ្លូវ​មកពី​វាល រេ​ញ និង​ផ្លូវ​ដទៃទៀត ដែល​ភ្ជាប់​មក​ខេត្ត​កំពត​។​

៣.ស្នើ​ពន្លឿន​ការសាងសង់​កំពង់ផែ​ទេសចរណ៍ ដោយ​បង្កើន​ការធ្វើការ និង​បន្ថែមចំនួន​កម្មករ​ជំនាញ និង​វិស្វករ​។​

៤.​ ត្រៀម​រៀបចំ​ឱ្យមាន​ការតាំងពិព័រណ៍​ផលិតផល​ក្នុងស្រុក​ឲ្យបាន​សម្បូរបែប ប្រកបដោយ​គុណភាព បើ​អាចធ្វើ​បានស្នើ​រៀបចំ​ការតាំង​លក់​សម្លៀកបំពាក់​ល្អៗ​ដែល​ផលិត​ក្នុងស្រុក ដូចជា​ផលិតផល outlet ជូន​ប្រជាពលរដ្ឋ និង​ទេសចរ​អន្តរជាតិ នៅក្នុង​ពិធីបុណ្យ​សមុទ្រ ដើម្បីឱ្យ​ប្រជាពលរដ្ឋ​មានឱកាស​បាន​ទិញយក​ទៅ​ប្រើប្រាស់​ក្នុងតម្លៃ​មួយ​សមរម្យ​។​ ​នាំគ្នា​ធ្វើឲ្យ​គោលដៅ​ទេសចរណ៍​កំពត ជា​គោលដៅ​គំរូ​ខាង​គុណភាព​ផលិតផល ទំនិញ និង​សេវា គ្មាន​ទំនិញ​ក្លែងក្លាយ និង​អន់​គុណភាព​។ នៅតាម​ភោជនីយដ្ឋាន អាហា​រដ្ឋា​ន ក្នុង​ម​រមណីយដ្ឋាន​ទេសចរណ៍​នានា ត្រូវ​គិតគូរ​លើ​បញ្ហា​អនាម័យ​ចំណីអាហារ បដិសណ្ឋារកិច្ច ការ​ទុកដាក់​សំរាម កាកសំណល់​ផ្សេងៗ​។ ត្រូវ​បន្ត​បំផុស​ចលនា​ឲ្យ​ប្រជាជន​ចូលរួម​គ្រប់ៗ​គ្នា ពិសេស​ចលនា «​គ្មាន​សំរាម​ក្រោម​តុ​»​។ ត្រូវ​បង្កើន​យុទ្ធនាការ​បង្គន់​អនាម័យ ទាំង​សាធារណៈ និង​ឯកជន ទៅតាម​ស្តង់ដារ​ជាតិ និង​អន្តរជាតិ​។ យើង​ឯកភាពគ្នា​យក​ខេត្តកំពត​ជា​ខេត្ត​គំរូ ខាង​បង្គន់​អនាម័យ​សាធារណៈ​ល្អ​។​

៥. មន្ទីរ​ទេសចរណ៍​ខេត្ត​កំពត សហការ​ជាមួយ​នាយកដ្ឋាន​ជំនាញ ត្រូវ​ផ្សព្វផ្សាយ​ពី​សក្ដានុពល​វិស័យ​ទេសចរណ៍​ក្នុង​ខេត្ត ឱ្យបាន​ទូលំទូលាយ​ចាប់ពីពេលនេះ​ទៅ ដូចជា​រមណីយដ្ឋាន​ទេសចរណ៍​ថ្មីៗ ដូចជា​រមណីយដ្ឋាន​ក​សិ​ទេសចរណ៍ ចម្ការ​ម្រេច​ដ៏​ល្បីល្បាញ រមណីយដ្ឋាន​ភ្នំ​បូកគោ ពិសេស​ព័ត៌មាន​ដែល​ភ្ញៀវទេសចរ​អាច​មើលឃើញ​កញ្ចុំ​ផ្កាយ​រាប់លាន​ដួង ឬ​ហៅថា​កាឡាក់ស៊ី​មី​គី​វ៉េ​យ នៅលើ​ភ្នំ​បូកគោ​។ គួររៀបចំ​វាល​ស្រែអំបិល​ឲ្យបាន​ល្អ ទុក​សម្រាប់​ទេសចរ ស្វែងយល់ និង​ទស្សនា​។​

៦. ជំរុញ​ឱ្យ​បង្កើត​សកម្មភាព​បណ្ដុះបណ្ដាល​ធនធានមនុស្ស​ក្នុង​វិស័យ​ទេសចរណ៍ ចាប់ពីពេលនេះ​តទៅ​អោយបាន​សកម្ម និង​ផុល​ផុលផុស​ពិសេស​អំពី​អនាម័យ​ម្ហូបអាហារ ការទទួល​បដិសណ្ឋារកិច្ច​ចំពោះ​ភ្ញៀវទេសចរ ដាច់ខាត​ត្រូវ​គិតគូរ​លើ​ភាព​ស្អាត និង​បៃតង​។​

៧. ត្រូវ​ផ្សព្វផ្សាយ​ប្រាប់​ប្រជាជន​ក្នុង​ខេត្ត​ឱ្យ​ត្រៀម​រៀបចំ​ការតុបតែង​លម្អ​លំនៅដ្ឋាន និង​ទីធ្លារ​ជុំវិញ​ផ្ទះ ដើម្បី​ត្រៀម​ទទួល​ភ្ញៀវទេសចរ​ដែល​មក​ទស្សនា​កម្សាន្ត​ក្នុង​ពិធីបុណ្យ​សមុទ្រ ពិសេស​អាជ្ញាធរ​ក៏ត្រូវ​រៀបចំ​តុបតែង​លម្អ​ទីក្រុង​ឱ្យបាន​ស្អាត ប្រកបដោយ​ភាព​ទាក់ទាញ​។ អាជ្ញាធរ​ត្រូវ​គិតគូរ​លើ​បញ្ហា​សណ្ដាប់ធ្នាប់​សាធារណៈ ការចត​យានយន្ត​នៅតាម​ផ្លូវ​ក៏ត្រូវ​រៀបចំ​ឱ្យមាន​សណ្ដាប់ធ្នាប់​ផងដែរ​។​

​សូមជម្រាបថា ពិធីបុណ្យ​សមុទ្រ​លើក​ទី​៨​នេះ នឹង​ត្រូវធ្វើឡើង​នៅ​អំឡុង​ខែធ្នូ ឆ្នាំ​២០១៩ នា​ខេត្តកំពត​។ ជា​រៀងរាលឆ្នាំ កម្ពុជា​តែងតែ​រៀបចំ​ពិធីបុណ្យ​សមុទ្រ ដើម្បី​ជំរុញ​ការអភិរក្ស​ផ្សព្វផ្សាយ​សក្តានុពល​ទេសចរណ៍​តំបន់ឆ្នេរ និង​ជា​ការអបអរសាទរ​ឆ្នេរសមុទ្រ​កម្ពុជា​ជា​សមាជិក​ក្លឹប​ឆ្នេរសមុទ្រ​ដែល​ស្អាត​ជាងគេ​បំផុត​លើ​សកលលោក​៕

ព័ត៌មានផ្សេងទៀត