ប៉ា​គី​ស្ថាន​​អះអាងថា​​ឥណ្ឌា​​កំពុង​រៀប​​ផែនការ​​ឈ្លានពាន​​ជាថ្មី​​ក្នុងពេល​ឆាប់ៗ​

08-04-2019 2:52 pm 903
​រដ្ឋមន្ដ្រីការបរទេស​ប៉ា​គី​ស្ថាន​លោក​Shah Mehmood Qureshi

​រដ្ឋមន្ដ្រីការបរទេស​ប៉ា​គី​ស្ថាន​លោក​Shah Mehmood Qureshi បាន​អះអាង​កាលពី​ថ្ងៃអាទិត្យ​ថា រដ្ឋាភិបាល​របស់លោក​ទទួលបាន​ព័ត៌មាន​ដែល​អាច​ជឿ​ទុកចិត្ដបាន គឺ​ប្រទេស​ឥណ្ឌា​មាន​ផែនការ​រៀបចំ​ការឈ្លានពាន​ប្រឆាំង​ប៉ា​គី​ស្ថាន​ឆាប់ៗ​នេះ​។ ប៉ុន្ដែ​ឥណ្ឌា​ឆ្លើយតប​វិញ​ដោយ​ចោទប្រកាន់​លោក​Qureshi បាន​ញុះញង់​ចង់ឲ្យ​មានសង្គ្រាម​ផ្ទុះឡើង​។ 

​ទំនាក់ទំនង​រវាង​ប្រទេស​នុយក្លេអ៊ែរ​ទាំងពីរ បាន​តានតឹង​ជាមួយគ្នា​បន្ទាប់ពី​មាន​ហេតុការណ៍​បំផ្ទុះ​គ្រាប់បែក នៅក្នុង​តំបន់​កា​ស្មៀគ្រប់គ្រង​ដោយ​ឥណ្ឌា​កាលពី​ខែ​កុម្ភៈ សម្លាប់​ទាហាន​ឥណ្ឌា​ចំនួន​៤០​នាក់​។ ក្រោយមក​ក្រុម​ភេរ​វករ​មាន​មូលដ្ឋាន​ក្នុងប្រទេស​ប៉ា​គី​ស្ថាន បាន​ចេញមុខ​ទទួលខុសត្រូវ​។ ឥណ្ឌា​ក៏​ចោទប្រកាន់ថា​ប៉ា​គី​ស្ថាន​ជា​អ្នកផ្ដល់​ការគាំទ្រ​ដល់​ក្រុម​ភេរ​វករ​ទាំងនោះ​។​

ប៉ុន្ដែ​ប៉ា​គី​ស្ថាន​បាន​ច្រានចោល​ការចោទប្រកាន់ និង​អះអាងថា​ខ្លួន​មិនបាន​ពាក់ព័ន្ធ​ជាមួយ​ការវាយប្រហារ​លើ​កងទ័ព​ឥណ្ឌា​ទេ​។ នាយករដ្ឋមន្ដ្រី​ប៉ា​គី​ស្ថាន​លោក​Imran Khan ប្រកាស​ផ្ដល់​កិច្ចសហការ ក្នុង​ការស៊ើបអង្កេត​ក​រ​ណី​នេះ​ផងដែរ​ប្រសិនបើ​ឥណ្ឌា​យល់ព្រម​។ យ៉ាងណាមិញ​ការសង្ស័យ​នៅតែ​កើតមាន​ទៅវិញទៅមក​មិនទាន់​បញ្ចប់​បញ្ហា​បានទេ​។ 

​ដោយឡែក​ពេល​ថ្លែង​ទៅកាន់​អ្នកសារព័ត៌មាន​ក្នុង​ទីក្រុង​Multan លោក​រដ្ឋមន្ដ្រីការបរទេស​Qureshi​លើកឡើងថា អគ្គរដ្ឋទូត​នៃ​សមាជិក​អចិន្ដ្រៃយ៍​ក្រុមប្រឹក្សាសន្ដិសុខ​អង្គការសហប្រជាជាតិ​ប្រចាំ​ក្នុង​ទីក្រុង​អ៊ី​ស្លា​ម៉ា​បាដ បាន​ផ្ដល់ដំណឹង​ពី​ផែនការ​ឈ្លានពាន​របស់​ឥណ្ឌា​ពីរ​ថ្ងៃ​មកហើយ​។​

​លោក​បន្ថែម​ដូច្នេះ​ថា “​យើង​មាន​ព័ត៌មាន​ដែល​អាច​ជឿជាក់​បាន ឥណ្ឌា​បានរៀបចំ​គ្រោងការ​ថ្មី​មួយ ដែល​ផែនការ​នោះ​កំពុង​ស្ថិតក្រោម​ការពិភាក្សា ពី​ឱកាស​ឈ្លានពាន​ប្រឆាំងនឹង​ប្រទេស​ប៉ា​គី​ស្ថាន ដែល​អាច​ធ្វើឡើង​ចន្លោះ​ពី​ថ្ងៃទី​១៦​ដល់​ថ្ងៃទី​២០​មេសា​។ ខ្ញុំ​និយាយ​ជាមួយនឹង​ការទទួលខុសត្រូវ ហើយ​ខ្ញុំ​មាន​គោលជំហរ​ទទួលខុសត្រូវ​។ ខ្ញុំ​ដឹងថា​អ្វីដែល​ខ្ញុំ​និយាយ​នឹងមាន​ជា​ចំណងជើង​នៅក្នុង​សារព័ត៌មាន​អន្ដរជាតិ​។​” លោក​Qureshi​សង្កត់ធ្ងន់ថា ផែនការ​ឈ្លានពាន​មាន​គោលបំណង​បង្កើន​ការគាបសង្កត់​ផ្នែក​ការទូត​ប្រឆាំង​ប៉ា​គី​ស្ថាន​។​

​សូម​រម្លឹកថា តំបន់​កា​ស្មៀ​ក្លាយជា​តំបន់​ព្រំដែន​ជម្លោះ​រវាង​ឥណ្ឌា​និង​ប៉ា​គី​ស្ថាន តាំងពី​បញ្ចប់​អាណានិគម​របស់​អង់គ្លេស​ក្នុង​ឆ្នាំ​១៩៤៧​។ ប្រទេស​ទាំងពីរ​នៅតែ​អះអាង​ទាមទារ​យកមក​កាន់កាប់​រៀងៗ​ខ្លួន ហើយក៏​បាន​ប៉ះទង្គិច​គ្នា​ដោយ​អាវុធ​ជា​ច្រើនលើកច្រើនសា​រហើយ​ដែរ​៕

ព័ត៌មានផ្សេងទៀត