ប៉ា​គី​ស្ថាន​​ចាប់ផ្ដើម​​បង្ក្រាប​​ក្រុម​សកម្មប្រយុទ្ធ​​ចន្លោះពេល​​រង​សម្ពាធ​​ពី​អន្ដរជាតិ​

06-03-2019 10:50 am 608
  ស្តាប់
រូបភាពកងទ័ពប៉ាគីស្ថាន​ពេលធ្វើប្រតិបត្ដិការ
ស្តាប់ជាសំឡេង

​ប៉ា​គី​ស្ថាន​បាន​និយាយ​កាលពី​ថ្ងៃទី​០៥​មីនា​ថា ខ្លួន​បានចាប់ផ្ដើម​ប្រតិ​បត្ដិកា​រ​បង្ក្រាបក្រុម​សកម្មប្រយុទ្ធ ដោយ​ចាប់ឃុំខ្លួន​សមាជិក​អង្គការ​ភេរវកម្ម​ចំនួន​៤៤​រូប​។ ក្នុងនោះ​មាន​អ្នក​ស្និទ្ធ​នឹង​មេដឹកនាំ​ក្រុម​សកម្មប្រយុទ្ធ ដែល​គេ​ចោទថា​នៅ​ពីក្រោយ​ការវាយប្រហា​រលើ​ក្បួន​យោធា​ឥណ្ឌា​នៅ​តំបន់​កា​ស្មៀកាល​ពី​ខែ​មុន​ផងដែរ​។ ក្រសួងមហាផ្ទៃ​ប៉ា​គី​ស្ថាន​បាន​និយាយថា នេះ​ជា​ប្រតិ​ប​ត្ដិ​ការប្រយុទ្ធប្រឆាំង​នឹង​អង្គការ​ដែល​ត្រូវបាន​រារាំង​ក្នុងប្រទេស​ប៉ា​គី​ស្ថាន​។ វា​ជា​ផែនការ​ប៉ា​គី​ស្ថាន​បានរៀបចំ​យូរ​មកហើយ មិនមែនជា​ការឆ្លើយតប​នឹង​ការអំពាវនាវ​របស់​ប្រទេស​ឥណ្ឌា​ឡើយ​។ ឥណ្ឌា​ធ្លាប់​និយាយថា​ប៉ា​គី​ស្ថាន​បរាជ័យ ក្នុងការ​បោសសម្អាត​ក្រុម​សកម្មប្រយុទ្ធ​ពី​ទឹកដី​ប៉ា​គី​ស្ថាន​។​

​ប៉ា​គី​ស្ថាន​កំពុង​ប្រឈម​នឹង​សម្ពាធ​មហាអំណាច​ពិភពលោក ឲ្យ​ចាត់វិធានការ​ប្រឆាំង​ក្រុម​សកម្មប្រយុទ្ធ​ដែល​បើក​ការវាយប្រហារ​ក្នុងប្រទេស​ឥណ្ឌា ក្នុងនោះ​មាន​ក្រុម​Jaish-e-Mohammed ដែល​អះអាង​ទទួលខុសត្រូវ​ការវាយប្រហា​រ​បំផ្ទុះ​គ្រាប់បែក​អត្ដ​ឃាត​កាលពី​ថ្ងៃទី​១៤​កុម្ភៈ សម្លាប់​ទាហាន​ឥណ្ឌា​៤០​នាក់​ផងដែរ​។ ការវាយប្រហារ​នេះ​បាន​រុញច្រាន​ឲ្យក្លាយ​ជា​ជម្លោះ​ធ្ងន់ធ្ងរ​រវាង​ឥណ្ឌា​និង​ប៉ា​គី​ស្ថាន ក្រោយ​ស្ងប់ស្ងាត់​ជាច្រើន​ឆ្នាំ​។ មាន​ការបាញ់ប្រហា​រឆ្ល​ង​កាត់​ព្រំដែន បាញ់​ទម្លាក់​យន្ដហោះ​ចម្បាំង​និង​យន្ដហោះ​គ្មា​មនុស្សបើក នៅ​តំបន់​ព្រំដែន​ជម្លោះ​កា​ស្មៀ​ថែមទៀត​។ ប៉ុន្ដែ​ស្ថានការណ៍​បាន​ធូរស្រាល​បន្ដិច ក្រោយ​ប៉ា​គី​ស្ថាន​ដោះលែង​អ្នកបើក​យន្ដ​ចម្បាំង​ឥណ្ឌា​ម្នាក់ ចាប់ខ្លួនបាន​បន្ទាប់ពី​យន្ដហោះ​របស់គេ​ត្រូវ​ប៉ា​គី​ស្ថាន​បាញ់​ទម្លាក់​។​

​ក្រសួងមហាផ្ទៃ​ប៉ា​គី​ស្ថាន​បញ្ជាក់​បន្ថែមថា អ្នក​ដែល​ជិតស្និទ្ធ​នឹង​មេដឹកនាំ​ក្រុម​Jaish-e-Mohammed ត្រូវបាន​ឃុំខ្លួន មួយចំនួន​បង្ហាញ​ឈ្មោះ​ដោយ​ប្រទេស​ឥណ្ឌា បន្ទាប់ពី​ហេតុការណ៍​បំផ្ទុះ​គ្រាប់បែក​កាលពី​ខែ​មុន​។ ពេលនេះ​កំពុងមាន​ការស៊ើបអង្កេត​លើ​ពួកគេ ហើយ​បើ​រកឃើញ​ភស្ដុតាង​បន្ថែម អ្នក​ជាប់ឃុំ​ទាំងអស់​នឹងត្រូវ​បន្ដ​នីតិវិធី​តាម​ផ្លូវច្បាប់​។ ចំពោះ​មេដឹកនាំ​ក្រុម​សកម្មប្រយុទ្ធ​Jaish-e-Mohammed មាន​ឈ្មោះថា​Masood Azhar អាមេរិក អង់គ្លេស និង​បារាំង បានស្នើ​ទៅ​ក្រុមប្រឹក្សាសន្ដិសុខ​អង្គការសហប្រជាជាតិ​កាលពី​ខែ​មុន ឲ្យ​បញ្ចូល​ឈ្មោះ​ក្នុង​បញ្ជី​ខ្មៅ​។ អាមេរិក​និង​អង់គ្លេស​ក៏​ជំរុញ​ឲ្យ​ប៉ាគី​ស្ថាន​ដោះស្រាយ​បញ្ហា​ក្រុម​សកម្មប្រយុទ្ធ​ដែរ​៕

ព័ត៌មានផ្សេងទៀត