នាយករដ្ឋមន្ត្រី​កាណាដា បណ្តេញ​អគ្គរដ្ឋទូត​ប្រចាំ​ប្រទេស​ចិន​ចេញពី​តំណែង​

27-01-2019 10:12 am 3284
  ស្តាប់
​លោក​John McCallumនៅខាងឆ្វេងលោកJustin Trudeau​
ស្តាប់ជាសំឡេង

​លោក​John McCallum​អគ្គរដ្ឋទូត​កាណាដា ប្រចាំ​ប្រទេស​ចិន ត្រូវបាន​លោក Justin Trudeau​នាយករដ្ឋមន្ត្រី​កាណាដា បណ្តេញចេញ​ពី​តំណែង​ហើយ បន្ទាប់ពី​លោក​និយាយ​ពាក់ព័ន្ធ​នឹង​ការធ្វើ​បត្យាប័ន ប្រធាន​ផ្នែក​ហិរញ្ញវត្ថុ​ក្រុមហ៊ុន​Huawei ។ លោក Justin Trudeau បាន​និយាយ​នៅ​ថ្ងៃ​សៅ​រ៍ថា កាលពី​យប់​ម៉ិញ​លោក​បានស្នើ និង​បាន​ទទួលយក​ការលាលែង​ពី​តំណែង របស់លោក​John McCallum អគ្គរដ្ឋទូត​កាណាដា​ប្រចាំ​ប្រទេស​ចិន​។ ប៉ុន្តែ​លោក Trudeau មិនបាន​ពន្យល់​ពី​មូលហេតុ នៃ​ការបណ្តេញចេញ​នោះទេ​។​

​យ៉ាងណាក៏ដោយ ការដកតំណែង​អគ្គរដ្ឋទូត​កាណាដា​ប្រចាំ​ប្រទេស​ចិន ធ្វើឡើង​ក្រោយពី​លោក​John McCallum បាន​និយាយ​ផ្ទុយ​ពី​រដ្ឋាភិបាល​កាណាដា ពាក់ព័ន្ធ​នឹង​ករណី​ធ្វើ​បត្យាប័ន​ប្រធាន​ផ្នែក​ហិរញ្ញវត្ថុ​ក្រុមហ៊ុន​Huawei អ្នកស្រី​Meng Wanzhou​។ ពេល​ផ្ដល់​បទសម្ភាសន៍ ដល់​សារព័ត៌មាន​ចិន​ថ្មីៗ​នេះ លោក​John McCallum​និយាយថា អ្នកស្រី​Meng​មាន​ទឡ្ហីករណ៍​ច្បាស់លាស់ សម្រាប់​ការពារ​ខ្លួន​ក្នុងករណីនេះ​។ នៅ​ក្នុងនោះ លោក​McCallum​បាន​និយាយថា ការធ្វើ​បត្យាប័ន​អ្នកស្រី​Meng​ទៅ​អាមេរិក​អាច​ធ្វើបាន ប៉ុន្ដែ​មិនមែនជា​លទ្ធផល​ល្អ​ទេ ហើយ​នឹងត្រូវ​ចំណាយពេល​ច្រើន​ឆ្នាំ ព្រោះ​អ្នកស្រី​អាច​ដាក់ពាក្យ​ប្ដឹងតវ៉ា​តាម​ផ្លូវច្បាប់​។ លោក​បាន​និយាយទៀតថា ការដោះលែង​អ្នកស្រី​Meng​ឲ្យមាន​សេរីភាព ស្ថិតក្រោម​ការសម្រេចចិត្ដ​របស់​តុលាការ​កាណាដា ជា​មូលហេតុ​ដោយសារ​សំណើ​អាមេរិក​គឺ​គ្មាន​ប្រសិទ្ធភាព​ទេ​។​

​ក្រោយ​អត្ថាធិប្បាយ​បែបនេះ​រួច នៅ​ថ្ងៃ​ព្រហស្បតិ៍ លោក​John McCallum​បានចេញ​សេចក្តីថ្លែងការណ៍ បង្ហាញ​នូវ​ការសោកស្តាយ​យ៉ាងខ្លាំង​។ ចំពោះ​អ្វីដែល​លោក​និយាយ គ្រាន់តែ​និយាយពី​ដំណើរការ​ស្របច្បាប់រ​បស់​អ្នកស្រី​Meng តែ​បាន​បង្កឲ្យមាន​ការភាន់ច្រឡំ​។ ដូច្នេះ វា​ជា​កំហុស​ដែល​លោក​និយាយ​ទៅ​ខុស ធ្វើឲ្យ​ផ្ទុះ​ភាពចម្រូងចម្រាស​។ ចំពោះ​អ្នកនយោបាយ​គណបក្សប្រឆាំង​កាណាដា បាន​រិះគន់​លោក McCallum និង​ចោទថា​លោក​McCallum លូកដៃ​ជ្រៀតជ្រែក​កិច្ចការ​តុលាការ ចំណែកឯ មន្ដ្រី​បក្សប្រឆាំង​ទទូច​ឲ្យ​ទម្លាក់លោក​McCallum​ចេញពី​តំណែង​ផងដែរ​។​ អត្ថាធិប្បាយមិនទាន់បានប៉ុន្មានថ្ងៃផង លោកMcCallum ត្រូវបានដកតំណែងចេញភ្លាមៗ។ 

​សូមបញ្ជាក់ថា លោក​John McCallum អាយុ​៥៩​ឆ្នាំ ត្រូវបានតែងតាំង​ជា​អគ្គរដ្ឋទូត​បំពេញបេសកកម្ម នៅក្នុង​ប្រទេស​ចិន​កាលពី​ឆ្នាំ​២០១៧៕

 

 ពាក្យគន្លឹះ  កាណាដាចិនលោក​JohnMcCallum​

ព័ត៌មានផ្សេងទៀត