ស្ថាប័ន​អប់រំ​មួយ​របស់​ចិន​ស្នើសុំ​ធ្វើ​កិច្ច​សហប្រតិបត្តិ​លើ​ការអភិរក្ស​រមណីយដ្ឋាន​អង្គរ​

23-01-2019 5:16 pm 1646
  ស្តាប់
ស្តាប់ជាសំឡេង

​លោកស្រី JIAO Yang ប្រតិភូ​នៃ​សាកលវិទ្យាល័យ​Fudan​នៃ​សាធារណរដ្ឋ​ប្រជាមានិត​ចិន បានបង្ហាញ​ចំណាប់អារម្មណ៍​លើ​ការអភិរក្ស និង​ការអភិវឌ្ឍ​រមណីយដ្ឋាន​អង្គរ​របស់​អាជ្ញាធរ​អប្សរា​។​លោកស្រី​ថែមទាំង​បានលើកឡើង​បី​ចំណុច​សំខាន់ៗ​ដល់​ភាគី​អាជ្ញាធរ​ជាតិ​អប្សរា ដើម្បី​ស្នើសុំ​ធ្វើ​កិច្ចសហប្រតិបត្តិការ​ទៀ​ត​ផង​។ នេះ​ជា​ការចុះផ្សាយ​ពី​សំណាក់​អាជ្ញាធរ​អប្សរា​ថ្មីៗ​នេះ​។ 

​ប្រតិភូ​នៃ​សាកលវិទ្យាល័យ​Fudan​នៃ​សាធារណរដ្ឋ​ប្រជាមានិត​ចិន លោកស្រី JIAO Yang បានបង្ហាញ​ចំណាប់អារម្មណ៍​លើ​កិច្ចការ​អភិរក្ស និង​ការអភិវឌ្ឍ​រមណីយដ្ឋាន​អង្គរ​របស់​អាជ្ញាធរ​ជាតិ​អប្សរា​។ នេះ​ជាការ​បង្ហើប​ពី​សំណាក់​អាជ្ញាធរ​អប្សរា​ក្នុងជំនួប​ពិភាក្សា​នា​ថ្ងៃទី​២២ មករា ឆ្នាំ​២០១៩​កន្លងទៅ​។​

ក្នុងពេល​ជាមួយគ្នា​នោះ លោកស្រី​បានលើកឡើង​នូវ​ចំណុច​បី​សំខាន់ៗ​ដល់​ភាគី​អាជ្ញាធរ​ជាតិ​អប្សរា ដើម្បី​ស្នើសុំ​ធ្វើ​កិច្ចសហប្រតិបត្តិកា​រលើ​វិស័យ​៖ ១. បណ្តុះបណ្តាល​ធនធានមនុស្ស​លើ​វិស័យ​អភិរក្ស​បេតិកភណ្ឌ ២. សិក្សា​ស្រាវជ្រាវ ៣. វិស័យ​សារមន្ទីរ សំដៅលើ​ការអភិរក្ស​បុរាណ​វត្ថុ (Cultural Relic Conservation) ដើម្បី​ធ្វើយ៉ាងណា​បម្រើឱ្យ​វិស័យ​បេតិកភណ្ឌ​កាន់តែ​ចម្រើន​ក្នុងទិសដៅ​រួមគ្នា​។​

ជា​ការឆ្លើយតប ភាគី​អាជ្ញាធរ​ជាតិ​អប្សរា​បាន​សន្យា​បន្ត​កិច្ចពិភាក្សា​លើ​ចំណុច​សំខាន់ៗ​ទាំងបី​នោះ​ជាមួយ​ស្ថាប័ន​អប់រំ​ចិន​ដើម្បី​ឈានទៅដល់​ការចុះ​អនុស្សរណៈ​យោគយល់​គ្នា​នាពេល​អនាគត​ជាពិសេស លើ​វិស័យ​បណ្តុះបណ្តាល​ធនធានមនុស្ស​អភិរក្ស​និង​ថែរក្សា​បេតិកភណ្ឌ​ផងដែរ​។​

​សូមបញ្ជាក់ថា​នា​រយៈពេល​ប៉ុន្មាន​ឆ្នាំ​ចុងក្រោយ​នេះ ទំនាក់ទំនង​រវាង​កម្ពុជា និង​ចិន​លើ​គ្រប់​វិស័យ​ហាក់​កាន់តែ​មាន​ភាពស្អិតល្មួត​គួរឲ្យកត់សម្គាល់​។ ស្អិតល្មួត ដោយសារ​ថ្មីៗ​នេះ កិច្ចសហប្រតិបត្តិការ​រវាង​ប្រទេស​ទាំងពីរ​ចេះតែមាន​ជា​បន្តបន្ទាប់​មិន​ថា​វិស័យ​ពាណិជ្ជកម្ម សេដ្ឋកិច្ច ទេសចរណ៍ អប់រំ និង​វប្បធម៌​ជាដើម​៕

ដោយៈ​ប៉ា សុ​ខេង​

ព័ត៌មានផ្សេងទៀត