កម្ពុជា​-​ចិន​គ្រោង​ដាក់​ជើងហោះហើរ​ផ្ទាល់​រវាង​ទីក្រុង​ស៊ីសង​ប៉ា​ណា​និង​ខេត្តសៀមរាប​

17-01-2019 11:04 am 1214
  ស្តាប់
ស្តាប់ជាសំឡេង

​លោក ឡ ហុង​ជាំ​ង អភិបាលក្រុង​ស៊ីសង​ប៉ា​ណា ខេត្ត​យូ​ណាន ប្រទេស​ចិន ចង់ឱ្យ​មាន​ការហោះហើរ​ត្រង់​ពី​ខេត្តសៀមរាប ប្រទេស​កម្ពុជា ឆ្ពោះទៅ​កាន់​ទីក្រុង​ស៊ីសង​ប៉ា​ណា ប្រទេស​ចិន ។ ការលើកឡើង​នេះ ធ្វើឡើង​ក្នុង​ជំនួប​ពិភាក្សា​ការងារ​រវាង​លោក និង​លោក​ទៀ សីហា អភិបាលខេត្ត​សៀមរាប កាលពី​ថ្ងៃ​ទី​១៦ ខែ​មករា ។ នេះ​បើ​តាម​ការចុះផ្សាយ​របស់​សារព័ត៌មាន​AKP...

​លោក ឡ ហុង​ជាំ​ង អភិបាលក្រុង​ស៊ីសង​ប៉ា​ណា ខេត្ត​យូ​ណាន ប្រទេស​ចិន បាន​លើកឡើង​ថា ការ​ឱ្យមាន​ជើងហោះហើរ​ដោយ​ត្រង់​ពី​ខេត្ត​សៀមរាប ទៅ​កាន់​ទីក្រុង​ស៊ីសង​ប៉ា​ណា គឺជា​ការ​ល្អ​បំផុត​សម្រាប់​ជំរុញ​លើ​វិស័យ​ទេ​ចរណ៍ និង​អភិវឌ្ឍ​សេដ្ឋកិច្ច​របស់​ប្រទេស​ទាំង​ពីរ ឱ្យ​កាន់តែ​មាន​ភាពល្អប្រសើរ​ឡើង ។​

​លោក​បន្តថា ទីក្រុង​ស៊ីសង​ប៉ា​ណា ជា​ទីក្រុង​មួយ​ដែល​ធំជាងគេ​នៅ​ប្រទេស​ចិន ផ្នែក​អភិរក្ស​សត្វព្រៃ ហើយក៏​ជា​ទីក្រុង​ដ៏​ធំ​ផ្នែក​កសិកម្ម​លើ​ដំណាំ​តែ និង​ចេក ។ ផលិតផល​តែ និង​ចេក បាន​នាំឱ្យ​ទីក្រុង​ស៊ីសង​ប៉ា​ណា ទទួលបាន​ភ្ញៀវទេសចរ​ប្រមាណ​៤​លាន​នាក់​ក្នុង​មួយ​ឆ្នាំៗ ។​

​ក្រៅពី​ចង់ឱ្យ​មាន​ជើងហោះហើរ​ត្រង់​រវាង​ប្រទេស​ទាំង​ពីរ លោក​អភិបាលក្រុង ក៏​មាន​បំណង​ធ្វើ​កិច្ចសហប្រតិបត្តិការ​ជាមួយ​ខេត្ត​សៀមរាប លើ​ផ្នែក​កសិកម្ម និង​ការផ្លាស់ប្តូរ​និស្សិត​ទៅ​សិក្សា​ទៅវិញទៅមក​ផងដែរ ។​

​ក្នុងជំនួប​កាលពី​ថ្ងៃ​ទី​១៦ ខែ​មករា​នេះ ភាគី​ទាំងពីរ ក៏​បាន​ចុះហត្ថលេខា​លើ​កំណត់ហេតុ​នៃ​កិច្ចទំនាក់ទំនង​សហប្រតិបត្តិការ​រវាង​ទីក្រុង​ស៊ីសង​ប៉ា​ណា និង​ខេត្ត​សៀមរាប ដោយ​ផ្តោត​លើ​ការលើកកម្ពស់ ការផ្លាស់ប្តូរ​និស្សិត និង​យល់ព្រម​លើ​ការរៀបចំ​ឱ្យ​មាន​ការហោះហើរ​ត្រង់ រវាង​ទីក្រុង​ស៊ីសង​ប៉ា​ណា និង​ខេត្ត​សៀមរាប ព្រមទាំង​ផ្សព្វផ្សាយ​ពី​សក្តានុពល​ទេសចរ ស៊ីសង​ប៉ា​ណា​-​សៀមរាប ជា​រៀងរាល់ឆ្នាំ ។​

​ក្នុងនោះ ក៏​ជំរុញ​ដល់​រដ្ឋបាល​ខេត្ត​សៀមរាប និង​ទីក្រុង​ស៊ីសង​ប៉ា​ណា ដើម្បី​បន្ត​សហការ​រួមគ្នា ដោយ​ស្នើសុំ​គោលការណ៍​ឯកភាព​ពី​ថ្នាក់ដឹកនាំ នៃ​រដ្ឋាភិបាល​ប្រទេស​ទាំង​ពីរ ក្នុង​ការចុះ​អនុស្សរណៈ​យោគយល់​គ្នា​រវាង​ខេត្ត ក្រុង សម្ព័ន្ធ​មេត្រីភាព នៃ​ប្រទេស​ទាំង​ពីរ សំដៅ​បង្កើន​កិច្ចសហប្រតិបត្តិការ​លើ​គ្រប់​វិស័យ​ផងដែរ ៕

ព័ត៌មានផ្សេងទៀត