រំលោភសិទ្ធិ​និស្សិត៖ឥណ្ឌូនេស៊ី​ផ្អាក​បញ្ជូន​និស្សិត​ទៅ​តៃវ៉ាន់​

04-01-2019 3:48 pm 1457
  ស្តាប់
អាគារនៃការិយាល័យប្រធានាធិបតីក្នុងទីក្រុងតៃប៉ិនៃកោះតៃវ៉ាន់
ស្តាប់ជាសំឡេង

​ក្រសួងការបរទេស​ឥណ្ឌូនេស៊ី ឲ្យដឹង​នៅ​ថ្ងៃ​សុក្រ​នេះ​ថា ឥណ្ឌូនេស៊ី​នឹង​ផ្អាក​បញ្ជូន​និស្សិត ទៅកាន់​សាកលវិទ្យាល័យ នៅ​តៃវ៉ាន់​បណ្តោះអាសន្ន​។ ការប្រកាស​ផ្អាក​នេះ ធ្វើឡើង​ក្រោយ មាន​របាយការណ៍ បង្ហាញថា និស្សិត រហូតដល់ ៣០០ នាក់ ត្រូវបាន​បង្ខំ​ឲ្យធ្វើ​ការ​នៅក្នុង​រោងចក្រ​។ ឥណ្ឌូនេស៊ី បាន​ស្នើសុំ​ឲ្យ​ក្រុង​តៃប៉ិ​ស៊ើបអង្កេត​លើ​ករណីនេះ​, ស្នើសុំ​ឲ្យ​តៃវ៉ាន់​ពន្យល់​ពី​ករណីនេះ​ឲ្យបាន​ច្បាស់លាស់ ហើយ​ស្នើ​អាជ្ញាធរ ដើម្បី អនុវត្ត​ជំហាន​ចាំបាច់ ដើម្បី​ការពារ​ផលប្រយោជន៍ និង​សុវត្ថិភាព​របស់​សិស្ស​ទាំង​នេះ​។ នេះ​បើតាម​អ្នកនាំពាក្យ ក្រសួងការបរទេស​ឥណ្ឌូនេស៊ី លោក Armanatha Nasir និយាយ​នៅក្នុង​សេចក្តីថ្លែងការណ៍​។​

​ក្រសួង​អប់រំ​កោះ​តៃវ៉ាន់ បានឲ្យដឹង​ក្នុង​សេចក្តីថ្លែងការណ៍​មួយដែ​រ​ថា របាយការណ៍​ដែល​និយាយ​ពី​ការបំពាន​លើ​សិទ្ធិ​និស្សិត​បរទេស​ទាំងនោះ គឺ​មិន​ត្រឹមត្រូវ​ទេ ហើយ​ក្រសួង​ក៏​មិនឃើញ​មានការ​បំពារបំពាន​ច្បាប់​ការងារ​ក្នុងស្រុក​អ្វី​ដែរ​។ ក្រសួង​អប់រំ​តៃវ៉ាន់ អះអាងថា ប្រសិនបើ​មាន​ការអនុវត្ត​ខុសច្បាប់ ត្រូវបាន​រកឃើញ​នៅក្នុង​សាលារៀន​ណាមួយ​នោះ ក្រសួង​នឹង​ផ្អាក​កម្មវិធី​នៅ​ទីនោះ​។​

​ការប្រកាស​ផ្អាក​បញ្ជូន​និស្សិត ទៅកាន់​សាកលវិទ្យាល័យ​នៅ​តៃវ៉ាន់​ពី​ឥណ្ឌូនេស៊ី ធ្វើឡើង​ក្រោយសមាជិកសភា​តៃវ៉ាន់​ម្នាក់​ឈ្មោះ​Ko Chih-en បាន​និយាយ​កាលពី​សប្តាហ៍​មុន​ថា សាកលវិទ្យាល័យ​ចំនួន​៦ បាន​ចាប់បង្ខំ​សិស្ស​មកពី​ប្រទេស​នៅ​អាស៊ី ជាពិសេស​គឺ​និស្សិត​មកពី​ឥណ្ឌូនេស៊ី ឲ្យធ្វើ​ការងារ​ជា​ច្រើនម៉ោង នៅក្នុង​រោងចក្រ ផលិត​កញ្ចក់​ការពារ​ភ្នែក​។ នេះ​បើតាម​គេហទំព័រ​សារព័ត៌មាន​តៃវ៉ាន់​បាន​ចុះផ្សាយ​។​

​គួរ​ជម្រាបជូន​ថា ប្រទេស​នៅ​អាស៊ីអាគ្នេយ៍ បាន​បញ្ជូន​និស្សិត​ចុះ​កម្មសិក្សា នៅ​សាកលវិទ្យាល័យ​នៅ​កោះ​តៃវ៉ាន់ ស្ថិតក្រោម​គម្រោង​កម្មវិធី សិក្សា​-​ការងារ​។ សម្រាប់ ឥណ្ឌូនេស៊ី​បាន​បញ្ជូន​និស្សិត ទៅកាន់​សាកលវិទ្យាល័យ នៅ​តៃវ៉ាន់​ចំនួន​ប្រហែល​៦ ០០០​ពាន់​នាក់ នៅ​ក្នុងនោះ និស្សិត​ប្រហែល​១ ០០០​ពាន់ ត្រូវបាន​បញ្ជូនទៅ ក្រោម​គម្រោង សិក្សា​-​ការងារ ៕ 

ព័ត៌មានផ្សេងទៀត