លោក​ឃួង ស្រេង ​សុំឲ្យ​បារាំង​ ជួយ​អភិវឌ្ឍ​​រាជធានី​ភ្នំពេញ​​ឲ្យក្លាយ​ជា​​ទីក្រុង​បៃតង​​

05-11-2018 2:55 pm 1148
  ស្តាប់
លោក​ឃួង ស្រេង និង​លោកស្រី Pauline CARMONA
ស្តាប់ជាសំឡេង

​ក្នុង​ដំណើរ​ទស្សនកិច្ច នៅ​ទី​ក្រុងប៉ារីស រយៈពេល​ជាង​មួយ​សប្តាហ៍ អភិបាល​រាជធានី​ភ្នំពេញ លោក​ឃួង ស្រេង បាន​ជួបពិភាក្សា​ការងារ​ជាមួយ​លោកស្រី Pauline CARMONA អនុប្រធាននាយកដ្ឋាន​កិច្ចការ​អាស៊ី និង​អូ​សេ​អា​នី នៃ​ក្រសួង​កិច្ចការបរទេស​សាធារណរដ្ឋ​បារាំង កាលពី​ចុង​សប្តាហ៍​កន្លងទៅ ដោយ​ផ្តោត​អំពី​ទំនាក់ទំនង​ដ៏​យូរអង្វែង​របស់​កម្ពុជា​-​បារាំង ដែល​តាំងពីដើម​រៀងមក បារាំង​បាន​ជួយ​ជ្រោមជ្រែង​ប្រទេស​កម្ពុជា​ក្នុង​ការស្វែងរក​សន្តិភាព និង​បាន​ផ្ដល់ជំនួយ​ជា​បន្តបន្ទាប់ រួមទាំង​ជំនួយ​ផ្នែក​ហិរញ្ញវត្ថុ ដល់​ប្រទេស​កម្ពុជា និង​ជាពិសេស​ការបណ្ដុះបណ្ដាល​ធនធានមនុស្ស​ដល់​រដ្ឋបាល​រាជធានី​ភ្នំពេញ​ក្នុង​ក្របខ័ណ្ឌ​កិច្ចសហប្រតិបត្តិការ​ទ្វេភាគី នា​ពេលកន្លងមក​។ 

​លោក​ឃួង ស្រេង បានស្នើ​ក្រសួង​កិច្ចការបរទេស​បារាំង តាមរយៈ​លោកស្រី Carmona ឲ្យ​បន្ត​គាំទ្រ​បន្ថែមទៀត​លើ​កិច្ចការ​សហប្រតិបត្តិកា​រ​ទ្វេភាគី រវាង​កម្ពុជា​-​បារាំង និង​រាជធានី​ភ្នំពេញ​-​ទី​ក្រុងប៉ារីស ព្រមទាំង​បន្ត​គាំទ្រ​លើ​គម្រោង​នានា ដែល​អាចជួយ​ឲ្យ​រាជធានី​ភ្នំពេញ​អាច​ក្លាយជា​ទីក្រុង​បៃតង និង​ទីក្រុង​ឆ្លាត​វៃ​នា​ពេលអនាគត​។ 

​លោកស្រី Pauline Carmona បាន​បញ្ជាក់ថា បារាំង នៅតែ​បន្ត​ជួយ​ដល់​រាជធានី​ភ្នំពេញ​, បន្ត​ការគាំទ្រ​លើ​ជំនួយ​អភិវឌ្ឍន៍ និង​ជំនួយ​បច្ចេកទេស​តាមរយៈ​ទីភ្នាក់ងារ​អភិវឌ្ឍន៍​បារាំង (AFD) សំរាប់​រាជធានី​ភ្នំពេញ ដើម្បី​ជួយ​ដល់​គម្រោង​ជា​អាទិភាព​នានា ដែល​រាជធានី​ភ្នំពេញ​កំពុងតែ​អនុវត្ត​។​

​លោកស្រី Pauline Carmona ក៏បាន​សរសើរ ការខិតខំ​ប្រឹងប្រែងរ​បស់​រដ្ឋបាល​រាជធានី​ភ្នំពេញ ក៏​ដូច​រដ្ឋាភិបាល​កម្ពុជា ដែល​បាន​ដាក់ចេញ​នូវ​គោលដៅ​អភិវឌ្ឍន៍​ទីក្រុង ក្នុងនោះ​រួមមាន ការដាក់ចេញ​នូវ​ការកសាង​ប្លង់គោល​អភិវឌ្ឍន៍​ទីក្រុង និង​ប្លង់គោល​ដឹកជញ្ជូន​សាធារណៈ ធ្វើឲ្យមាន​និរន្តរភាព​សម្រាប់ ការវិនិយោគ​យូរអង្វែង ដែល​គ្មាន​ហានិភ័យ​។​

​លោក​ឃួង ស្រេង បាន​សាទរ​ដល់​គម្រោង​សិក្សា​ជំ​ហ៊ាន​ទី​៣ របស់​ភាគី​បារាំង​លើ​គម្រោង​សាងសង់​ប្រពន្ធ័​ដឹកជញ្ជូន Tramway នៅ​រាជធានី​ភ្នំពេញ ដែលជា​ផ្នែក​មួយ​យ៉ាងសំខាន់ ក្នុង​ការកាត់បន្ថយ​ការកកស្ទះ​ចរាចរណ៍ ពង្រីក​តម្រាយ​ផ្លូវ ធ្វើដំណើរ​ឲ្យ​កាន់តែ​ទំនើប និង​ទាន់សម័យ បង្ក​ភាពងាយស្រួល ក្នុង​ការធ្វើដំណើរ​របស់​ប្រជាពលរដ្ឋ ដែល​កំពុងមាន​ការកើនឡើង​ឥតឈប់ឈរ ក្នុង​រាជធានី​ភ្នំពេញ​នាពេល​ប​ច្ច​ប្បន្ន​៕

 ពាក្យគន្លឹះ  លោកឃួងស្រេង

ព័ត៌មានផ្សេងទៀត