ឥណ្ឌូនេស៊ី​៖​​ប្រអប់​ខ្មៅ​​​ជា​ប្រភពព័ត៌មាន​​សំខាន់បំផុត​​បង្ហាញ​​មូលហេតុ​​យន្ដហោះ​ធ្លាក់​

31-10-2018 5:02 pm 1443
  ស្តាប់
រូបភាព​ប្រអប់ខ្មៅ​ទាំងពីរ​បំពាក់លើ​យន្ដហោះ
ស្តាប់ជាសំឡេង

​នៅពេល​ក្រុម​ស៊ើបអង្កេត​ធ្វើដំណើរ​ទៅដល់​ទីតាំង​យន្ដហោះ​ធ្លាក់ កិច្ចការ​ជា​អាទិភាព​របស់​ពួកគេ​គឺ​ស្វែងរក​ប្រអប់​ខ្មៅ​ទាំងពីរ​របស់​យន្ដហោះ ព្រោះ​ប្រអប់​ខ្មៅ​ជា​ឧបករណ៍​ផ្ទុក​ទិន្នន័យ ដែលជា​តម្រុយ​ដ៏​សំខាន់បំផុត​ដឹង​ពី​មូលហេតុ​យន្ដហោះ​ធ្លាក់​។ កាលពី​ព្រឹក​ថ្ងៃទី​៣១​តុលា​អាជ្ញាធរ​ឥណ្ឌូនេស៊ី​បានបង្ហាញ​ភាព​ជឿជាក់ថា ឧបករណ៍​ក្រុម​រុករក​ឃើញ​ទីតាំង​ដែល​យន្ដហោះ​ក្រុមហ៊ុន​Lion Air ប្រភេទ​ប៊ូ​អ៊ីង 737-MAX 8 ជើងហោះហើរ​JT610​ធ្លាក់​ហើយ ដូច្នេះ​សង្ឃឹម​នឹង​រកឃើញ​ប្រអប់​ខ្មៅ​ក្នុងពេល​ឆាប់ៗ​។​

​យោងតាម​ក្រុម​ជំនាញ​អាកាសចរណ៍ ប្រអប់​ខ្មៅ​ទាំងពីរ​ពិតជា​សំខាន់ ព្រោះ​ជា​គន្លឹះ​ស្វែងរក​ការពិត ដែល​វា​អាចជួយ​ពន្យល់​ពី​មូលហេតុ​គ្រោះថ្នាក់​ជិត​៩០​ភាគរយ​។ ប្រអប់​ខ្មៅ​ទាំងពីរ​មាន​ឈ្មោះថា “flight data recorder” ឬ “​ប្រអប់​ផ្ទុក​ទិន្នន័យ​ជើងហោះហើរ​” និង​មួយទៀត​ឈ្មោះ “cockpit voice recorder” ឬ “​ប្រអប់​ថត​សំឡេង​ក្នុង​បន្ទប់​អ្នកបើកបរ​”​។ គ្រប់​យន្ដហោះ​ពាណិជ្ជកម្ម​ទាំងអស់ តែងតែមាន​ប្រអប់​ខ្មៅ​ទាំងពីរ​។​

​ចំពោះ​ប្រអប់​ផ្ទុក​ទិន្នន័យ​ជើងហោះហើរ អាច​ប្រមូល​ព័ត៌មាន​ទាំងអស់​ទាក់ទង​នឹង​ល្បឿន រយៈ​កម្ពស់ ទិសដៅ​ហោះហើរ សម្រាប់​ទិន្នន័យ​ក្នុង​រយៈពេល​២៥​ម៉ោង​។ រីឯ​ប្រអប់​ថត​សំឡេង​ក្នុង​បន្ទប់​អ្នកបើកបរ អាច​រក្សាទុក​ការសន្ទនា និង​សំឡេង​ផ្សេងៗ​ទៀត​នៅក្នុង​កាប៊ីន​អ្នកបើក​យន្ដហោះ​។ ការវិភាគ​លើ​ទិន្នន័យ​នៅក្នុង​ប្រអប់​ខ្មៅ​ទាំងពីរ ត្រូវ​ចំណាយពេល​ច្រើន​ថ្ងៃ​ឬ​ច្រើន​សប្ដាហ៍ អាស្រ័យ​លើ​ស្ថានភាព​ដែល​វា​ស្ថិតនៅ​មុនពេល​រកឃើញ​។ យ៉ាងណាមិញ​ព័ត៌មាន​ទទួលបាន​ពី​ប្រអប់​ខ្មៅ មិន​បង្ហាញ​ជា​សាធារណៈ​ភ្លាមៗ​ទេ រហូតដល់​ប្រមូលបាន​ព័ត៌មាន​លម្អិត​ទាំងអស់ និង​មាន​ការត្រួតពិនិត្យ​ចប់សព្វគ្រប់​។​

​ប្រអប់​ខ្មៅ​ទាំងពីរ​ត្រូវបាន​ណែ​នាំឲ្យ​ប្រើប្រាស់​ពី​អ្នកជំនាញ​ក្នុង​ទសវត្ស​ឆ្នាំ​១៩៦០ អាច​ធន់​នឹង​កម្ដៅភ្លើង​និង​ជម្រៅ​ទឹក​ជ្រៅ​បាន គឺ​បើ​ស្ថិតក្នុង​កម្ដៅ​១,១០០​អង្សា​សេវា​អាច​រក្សា​រូបរាង​បាន​មួយ​ម៉ោង ហើយ​អាច​ស្ថិតក្នុង​ទឹក​ជម្រៅ​រហូតដល់​៦​ពាន់​ម៉ែត្រ​។ ប្រអប់​ខ្មៅ​នី​មួយៗ​មាន​ទម្ងន់​ចន្លោះ​ពី​៧​ទៅ​១០​គីឡូក្រាម ហើយ​វា​មាន​បំពាក់​ដោយ​ប្រព័ន្ធ​ពន្លឺ​ដែល​អាច​បញ្ចេញ​សញ្ញា​បាន​មួយខែ ហេតុនេះ​បង្ក​ភាពងាយស្រួល​ក្នុងការ​តាម​ស្វែងរក​។  ចំពោះ​យន្ដហោះ​ប្រភេទ​Airbus A350 និង A380 ក្នុងពេល​ឆាប់ៗ​នឹងត្រូវ​បំពាក់​ដោយ​ប្រអប់​ខ្មៅ​ដែល​អាច​អណ្ដែត​លើទឹក ជួយ​សម្រួល​ដល់​ការស្វែងរក​នៅពេល​យន្ដ​ហោះ​ធ្លាក់​ក្នុង​សមុទ្រ​។​

សូមបញ្ជាក់ថា យន្ដហោះ​ដឹក​អ្នកដំណើរ​ឥណ្ឌូនេស៊ី​ប្រភេទ​ប៊ូ​អ៊ីង​737-Max 8 ជើងហោះហើរ​JT610​របស់​ក្រុមហ៊ុន​Lion Air បាន​ធ្លាក់​ក្នុង​សមុទ្រ​ជ្វា​ក្រោយ​ហោះ​ចេញពី​អាកាសយានដ្ឋាន​ក្នុង​ទីក្រុង​ហ្សា​កាតា​តែ​១៣​នាទី​ប៉ុណ្ណោះ​។ នៅលើ​យន្ដហោះ​មាន​ផ្ទុក​មនុស្ស​សរុប​១៨៩​នាក់ ហើយ​គ្មាន​សង្ឃឹមថា​ពួកគេ​នៅ​រស់រានមានជីវិត​ឡើយ ក្រោយ​យន្ដហោះ​បាន​ធ្លាក់​តាំងពីព្រឹក​ថ្ងៃទី​២៩​តុលា​។ យន្ដហោះ​ប៊ូ​អ៊ីង​737-Max 8​ជា​យន្ដហោះ​ប្រភេទ​ថ្មី ទើប​ដាក់ឲ្យ​ដំណើរការកាល​ពី​ឆ្នាំមុន​ប៉ុណ្ណោះ ហើយ​យន្ដហោះ​ដែល​ធ្លាក់​ទើបតែ​ហោះហើរ​បាន​ប៉ុន្មាន​ខែ​ថ្មីៗ​នេះ​ទេ​។ កត្ដា​នេះ​កំពុង​បង្ក​ជា​ចម្ងល់​យ៉ាងខ្លាំង ស្របពេល​ក្រុម​ជំនាញ​ពុំទាន់​រកឃើញ​មូលហេតុ​ពិតប្រាកដ​៕

ព័ត៌មានផ្សេងទៀត