កូរ៉េខាងត្បូង​​ទទូច​ឲ្យ​​ពិភពលោក​​គួរតែ​ឆ្លើយតប​​ដោយ​វិជ្ជមាន​​ចំពោះ​​កូរ៉េខាងជើង​

27-09-2018 10:15 am 4233
  ស្តាប់
លោកមូន ជែអ៊ីន​ពេលថ្លែងក្នុងមហាសន្និបាតអង្គការសហប្រជាជាតិ
ស្តាប់ជាសំឡេង

​ប្រធានាធិបតី​កូរ៉េខាងត្បូង​លោក​មូន ជែ​អ៊ីន​កាលពី​ថ្ងៃ​ពុធ បាន​ទទូច​ឲ្យ​ពិភពលោក​គួរតែ​ឆ្លើយតប​ជាមួយ​ភាព​វិជ្ជមាន​ចំពោះ​កូរ៉េខាងជើង ដើម្បីឲ្យរ​ដ្ឋ​មួយនេះ​បន្ដដំណើរ​ការរំលាយ​នុយក្លេអ៊ែរ​ទាំងស្រុង​។ ថ្លែង​ក្នុង​អង្គ​មហាសន្និបាត​ក្នុង​ទីក្រុង​ញូវយ៉ក​សហរដ្ឋអាមេរិក លោក​មូនបាន​គូសបញ្ជាក់ថា លោក​គីម ជុង​អ៊ុន​មេដឹកនាំ​កូរ៉េខាងជើង បានសម្រេច​ដើរ​តាម​ជម្រើស​ថ្មី ដូច្នេះ​អន្ដរជាតិ​គួរតែ​ឆ្លើយតប​ជាមួយ​ឥរិយាបថ​វិជ្ជមាន​។

នៅក្នុង​កិច្ច​ជំនួប​ជា​លើក​ទី​បី​នៅ​កូរ៉េខាងជើង​ថ្មីៗ​នេះ លោក​មូនបាន​ឲ្យដឹងថា​លោកគី​មបាន​ផ្លាស់ប្ដូរ​ទិសដៅ​នៃ​ស្ថានភាព​នយោបាយ​លើ​ឧបទ្វីប​កូរ៉េ​បច្ចុប្បន្ន​។ កូរ៉េខាងជើង​បាន​ផ្លាស់ប្ដូរ​ពី​ការរស់នៅ​ដោយ​ឯកោ​ជា​យូរ​ឆ្នាំ ងាក​មក​ចូលរួម​ក្នុង​ចង្កោម​អន្ដរជាតិ​។ កូរ៉េខាងជើង​បាន​ឯកភាព​ចាត់វិធានការ​តាម​ដំណាក់កាល ដើម្បី​ឆ្ពោះទៅ​រំលាយ​នុយក្លេអ៊ែរ​ចេញពី​ឧបទ្វីប​កូរ៉េ​។ ដូច្នេះ​ត្រូវតែ​បន្ដ​គាំទ្រ​ឲ្យ​លោក​គីម​ដើរ​លើផ្លូវ​ដ៏​ត្រឹមត្រូវ​នេះ ស្វែងរក​សន្ដិភាព​ជា​និរន្ដរ៍​។ ដល់ពេល​ហើយ​ដែល​អន្ដរជាតិ​ឈប់​មាន​ឥរិយាបថ​រឹងទទឹង​ជាមួយ​កូរ៉េខាងជើង ហើយ​គួរ​ត្រឡប់​ទៅ​គាំទ្រ​អ្វីដែល​កូរ៉េខាងជើង​កំពុង​ធ្វើ​។​

​យ៉ាងណាមិញ​គោលជំហរ​របស់លោក​ប្រធានាធិបតី​កូរ៉េខាងត្បូង​មូន ជែ​អ៊ីន ត្រូវ​អាមេរិក​និង​ជប៉ុន​មាន​មតិយោបល់​ឆ្លើយតប​វិញ​ដែរថា កូរ៉េខាងជើង​ត្រូវតែ​បោះបង់ចោល​នុយក្លេអ៊ែរ​ទាំងស្រុង​សិន មុន​ស្នើឲ្យ​អន្ដរជាតិ​ដក​ទណ្ឌកម្ម​។ កូរ៉េខាងជើង​ត្រូវបាន​គេ​មើលឃើញថា យល់ព្រម​បោះបង់​កម្មវិធី​មី​ស៊ី​ល​និង​នុយក្លេអ៊ែ​រ ជា​ថ្នូរ​នឹង​ការដក​ទណ្ឌកម្មសេដ្ឋកិច្ច​។

​ស្ថិតក្រោម​ការដឹកនាំរ​បស់​អាមេរិក ក្រុមប្រឹក្សាសន្ដិសុខ​អង្គការសហប្រជាជាតិ​បាន​ដាក់ទណ្ឌកម្ម​បី​ដង​លើ​កូរ៉េខាងជើង​កាលពី​ឆ្នាំមុន​។ ទណ្ឌកម្ម​នេះ​ក្នុង​គោលបំណង​រាំងខ្ទប់​មិនឲ្យ​កូរ៉េខាងជើង​ទទួលបាន​ប្រាក់ចំណូល​ពី​បរទេស សម្រាប់​ផ្គត់ផ្គង់​កម្មវិធី​នុយក្លេអ៊ែ​រ​។ ប៉ុន្ដែ​អាមេរិក​ក៏​ប្រឈម​នឹង​ការរិះគន់​ពី​ចិន​និង​រុស្ស៊ី​ផងដែរ ទាមទារ​ឲ្យ​អាមេរិក​បន្ធូរបន្ថយ​ទណ្ឌកម្ម​លើ​កូរ៉េខាងជើង​។​

​ពាក់ព័ន្ធ​នឹង​ការរំលាយ​នុយក្លេអ៊ែរ​កូរ៉េខាងជើង រដ្ឋមន្ដ្រីការបរទេស​អាមេរិក​បានលើកឡើង​ពេល​ជួប​ជាមួយ​រដ្ឋមន្ដ្រីការបរទេស​កូរ៉េខាងជើង​ថា លោក​នឹង​ធ្វើដំណើរ​ទៅ​កូរ៉េខាងជើង​ខែក្រោយ ដើម្បី​ជំរុញ​ដំណើរការ​រំលាយ​នុយក្លេអ៊ែរ​នេះ​ឲ្យ​កាន់​តែមាន​ប្រសិទ្ធភាព​។ លោក​ក៏​នឹង​រៀបចំ​កិច្ចប្រជុំ​លើក​ទី​ពីរ​រវាង​លោក​ដូណាល់ ត្រាំ​និង​លោក​គីម ជុង​អ៊ុន​ក្នុងពេល​ឆាប់ៗ តប​តាម​ការស្នើសុំ​ពី​កូរ៉េខាងជើង​៕

ព័ត៌មានផ្សេងទៀត