លោក​ឃួង ស្រេង ណែនាំ​ឲ្យ​អាជ្ញាធរ​បន្ត​រឹតបន្តឹង​គ្រប់​បទ​ល្មើស​ពិសេស​គ្រឿងញៀន​

20-08-2018 4:29 pm 1252
  ស្តាប់
ស្តាប់ជាសំឡេង

​លោក ឃួ​ង ស្រេង អភិបាល​រាជធានី​ភ្នំពេញ បាន​ណែនាំ​ឲ្យ​អាជ្ញាធរ និង​មន្ត្រី​ពាក់ព័ន្ធ​ទាំងអស់ បន្ត​រឹតបន្តឹង​ការចុះ​ល្បាត និង​បង្ក្រាប​នូវ​រាល់​បទល្មើស ជា​ពិសេស​ពាក់ព័ន្ធ នឹង​បទល្មើស​គ្រឿងញៀន ដើម្បី​ផ្តល់​នូវ​សុខ​សុវត្ថិភាព ដល់​ប្រជាពលរដ្ឋ​។ 

​ការណែនាំ​នេះ ធ្វើឡើង នៅក្នុង​កិច្ចប្រជុំ​គណៈកម្មាធិការ​ត្រួតពិនិត្យ​គ្រឿងញៀន រាជធានី​ភ្នំពេញ នៅ​សាលា​រាជធានី​ភ្នំពេញ នា​ថ្ងៃ​ទី​២០ សីហា​នេះ ដោយ​មាន​ការចូលរួម​ពី​មន្ត្រីនគរបាល នៃ​មន្ទីរ​ប្រឆាំង​គ្រឿងញៀន ក្រសួងមហាផ្ទៃ អាជ្ញាធរ​ខណ្ឌ​ទាំង​១២ និង​មន្ត្រី​ពាក់ព័ន្ធ​ជាច្រើន​ផ្សេងទៀត​។​

​លោក ឃួ​ង ស្រេង មានប្រសាសន៍ថា កន្លងមក អាជ្ញាធរ​មូលដ្ឋាន ហាក់​ព្រងើយកណ្តើយ ចំពោះ​ការបង្ក្រាប ការផ្សព្វផ្សាយ អប់រំ អំពី​ផលប៉ះពាល់ នៃ​គ្រឿងញៀន ទៅ​ដល់​មហាជន យុវជន ធ្វើ​ឲ្យ​ការប្រើប្រាស់​គ្រឿងញៀន កើនឡើង​។ ដូច្នេះ​លោក​អភិបាល​រាជធានី​ភ្នំពេញ អំពាវនាវ ដល់​សមត្ថកិច្ច អាជ្ញាធរ​ពាក់ព័ន្ធ​ទាំងអស់ ត្រូវ​បង្កើន​ការ​រឹតបណ្តឹង ទាំង​ការ​ទប់ស្កាត់ ការអប់រំ និង​ផ្សព្វផ្សាយ​ឲ្យ បាន​ទូលំទូលាយ​បន្ថែមទៀត ដើម្បី​អនុវត្ត​គោលនយោបាយ ភូមិ​-​ឃុំ មាន​សុវត្ថិភាព​។​

​លោក​អភិបាល​រាជធានី​ភ្នំពេញ បាន​លើកឡើង​ទៀត​ថា ការ​ទប់ស្កាត់​គ្រឿងញៀន ទទួល​ជោគជ័យ​ទៅ​បាន គឺ​មិនមែន​ជា​បន្ទុក​របស់​ស្ថាប័ន​ណាមួយ ឬ បុគ្គល​ណា​ម្នាក់​នោះ​ទេ គឺជា​ការចូលរួម​ចំណែក ពី​គ្រប់ភាគី​ពាក់ព័ន្ធ ជាពិសេស ឪពុក ម្តាយ អាណាព្យាបាល លោកគ្រូ អ្នកគ្រូ ព្រះសង្ឃ​និង​ប្រជាពលរដ្ឋ​ទាំងអស់ ដើម្បី​ជោគវាសនា អនាគត កូនចៅ យើងទាំងអស់គ្នា​។​

សូមបញ្ជាក់ថា ​បើ​តាម​របាយការណ៍ ឲ្យដឹងថា ក្នុង​រយៈពេល​៦​ខែ ដើមឆ្នាំ​២០១៨ អាជ្ញាធរ​ជាតិ​ប្រយុទ្ធប្រឆាំង​គ្រឿងញៀន បង្ក្រាប​បទល្មើស​គ្រឿងញៀន​បាន​ចំនួន​៤​ពាន់​ករណី ឃាត់ខ្លួន​ជនល្មើស​បាន​ចំនួន​៨​ពាន់​នាក់​៕

 


 ពាក្យគន្លឹះ  លោកឃួងស្រេងគ្រឿងញៀន

ព័ត៌មានផ្សេងទៀត