Smart សាងសង់​ហេដ្ឋារចនាសម្ព័ន្ធ​បណ្តាញទូរស័ព្ទ​ចល័ត​បន្ថែម​នៅ​ខេត្តកំពង់ឆ្នាំង

23-07-2018 1:35 pm 775

ក្រុមហ៊ុន Smart Axiata ដែលជា​ប្រតិបត្តិ​ករ​ទូរស័ព្ទ​ចល័ត​ដ៏​ធំ និង​ឈានមុខ​មួយ​នៅក្នុង​ប្រទេស​កម្ពុជា បាន​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ប្រកាស​ចាប់ផ្តើម​បើក​ការដ្ឋាន​សាងសង់​ហេដ្ឋារចនាសម្ព័ន្ធ​បណ្តាញទូរស័ព្ទ​ចល័ត​ថ្មី នៃ​មូលនិធិ​កាតព្វកិច្ច​សេវា​សកល​ទូរគមនាគមន៍​ចំនួន​៣១ កន្លែង​នៅក្នុង​ខេត្ត​កំពង់ឆ្នាំង កាលពី​ថ្ងៃទី​២១ កក្កដា ។​

​ថ្លែង​ក្នុង​ពិធីបើកការដ្ឋាន​សាងសង់​ហេដ្ឋារចនាសម្ព័ន្ធ​បណ្តាញទូរស័ព្ទ​ចល័ត​ថ្មី នៅលើ​ទឹកដី​ខេត្តកំពង់ឆ្នាំង​នេះ លោក​ត្រាំ អ៊ីវតឹក រដ្ឋមន្ត្រីក្រសួង​ប្រៃសណីយ៍​បញ្ជាក់ថា ក្រសួង​បាន​ប្តេជ្ញាចិត្ត​ធ្វើការ​ជាមួយ​វិស័យ​ឯកជន ជាពិសេស​ការចូលរួម​បំពេញ​កាតព្វកិច្ច​បង់​វិភាគទាន​មូលនិធិ​កាតព្វកិច្ច​សេវា​សកល​ទូរគមនាគមន៍ របស់​ក្រុមហ៊ុន Smart ។ លោក​ថា ការចូលរួម​របស់​ក្រុមហ៊ុន Smart នឹង​ជួយ​ធ្វើឲ្យ​សេវា​គ្របដណ្ដប់​រលកអាកា​ស​ប្រព័ន្ធ​ទូរស័ព្ទ ឲ្យ​កាន់តែ​ប្រសើរ​នៅតាម​ជនបទ ដើម្បី​កាត់បន្ថយ​គម្លាត​ផ្នែក​ឌីជីថល​ក្នុងប្រទេស​កម្ពុជា​។​

​បើ​ផ្អែក​របាយការណ៍​របស់​ក្រុមហ៊ុន Smart បានឲ្យដឹងថា ខ្លួន​នឹង​ចំណាយ​ទុនបម្រុង​ចំនួន​៨០ លាន​ដុល្លារ​បន្ថែមទៀត​នៅ​ឆ្នាំនេះ ដើម្បី​ពង្រីក​ប្រព័ន្ធ 4G និង 4.5G នៅ​ទូទាំង ២៥​ខេត្ត​-​ក្រុង​ទូទាំងប្រទេស​។ ជាមួយគ្នានេះ គិត​រហូតមកទល់​បច្ចុប្បន្ន ក្នុងចំណោម​ស្ថានីយ៍​មូលដ្ឋាន​ចំនួន ២,៥០០ កន្លែង​របស់ Smart មាន​ជាង ៩០ ភាគរយ​ហើយ​ដែលមាន​បំពាក់​ប្រព័ន្ធ 4G ខណៈដែល​ស្ថានីយ៍​មូលដ្ឋាន ១០០ ភាគរយ​សុទ្ធតែ​បំពាក់​ដោយ​ប្រព័ន្ធ 3G ។ 

​នាយក​ប្រតិបត្តិ​ក្រុមហ៊ុន Smart Axiata លោក ថូ​ម៉ាស ហ៊ុន បាន​អះអាងថា ចាប់តាំងពី​ក្រុមហ៊ុន Smart ផ្តើម​ប្រតិបត្តិការ​របស់ខ្លួន​ក្នុងប្រទេស​កម្ពុជា  Smart តែងតែ​ខិតខំ​ប្រឹងប្រែង​ផ្តល់នូវ​សេវា​ទូរស័ព្ទ​ចល័ត​ទំនើប​បំផុត​មានតម្លៃ​សមរម្យ និង​អាច​ទុកចិត្តបាន​ជាទីបំផុត​។ តាមរយៈ​ការប្រកាស​ដាក់​ឲ្យប្រើ​នូវ​ច្បាប់​ស្ដីពី​ទូរគម​នាគម​ន៍ មូលនិធិ​អភិវឌ្ឍន៍​ទូរគមនាគមន៍​ចំនួន​ពីរ​របស់​កម្ពុជា ពោលគឺ​មូលនិធិ​កាតព្វកិច្ច​សេវា​សកល​ទូរគមនាគមន៍ (USOF) និង​មូលនិធិ​កសាង​សមត្ថភាព​ការស្រាវជ្រាវ និង​អភិវឌ្ឍន៍​(CBRDF) ត្រូវបាន​បង្កើតឡើង​នៅ​ឆ្នាំ ២០១៧ ។ មូលនិធិ​ទាំងនេះ មាន​គោលបំណង​ជំរុញ​ការអភិវឌ្ឍ​ហេដ្ឋារចនាសម្ព័ន្ធ​សេវាកម្ម និង​ការអភិវឌ្ឍ​ធនធានមនុស្ស​នៅ​ទូទាំងប្រទេស​។ 

នៅក្នុង​ឆ្នាំ ២០១៧ ក្រុមហ៊ុន Smart បាន​ប្តេជ្ញា​អនុវត្ត​គម្រោង​ជាមួយ​ក្រសួង​ប្រៃសណីយ៍ និង​ទូរគមនាគមន៍ ដោយ​ប្រើប្រាស់​ប្រាក់​វិភាគទាន​របស់ខ្លួន ជាង​៦​លាន​ដុល្លា​អាមេរិក ដែល​បាន​បញ្ចូល​ក្នុង​មូលនិធិ​ទាំងពីរ​នេះ​។​

​ក្រុមហ៊ុន Smart Axiata Co., Ltd គឺជា​ប្រតិបត្តិ​ករ​ទូរគមនាគមន៍​ឈានមុខ​គេ​ក្នុង​ព្រះរាជាណាចក្រ​កម្ពុជា ដែល​បច្ចុប្បន្ន​បាន​នឹង​កំពុង​បម្រើ​អតិថិជន​ច្រើនជាង​៨ លាន​នាក់ ក្រោម​ស្លាក​សញ្ញា “Smart”​។ ក្រុមហ៊ុន Smart Axiata គឺជា​បុត្រ​សម្ព័ន្ធ​នៃ​ក្រុមហ៊ុនមេ មាន​ឈ្មោះថា Axiata Group Berhard ដែលជា​ក្រុមហ៊ុន​ផ្តល់​សេវា​ទូរគមនាគមន៍​ធំជាងគេ​បង្អស់​មួយ​ក្នុងចំណោម​ក្រុមហ៊ុន​ធំៗ​នានា​ក្នុង​ទ្វិបអាស៊ី​៕

​ដោយ៖ធុច ធារ៉ា

 ពាក្យគន្លឹះ  ក្រុមហ៊ុនSmart

ព័ត៌មានផ្សេងទៀត