គ​.​ជ​.​ប បដិសេធ​សំណើរ​របស់ LDP រឿង​ធ្វើ​វិសោធនកម្ម​ការ​គូស​សន្លឹកឆ្នោត​

16-07-2018 5:26 pm 1717
  ស្តាប់
ស្តាប់ជាសំឡេង

​គណៈកម្មាធិការ​ជាតិ​រៀបចំ​ការបោះឆ្នោត​(​គ​.​ជ​.​ប​) ក្នុង​លិខិត​ចុះ​ថ្ងៃទី​១៥ ខែកក្កដា ឆ្នាំ​២០១៨​នេះ​បាន​ឆ្លើយតប​ទៅនឹង​ប្រធាន​គណបក្ស​សម្ព័ន្ធ​ដើម្បី​ប្រជាធិបតេយ្យ ក្នុងន័យ​បដិសេធ​ករណី​ស្នើរ​សុំ​ធ្វើ​វិសោធនកម្ម​ចំណុច ៨.១១.១ នៃ​បទបញ្ជា និង​នីតិវិធី សម្រាប់​ការបោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៦ ឆ្នាំ​២០១៨​។

​តាមរយៈ​លិខិត គ​.​ជ​.​ប បាន​បញ្ជាក់ថា បន្ទាប់ពី​បាន​ពិនិត្យ​សំណើរ​សុំ​ធ្វើ​វិសោធនកម្ម​ចំណុច ៨.១១.១​នៃ​បទបញ្ជា និង​នីតិវិធី របស់​ប្រធាន​គណបក្ស​សម្ព័ន្ធ​ដើម្បី​ប្រជាធិបតេយ្យ​យ៉ាង​យកចិត្តទុកដាក់​រួចមក គ​.​ជ​.​ប មិនអាច​ធ្វើ​វិសោធនកម្ម​លើ​ចំណុច​ទាំងបី​ខាងលើ​តាម​សំណើរ​បានទេ​។​

​មិនអាច​ធ្វើបាន ដោយ​ផ្អែកទៅលើ​មូលដ្ឋាន​ច្បាប់ និង​បទពិសោធន៍​របស់ គ​.​ជ​.​ប កន្លងមក​ដូចជា​៖ ទី​១ ការ​តម្រូវឲ្យ​អ្នកបោះឆ្នោត​គូសសញ្ញា​ធិ​ក (√) តែមួយគត់​ដើម្បី​គាំទ្រ​គណបក្សនយោបាយ​នៅលើ​សន្លឹកឆ្នោត​គឺ​មិន​ឆ្លុះបញ្ចាំង​អំពី​បទ​ប្បញ្ញត្តិ​ក្នុង​កថាខណ្ឌ​ទី​២​នៃ​មាត្រា​១០៥ និង​មាត្រា​១២០ ដែល​កំណត់​អំពី​របៀប​គូស​លើ​សន្លឹកឆ្នោត​តាមរយៈ​គំនូស​សញ្ញា​។

តាម​បទ​ប្បញ្ញត្តិ​នេះ​មានន័យថា មិនមាន​ការចែង​ដែល​តម្រូវឲ្យ​អ្នកបោះឆ្នោត​ត្រូវតែ​គូសសញ្ញា​ធិ​ក​តែមួយគត់​នោះឡើយ ពោល​ច្បាប់​អនុញ្ញាតឲ្យ​អ្នកបោះឆ្នោត​គូ​សសញ្ញា​ទូទៅ​នៅលើ​សន្លឹកឆ្នោត វៀរលែងតែ​គំនូស​ដែល​បង្ហាញ​ពី អត្តសញ្ញាណ​របស់​អ្នកបោះឆ្នោត​ដូច​ចែង​ក្នុង​ចំណុច​៣ នៃ​កថាខណ្ឌ​ទី​៣ មាត្រា​១២០​នៃ​ច្បាប់​ស្តីពី​ការបោះឆ្នោត​ជ្រើសតាំង​តំណាងរាស្ត្រ​។​

​ទី​២ ការទទួលយក​ជា​បានការ​នូវ​គំនូស​សញ្ញា​គាំទ្រ​ជាទូទៅ​នេះ​ត្រូវបាន​អនុវត្ត​តាំងពី​ការបោះឆ្នោត​សភាធម្មនុញ្ញ ឆ្នាំ​១៩៩៣​ដែល​រៀបចំ​ឡើយ​ដោយ អ៊ុនតាក់​មកម្ល៉េះ ហើយ​បទពិសោធន៍​នៃ​គំនូស​ជាទូទៅ​នេះ ក៏​ត្រូវបាន​បន្ត​អនុវត្ត​សម្រាប់​ការបោះឆ្នោត​ក្រោយៗ​ទៀត ក្នុង​គោលបំណង​ធានា​ការពារ​សំឡេង​របស់​អ្នកបោះឆ្នោត​ក្នុង​បរិបទ​នៅ​កម្ពុជា​។​

ទី​៣​ តាម​ការសិក្សា​ក្នុងប្រទេស​ជាច្រើន​លើ​ពិភពលោក​ដូចជា​ចក្រភព​អង់គ្លេស​ជាដើម គេ​មិនដែល​តម្រូវឲ្យ​អ្នកបោះឆ្នោត​គូ​សសញ្ញា​ជាក់លាក់​ណាមួយ​ឡើយ​។​

និង​ទី​៤ ស្ថិតក្នុង​លក្ខខណ្ឌ​ដែល​គ​.​ជ​.​ប បានកំណត់​នេះ គឺ​មិន​ធ្វើឲ្យប៉ះពាល់​ដល់​ការសម្ងាត់​នៃ​ការ​បោះឆ្នោត ដូច​មានចែង​ក្នុង​មាត្រា​១០៦​នៃ​ច្បាប់​ស្តីពី​ការបោះឆ្នោត​ជ្រើសតាំង​តំណាងរាស្ត្រ​ទេ​។

​ចំពោះ​ជន​ណា​ដែល​ព្យាយាម​ដោយ​ទុច្ចរិត​ក្នុង​គោលបំណង​កត់សម្គាល់ ដើម្បី​ឲ្យដឹងថា​អ្នកបោះឆ្នោត​ណា​ម្នាក់ បោះឆ្នោតឲ្យ​គណបក្ស​ណា ជន​នោះ​នឹងត្រូវ​ទទួល​ការព្រមាន​ពី​ប្រធានការិយាល័យ​រាប់​សន្លឹកឆ្នោត​។ ក្នុងករណី​នៅតែ​បន្តសកម្មភាព​ជា​លើក​ទី​ពីរ នឹងត្រូវ​ចាត់ទុកថា​ជា​ករណី​រំលោភ​លើ​គោលការណ៍​សម្ងាត់​នៃ​ការបោះឆ្នោត ហើយ​ជន​ដែលមាន​ការពាក់ព័ន្ធ​ត្រូវ​បណ្តេញ​ចេញពី​ការិយាល័យ​រាប់​សន្លឹកឆ្នោត ហើយ​ត្រូវ​ទទួលទោស​ស្របតាម​ច្បាប់​ស្តីពី​ការបោះឆ្នោត​ទៀតផង​។​

​គួរ​បញ្ជាក់ថា កាលពី​ថ្ងៃទី​១២ ខែកក្កដា ២០១៨​កន្លងទៅ គណបក្ស​សម្ព័ន្ធ​ដើម្បី​ប្រជាធិបតេយ្យ (LDP) បាន​ស្នើឲ្យ​គ​.​ជ​.​ប​ធ្វើ​វិសោធនកម្ម​ចំណុច ៨.១១.១ នៃ​បទបញ្ជា និង​នីតិវិធី​សម្រាប់​ការបោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៦ ឆ្នាំ​២០១៨ ពាក់ព័ន្ធ​នឹង​ការ​គូស​លើ​សន្លឹកឆ្នោត​៕

​ដោយ​៖​ប៉ា សុ​ខេង 

 ពាក្យគន្លឹះ  គជប​LDPសន្លឹកឆ្នោត

ព័ត៌មានផ្សេងទៀត