ស្ពាន​អាកាសស្តុ​បផ្សារ​ដី​ហុយនឹង​បើក​ឲ្យ​ដំណើ​រការ​នៅ​ដើម​សប្តាហ៍​ក្រោយ

30-06-2018 2:57 pm 2207
  ស្តាប់
ស្តាប់ជាសំឡេង

​ស្ពាន​អាកាស​មិត្តភាព​កម្ពុជា​-​ចិន (​ចំណុចស្តុ​បផ្សារ​ដី​ហុយ​) នឹង​សម្ភោ​ធ​ដាក់ឱ្យ​ប្រើប្រាស់​ជា​ផ្លូវការ​នៅ​ថ្ងៃ​ទី​០២ កក្កដា ឆ្នាំ​២០១៨ ក្រោម​វត្តមាន លោកនាយក​រដ្ឋមន្ត្រី ហ៊ុន សែន​។ នេះ​បើ​តាម​សេចក្ដី​ជូន របស់​សាលា​រាជធានី​ភ្នំពេញ នៅ​ថ្ងៃ​ទី​២៩ ខែមិថុនា​។​

​សេចក្តីជូនដំណឹង ក៏​បាន​ណែនាំ​ម្ចាស់​យានយន្ត​គ្រប់​ប្រភេទ ដែល​ត្រូវ​ធ្វើ​ចរាចរណ៍ ចេញ​-​ចូល​រាជធានី​ភ្នំពេញ ត្រូវ​រក្សា​នូវ​សណ្ដាប់ធ្នាប់ និង​បញ្ចៀស​បញ្ហា​កកស្ទះ​ចរាច​រណ៍ ពេល​ឆ្លងកាត់​ទីតាំង​ខាងលើ​ដោយ​រវាង​តាមផ្លូវ​ដូចខាងក្រោម​នេះ​៖ 

​ចំពោះ​ម្ចាស់​យានយន្ត​ចរាចរណ៍​ដែល​មកពី​ទិស​ខាងលិច តាម​បណ្ដោយ​មហាវិថី​សហព័ន្ធរុស្ស៊ី ពី​ព្រលាន​យន្តហោះ​ចូល​រាជធានី ត្រូវ​ធ្វើដំណើរ​តាម​ផ្លូវ​ពង្វាង​ទៅ​ផ្លូវ​លេខ ២០០៤ បត់​ស្ដាំ​ទៅ​ទិស​ខាងត្បូង ឬ​ផ្លូវ​លេខ​២០១១ បត់​ឆ្វេង ទៅ​ទិស​ខាងជើង បត់​ស្ដាំ​ទៅ​ទិស​ខាងត្បូង​តាមផ្លូវ​បេតុង​ឆ្ពោះទៅ​វត្ត​អង្គ​តា​មិញ​។ ចំណែក​យានយន្ត ចរាច​រណ៍ តាម​បណ្ដោយ​មហាវិថី​សហព័ន្ធរុស្ស៊ី​ចេញទៅ​ក្រៅ​រាជធានី ត្រូវ​ធ្វើដំណើរ​តាម​ផ្លូវ​ពង្វាង​បត់​ឆ្វេង ក្រោម​ស្ពាន​អាកាស ចូល​ផ្លូវ​ណ័រ​ប្រីត ឬ​បត់​ស្ដាំ​ត្រង់ ចំណុច​ក្រោម​ស្ពាន​អាកាស ទៅ​មហាវិថី​មិត្តភាព​ភ្នំពេញ​-​ហាណូយ​។​

​រីឯ​យានយន្ត​ចរាច​រណ៍ ពី​ទិស​ខាងជើង ទៅ​ទិស​ខាងត្បូង និង​ពី​ទិស​ត្បូង​ទៅ​ទិស​ខាងជើង​តាម​មហាវិថី​មិត្តភាព​ភ្នំពេញ​-​ហាណូយ និង​ផ្លូវ​លេខ​១០១៩ (​ណ័រ​ប្រ៊ីត​) ត្រង់​ចំណុច​ក្រោម​ស្ពាន​អាកាស​នេះ​អនុញ្ញាត​ឲ្យ​ចរាចរធ​ម្មតា​។

​គួរ​បញ្ជាក់ដែរថា  ស្ពាន​អាកាសស្តុ​បផ្សារ​ដី​ហុយ​នេះ ចាប់ផ្តើម​សាងសង់​កាលពី ខែ​សីហា​ឆ្នាំ​២០១៦ និង​បញ្ចប់​នៅ​ឆ្នាំ​២០១៨​។ ស្ពាន​នេះ​មាន​បណ្តោយ​៩០៥​ម ទទឹង​១៦.៥​ម  ដែល​ជា​គម្រោង​ហិរញ្ញប្បទាន​របស់​សាធារណរដ្ឋ​ប្រជាមានិត​ចិន  ស្ថិត​នៅលើ​ដងផ្លូវ​សហព័ន្ធ​រុស្សី ប្រសព្វ​ជាមួយ​ផ្លូវ​លេខ​១០១៩ (​ស្តុប​ផ្សារ​ដី​ហុយ​)៕

ព័ត៌មានផ្សេងទៀត