រុស្ស៊ី​៖​​គ្មាន​ការពិត​​គាំទ្រ​​ការចោទប្រកាន់ថា​​រុស្ស៊ី​ជា​អ្នកបាញ់​​ទម្លាក់​យន្ដហោះ​​MH17​​ឡើយ​

26-05-2018 3:34 pm 1152
  ស្តាប់
បំណែក​យន្ដហោះ​ដឹកអ្នកដំណើរ​ម៉ាឡេស៊ី​MH17 ក្រោយពេលធ្លាក់
ស្តាប់ជាសំឡេង

​រដ្ឋមន្ដ្រីការបរទេស​រុស្ស៊ី​លោក​Sergei Lavrov បាន​ចេញមុខ​ច្រានចោល​របាយការណ៍​របស់​ក្រុម​ស៊ើបអង្កេត​ដឹកនាំ​ដោយ​ហូ​ឡង់ ដែលថា​រុស្ស៊ី​ជា​អ្នកបាញ់​ទម្លាក់​យន្ដហោះ​ដឹក​អ្នកដំណើរ​ម៉ាឡេស៊ី​MH17​កាលពី​ឆ្នាំ​២០១៤​។ លោក​រដ្ឋមន្ដ្រី​រុស្ស៊ី​បាន​ប្រាប់​អ្នកសារព័ត៌មាន​កាលពី​ថ្ងៃទី​២៥​ឧសភា​ថា រដ្ឋមន្ដ្រីការបរទេស​ហូឡង់​បាន​ទូរស័ព្ទម​កលោក និយាយថា​គ្មានអ្វី​ត្រូវ​សង្ស័យ​ឡើយ​ដែល​មី​ស៊ី​ល​ប្រភេទ​BUK​ហោះ​ចេញពី​រុស្ស៊ី​។ ប៉ុន្ដែ​លោក​Lavrov​បាន​សួរ​ទៅវិញ​ថា​មាន​ភស្ដុតាង​អ្វី​មក​អះអាង រដ្ឋមន្ដ្រីការបរទេស​ហូឡង់​មិន​បានផ្ដល់​ការពិត​ណាមួ​យ​ឡើយ​។​

​លោក​Lavrov​បាន​ចោទ​ហូឡង់​ថាចង់​ប្រើ​សោកនាដកម្ម​ធ្លាក់​យន្ដ​ហោះ​សម្លាប់​មនុស្ស​២៩៨​នាក់​នេះ ដើម្បី​សម្រេច​គោលនយោបាយ​របស់គេ​ប៉ុណ្ណោះ​។ លោក​ថា​របាយការណ៍​ដែល​ក្រុម​ស៊ើបអង្កេត​បានប្រកាស​ជា​សាធារណៈ​ជា​លើកដំបូង​មិន​ត្រឹមត្រូវ​ទេ គ្មាន​អាវុធ​បែបនេះ​ធ្លាប់​ហោះ​ឆ្លងកាត់​ព្រំដែន​អ៊ុ​យក្រែន​-​រុស្ស៊ី​ឡើយ​។ វា​ជា​ការប៉ុនប៉ង​មួយ​ធ្វើឲ្យ​រុស្ស៊ី​អាក់​អន់ចិត្ដ និង​ក្លាយជា​អ្នក​បង្កហេតុ​នៅក្នុង​ក្រសែភ្នែក​សហគមន៍​អន្ដរជាតិ​ប៉ុណ្ណោះ​។​

​មន្ដ្រី​ស៊ើបអង្កេត​ជាន់ខ្ពស់​ហូ​ឡង់​លោក​Wilbert Paulissen បាន​និយាយ​កាលពី​ថ្ងៃទី​២៤​ឧសភា​ថា មី​ស៊ី​ល​ប្រភេទ BUK-TELAR​ដែល​បាញ់​ទម្លាក់​យន្ដហោះ​MH17  បាន​ហោះ​មកពី​កងវរសេនាធំ​ប្រឆាំង​យន្ដហោះ​ចម្បាំង​ទី​៥៣ មាន​មូលដ្ឋាន​នៅក្នុង​ប្រទេស​រុស្ស៊ី​។ លោក​បាន​ប្រាប់​អ្នកសារព័ត៌មាន​ថា កងវរសេនាធំ​ទី​៥៣ ជា​ផ្នែក​មួយ​នៃ​កងកម្លាំងប្រដាប់អាវុធ​របស់​រុស្ស៊ី​។​

​សូម​រម្លឹកថា យន្ដហោះ​ដឹក​អ្នកដំណើរ​ម៉ាឡេស៊ី​MH17 ត្រូវបាន​បាញ់​ទម្លាក់​កាលពី​ថ្ងៃទី​១៧​ខែកក្កដា​ឆ្នាំ​២០១៤ ខណៈ​ហោះ​ពី​ទីក្រុង​អាម​ស្ទែ​ដាម​ប្រទេស​ហូ​ឡង់ ឆ្ពោះទៅ​ទី​ក្រុងកូឡា​ឡាំ​ពួរ​ប្រទេស​ម៉ាឡេស៊ី​។ នៅលើ​យន្ដហោះ​ផ្ទុក​មនុស្ស​សរុប​២៩៨​នាក់ ភាគច្រើន​ជា​ជនជាតិ​ហូ​ឡង់​។ នេះ​ជា​សោកនាដកម្ម​ធំ​បំផុត​ទី​ពីរ​របស់​ម៉ាឡេស៊ី បន្ទាប់ពី​យន្ដហោះ​ដឹក​អ្នកដំណើរ​MH370​ផ្ទុក​មនុស្ស​២៣៩​នាក់ បាន​បាត់​ដំណឹង​តាំងពី​ថ្ងៃទី​០៨​ខែ​មីនាឆ្នាំ​២០១៤ រហូតដល់​បច្ចុប្បន្ន​មិនដឹង​ទៅ​ទីណា​៕

 ពាក្យគន្លឹះ  រុស្ស៊ីយន្ដហោះMH17

ព័ត៌មានផ្សេងទៀត