រដ្ឋាភិបាល​សម្រេច​ផ្លាស់ប្តូរ​ទម្រង់​សន្លឹក​សម្គាល់​ម្ចាស់​អចលនវត្ថុ​ថ្មី​

12-05-2018 8:42 am 5018

​រាជរដ្ឋាភិបាល​កម្ពុជា បានសម្រេច​ផ្លាស់ប្តូរ​ទម្រង់​នៃ​សន្លឹក​វិញ្ញាបនបត្រ​សម្គាល់​ម្ចាស់​អចលនវត្ថុ ដែល​គ្រោង​នឹង​ដាក់​ឱ្យ​ប្រើប្រាស់ ចាប់ពី​ថ្ងៃ​ទី​០១ ខែមិថុនា ឆ្នាំ​២០១៨ ។ នេះ​បើ​តាម​លិខិត​របស់​ទីស្តីការគណៈរដ្ឋមន្ត្រី ស្នើ​ទៅ​កាន់​ក្រសួង​រៀបចំ​ដែនដី នគរូបនីយកម្ម និង​សំណង់ ធ្វើឡើង​នៅ​ថ្ងៃទី​០៧ ខែ​ឧសភា ។​

​លិខិត​ដដែល​បញ្ជាក់​ថា ទម្រង់​នៃ​សន្លឹក​វិញ្ញាបនបត្រ​នេះ បាន​រក្សា​នូវ​រូប​ប្រាសាទអង្គរវត្ត ដែល​អាច​មើលឃើញ​ក្រោម​ពន្លឺ​, អក្សរ Copy នឹង​លេចឡើង​នៅ​ពេល​ធ្វើការ​ថតចម្លង​សន្លឹក​វិញ្ញាបនបត្រ និង​រូប​ព្រះរាជ​សង្ហា​ពណ៌​ក្រហម នឹង​មើលឃើញ​ពេល​សីតុណ្ហភាព​ត្រជាក់ ។ ដោយឡែក ចំណុច​ដែល​មាន​ការកែប្រែ និង​បន្ថែម​ថ្មី​រួមមាន ៖ បន្ថែម QR Code សម្រាប់​សាធារណៈជន​អាច​ផ្ទៀងផ្ទាត់​ព័ត៌មាន​លើ​ប័ណ្ណ ស្ថិតនៅក្រោម​ផ្នែក​ខាងឆ្វេង នៃ​សន្លឹក​វិញ្ញាបនបត្រ​, ត្រូវបាន​ដកចេញ​នូវ​ពាក្យ «​វិញ្ញាបនបត្រ​សម្គាល់​ម្ចាស់​អចលនវត្ថុ​» ដែល​មាន​ទម្រង់​អក្សរ​តូចៗ ព្រា​លៗ នៅលើ​សន្លឹក​វិញ្ញាបនបត្រ​មុន​, បាន​បញ្ចូល​នូវ​ផែនទី​នៃ​ព្រះរាជាណាចក្រ​កម្ពុជា ជា​ទម្រង់​ព្រាលៗ នៅ​កណ្តាល​សន្លឹក​វិញ្ញាបនបត្រ និង​ពាក្យ « វិញ្ញាបនបត្រ​សម្គាល់​ម្ចាស់​អចលនវត្ថុ » ដែល​មាន​ទម្រង់​អក្សរ​តូច​ព្រា​លៗ លក្ខណៈ​ជា​ខ្សែបន្ទាត់​កាត់​ទទឹង ពេញ​ផ្ទៃ​នៃ​ផែនទី និង​ពាក្យ AIDOBMAC FO MODGNIK, KINGDOM OF CAMBODIA មាន​ទម្រង់​អក្សរ​តូច​ព្រា​លៗ នៅ​តាម​ដង​ទន្លេមេគង្គ និង​បន្ថែម​លេខ​រៀង​វិញ្ញាបនបត្រ ពី​៧​ខ្ទង់ ទៅ​៨​ខ្ទង់​វិញ ៕ (​ដោយ​៖ គង់ ឧត្តម​)

ព័ត៌មានផ្សេងទៀត