ក្រសួងសុខាភិបាល​នៅតែ​បញ្ជាក់ថា ស្រា ស​ជា​មូលហេតុ​ពុល​ស្លាប់​នៅ​ខេត្តក្រចេះ​

09-05-2018 11:08 am 1016
  ស្តាប់
ស្តាប់ជាសំឡេង

​ក្រសួង​សុខាភិបាល​បាន​រកឃើញ​ហើយ​នូវ​មូលហេតុ​ដែល​បណ្តាលអោយ​ប្រជាពលរដ្ឋ​នៅ​ខេត្ត​ក្រចេះ រងគ្រោះ និង​ស្លាប់​ជា​បន្តបន្ទាប់ ដែល​ករណីនេះ​បង្ក​ការភ្ញាក់ផ្អើល និង​ភ័យខ្លាច រហូត​ប្រជាពលរដ្ឋ​មួយចំនួន​បាន​បោះបង់​លំនៅដ្ឋាន របស់គេ​ទៀតផង​។​

ករណី​ពុល​ស្លាប់​ប្រជាពលរដ្ឋ​នៅ​ខេត្ត​ក្រចេះ បើតាម​ការសន្និដ្ឋាន របស់​ក្រសួងសុខាភិបាល នៅ​ល្ងាច​ថ្ងៃទី​៨​ខែ​ឧសភា  បាន​បញ្ជាក់ថា ប្រជាពលរដ្ឋ ដែល​ពុល​គឺ​ដោយសារ​ពិសា​ស្រាស ដែលមាន​ជាតិ​មេ​តា​ណុល​ខ្ពស់​លើស​កម្រិត និង​ពុល​ដោយសារ​ការបរិភោគ​ទឹក​យក​ពី​ព្រែក​តេ និង​អូរ​គគី ដែលមាន​ជាតិគីមី​ពុល​ដោយសារ​ថ្នាំ​បាញ់​ស្មៅ និង​សត្វល្អិត ដែល​ហូរ​ចូលក្នុង​ព្រែក និង​អូ​នោះ ដោយមាន​កំហាប់​លើស​កម្រិត​។​
​យោងតាម​សេចក្តីប្រកាស​ពត៌មានរ​បស់​ក្រសួង​សុខាភិបាល បាន​បញ្ជាក់ថា លទ្ធផល​ទទួលបាន​ពី​មជ្ឈមណ្ឌល​ជាតិ​ពិសោធន៍​សុខាភិបាល និង​មន្ទីរពិសោធន៍​នៃ​វិទ្យាស្ថាន បច្ចេកវិទ្យា​កម្ពុជា​(​តិច​ណូ​) សំណាក​ស្រាស និង​ទឹក ដែល​យក​ចេញពី​ប្រភព​ដែល​សង្ស័យថា​ពុល ត្រូវបាន​បញ្ជូនមក​ពិសោធន៍​៖

១៖ នៅ​ថ្ងៃទី​៧ ខែ​ឧសភា ឆ្នាំ​២០១៨ លទ្ធផល​ទទួលបាន​ពី​ការ​ធ្វើតេស្ត​លើ​សំណាក​ស្រាស ឃើញថា មាន​ជាតិ​មេ​តា​ណុល​ខ្ពស់​លើស​កម្រិត​រហូតដល់​១៤,៩%​ដែល​ធ្វើអោយពុល​ខ្លាំង ហើយ​កម្រិត​មិន​ពុល​នោះ​មិនត្រូវ​លើសពី​០,១%​ឡើយ​។​

២៖​នៅ​ថ្ងៃទី ៨ ខែ​ឧសភា ឆ្នាំ​២០១៨ លទ្ធផល​ទទួលបាន​ពី​ការ​ធ្វើតេស្ត​លើ​សំណាក​ទឹក ឃើញថា មាន​ជាតិពុល​ដែល​បណ្តាលមកពី​ថ្នាំ​បាញ់សម្លាប់​ស្មៅ និង​ថ្នាំ​សម្លាប់​សត្វល្អិត ហូរ​ចូលក្នុង​ព្រែក​តេ និង​អូរ​គគី មាន​លើសពី​កម្រិតស្តង់ដារ​រហូតដល់​ពី ១២,៣៩ppd​ដល់ ២៦,១២ppd (ppd:part per billion =microgram per liter) ហើយ​កំហាប់​សរុប​មិនត្រូវ​លើសពី ០,៥ ppd ឡើយ​(​តាម​ស្តង់ដារ​អឺរ៉ុប​)​។​

​ក្រសួង​ក៏បាន​ហាម​មិនអោយ​ប្រជាពលរដ្ឋ​ដែល​រស់នៅ​តំបន់​កើត​ហេតុការណ៍​ក្នុង​ខេត្តក្រចេះ​នោះ ដាច់ខាត​បញ្ឈប់​ការ​ពិសា​ស្រាស ដែល​បិត និង​លក់​ក្នុង​មូលដ្ឋាន និង​ហាម​ដាច់ខាត​មិនត្រូវ​ប្រើប្រាស់​ទឹក​ព្រែក​តេ និង​ទឹកអូរ​គគី ជា​បណ្តោះអាសន្ន ហើយ​ប្រជាពលរដ្ឋ​ទាំងអស់​ត្រូវអនុវត្ត​អនាម័យ​លើ​ចំណីអាហារ​ស្អាត រស់នៅ និង​ហូប​ស្អាត​។​

សូម​រំលឹកថា មាន​ហេតុការណ៍​មួយ​បាន​កើតឡើង​នៅ​ថ្ងៃទី​៥ ខែ​ឧសភា ឆ្នាំ​២០១៨ ស្ថិតនៅ​ភូមិ​ស្រែ​នន​និង​ភូមិ​អាល​ច ក្នុង​ឃុំ​កន្ទួត ស្រុក​ចិត្រ​បុរី ខេត្ត​ក្រចេះ មាន​ករណី​ពុល ដែល​សង្ស័យថា​ពុល​ទឹក ធ្វើអោយ​ប្រជាពលរដ្ឋ​មាន​រោគសញ្ញា​៖ ឈឺ​ពោះ​, ក្អួតចង្អោរ​, ឈីក​, អស់កម្លាំង​, ទន់ដៃទន់ជើង​, វិលមុខ និង​ថប់ដង្ហើម រហូត​បណ្តាលឲ្យ​ស្លាប់​និង​ជនរងគ្រោះ​ជាច្រើន​នាក់​ផ្សេងទៀត​ត្រូវបាន​ដឹកបញ្ជូន​ទៅកាន់​មន្ទីរពេទ្យបង្អែក​ខេត្ត និង​មន្ទីរពេទ្យ​កាល់់ម៉ែត​រាជធានី​ភ្នំពេញ​។

​ក្រសួង​សុខាភិបាល​បាន​បញ្ជាក់ថា ក្នុងករណីនេះ​បណ្តាលអោយ​ជនរងគ្រោះ​បាន​ស្លាប់​ចំនួន​១៣​នាក់ ក្នុងនោះ​មាន​ស្រី​៨​នាក់​និង​អ្នក​ធ្លាក់ខ្លួន​ឈឺ​មាន​ចំនួន​២៨០​នាក់ ក្នុងនោះ​ស្រី​១៦២​នាក់ និង​កុមារ​៦៩​នាក់​។​សម្រាប់​ជនរងគ្រោះ​ដែល​បាត់​បង់ជីវិត​ទាំង​១៣​នាក់ គឺ​ស្លាប់​នៅផ្ទះ​ចំនួន​៦​នាក់​, ស្លាប់​នៅ​មន្ទីរពេទ្យបង្អែក​ម្នាក់​, ស្លាប់​នៅ​មន្ទីរពេទ្យ​កាល់ម៉ែត​២​នាក់​, ស្លាប់​ពេល​បញ្ចូន​ដល់​មន្ទីរពេទ្យ​កាល់ម៉ែ​ត​២​នាក់​និង​ស្លាប់​នៅ​តាមផ្លូវ​ពេល​បញ្ចូន​ដល់​មន្ទីរពេទ្យ​កាល់ម៉ែ​ត​២​នាក់​៕

ព័ត៌មានផ្សេងទៀត