សាលាក្រុង​បញ្ជាក់​ពី​តម្រាយ​ផ្លូវ​និង​ទីប្រជុំជន​មួយចំនួន​ដែល​ត្រូវ​ចៀសវាង​ហែ​ក្បូន​ឃោសនាបោះឆ្នោត​

06-05-2018 3:12 pm 3166
  ស្តាប់
ស្តាប់ជាសំឡេង

​លោក​ឃួង ស្រេង អភិបាល​រាជធានី​ភ្នំពេញ បាន​ផ្ញើលិខិត​ជូន​ប្រធាន​គណៈកម្មការ រៀបចំ​ការបោះឆ្នោត​រាជ​ធានី​ភ្នំពេញ ស្តីពី​សំណើ​សុំ​ផ្តល់​តម្រាយ​ផ្លូវ​សាធារណៈ ទីតាំង​សាធារណៈ និង​ទីតាំង​ផ្សារ ដែល​គួរ​បញ្ចៀស នៅពេល​ធ្វើដំណើរ​ការឃោសនា​បោះឆ្នោត សម្រាប់​ការបោះឆ្នោត​ជ្រើសតាំង តំណាងរាស្ត្រ​នីតិកាល​ទី​៦ នៅ​ថ្ងៃ​ទី​២៩ ខែកក្កដា ឆ្នាំ​២០១៨ ខាងមុខនេះ​។​

​នៅក្នុង​លិខិត​បាន​បញ្ជាក់បន្ថែម​ថា ដើម្បីឲ្យ​ការឃោសនា​រក​សម្លេងឆ្នោត ក្នុង​យុទ្ធនាការ​ឃោសនា​បោះឆ្នោត ជ្រើសតាំង​តំណាងរាស្ត្រ ដែល​នឹង​ប្រព្រឹត្ត​ទៅ​ចាប់ពី​ថ្ងៃ​ទី​៧ ដល់​ថ្ងៃ​ទី​២៧ ខែកក្កដា ខាង​មុខ​ធានាបាន​នូវ​សន្តិសុខ សុវត្ថិភាព និង​សណ្តាប់ធ្នាប់​សាធារណៈ ជូន​គណបក្ស​នយោបាយ​ទាំងអស់ និង​បញ្ចៀស​បាន​នូវ​ការកកស្ទះ​ចរាច​រណ៍ ដែល​រំខាន​ដល់​ការធ្វើដំណើរ របស់​ប្រជាពលរដ្ឋ ក៏ដូចជា​ភ្ញៀវ​ជាតិ និង​អន្តរជាតិ រដ្ឋបាល​រាជធានី​ភ្នំពេញ ហាមឃាត់​ការប្រមូលផ្តុំ ដង្ហែ​ក្បូន​ឃោសនា តាមផ្លូវ វិថី មហាវិថី ទីប្រជុំជន និង​ទីតាំង​សាធារណៈ​មួយ​ចំនួន​ក្នុង​រាជធានី​ភ្នំពេញ​។​

​លិខិត​ដដែល​ក៏​បាន​បង្ហាញ​ឱ្យដឹងថា  ផ្លូវ និង​មហាវិថី​ដែល​ត្រូវ​ចៀសវាង​ក្នុងការ​ហែ​ក្បូន​រួមមាន​៖​កំណាត់​មហាវិថី​ព្រះ​នរោត្តម​(​ចាប់​ពី​វិមានឯករាជ្យ ដល់​ស្តុប​មន្ទីរពេទ្យ​ព្រះអង្គឌួង​) ,​មហាវិថី​សហព័ន្ធ​រុស្សី​, កំណាត់​មហាវិថី​ព្រះមុន្នីវង្ស​(​ចាប់ពី​ស្តុប​បេ កា សេ ដល់​ស្តុប​អតីត​មន្ទីរពេទ្យចិន​),​កំណាត់​មហាវិថី​ព្រះសីហនុ (​ចាប់ពី​នាគ​បាញ់​ទឹក វិថី​សុធារស ដល់​ស្តុប​អតីត​មន្ទីរពេទ្យចិន​), កំណាត់​មហាវិថី​ម៉ៅ សេទុង (​ចាប់ពី​ស្តុប​ចេនឡា ដល់​ស្តុប​ទេព​ផន​),​កំណាត់​ផ្លូវ​ទេព ផន (​ចាប់ពី​កែង​ស្តុប​មហាវិថី​ព្រះមុន្នីវង្ស ដល់​ស្តុប​នាងគ​ង្ហី​ង​),​កំណាត់​មហាវិថី​សុធារស (​ចាប់ពី​កែង​ផ្លូវ​លេខ​១៥៤ ដល់​មហាវិថី​ព្រះសីហនុ​),​មហាវិថី​ព្រះ​សុរាម្រិត​,​ផ្លូវ​ជុំវិញ​ព្រះបរមរាជវាំង (​កំណាត់​ផ្លូវ​លេខ​២៤០ ផ្លូវ​លេខ ១៨៤ និង​ផ្លូវ​លេខ​១៩)​។​

​ក្រៅពី​មហាវិថី និង​ផ្លូវ គឺ​នៅ​មាន​ទីប្រជុំជន មួយចំនួន​ផង​ដែរ ដែល​ត្រូវ​ចៀសវាង​រួមមាន​៖​ផ្លូវ​ជុំវិញ​ផ្សារ​ធំថ្មី ,​ផ្សារ​អូរឫស្សី​,​ផ្សារ​អូឡាំពិក​,​ផ្សារ​ទួល​ទំពូង​,​ផ្សារ​ដេប៉ូ​និង​ផ្លូវ​ជុំវិញ​ផ្សារ​ដើម​គរ​។​ចំណែក​ទីសាធារណៈ​ដែល​ត្រូវ​ចៀសវាង​ការឃោសនា​ដែល​នោះ​រួមមាន​៖​សួន​ព្រះបរមរាជវាំង​, ទីធ្លា​ព្រះមេរុ​,​សួន​មុខ​វត្ត​បទុម​វត្តី​(​តែ​អនុញ្ញាត​ជូន​នៅ​ទីវាល​ការី​ឡា ចុង​ខាងត្បូង​សួន​វត្ត​បទុម​វត្តី​),​ទីតាំង​វិមាន​ឯករាជ្យ និង​សួនច្បារ វិមាន​ឯករាជ្យ​ទាំងមូល​,​ទីធ្លា​រូបសំណាក​លោកយាយ​ពេញ​,​សួនច្បារ​អ្នក​ភិរម្យ​ភាសា​អ៊ូ ហៅ​ង៉ុយ និង​សួនច្បារ​សម្តេច​ហ៊ុន សែន​៕


ព័ត៌មានផ្សេងទៀត