ម៉ាឡេស៊ី​៖​​លោក​Mahathir​ថា​​ទោះ​រង​ការចោទប្រកាន់​​ពី​រដ្ឋាភិបាល​​ក៏​មិន​ខ្លាច​ដែរ​

04-05-2018 4:51 pm 697
  ស្តាប់
មេដឹកនាំបក្សប្រឆាំងលោកMahathir Mohamad
ស្តាប់ជាសំឡេង

​មេដឹកនាំ​គណបក្សប្រឆាំង​ម៉ាឡេស៊ី​លោក​Mahathir Mohamad កំពុង​ប្រឈម​នឹង​ការចោទប្រកាន់​ពី​រដ្ឋាភិបាល ស្ថិតក្រោម​ច្បាប់​ប្រឆាំង​ព័ត៌មាន​ក្លែងក្លាយ​។ លោក​Mahathir​បាន​និយាយថា លោក​សង្ស័យ​យន្ដហោះ​ផ្ទាល់ខ្លួន​របស់លោក ត្រូវបាន​គេ​លួច​បំផ្លាញ​បន្ទាប់ពី​អ្នកបើកបរ​រកឃើញ​ផ្នែក​ខ្លះ​នៃ​យន្ដហោះ​រង​ការខូចខាត​មុនពេល​ហោះហើរ​។ យន្ដហោះ​នោះ​លោក​ប្រើ​សម្រាប់​ធ្វើដំណើរ​ពី Kuala Lumpur​ទៅ​Langkawi ដើម្បី​ដាក់ពាក្យ​ឈរឈ្មោះ​ជា​បេក្ខជន​នាយករដ្ឋមន្ដ្រី​។​

​ភ្លាមៗ​ក្រោយ​ទទួលបាន​ព័ត៌មាន រដ្ឋាភិបាល​បាន​បញ្ជា​ឲ្យ​បើ​កការស៊ើបអង្កេត​ជាបន្ទាន់ ប៉ុន្ដែ​អាជ្ញាធរ​អាកាសចរណ៍​ស៊ីវិល​និយាយថា មិនបាន​រកឃើញ​ការបំផ្លិញបំផ្លាញ​ណា​មួយទេ​។ ប្រធាន​អាកាសចរណ៍​ស៊ីវិល​និយាយថា​ការអះអាង​របស់លោក​Mahathir​ជា​រឿង​ខុសឆ្គង ជាការ​បំផុស​ព័ត៌មាន​ក្លែងក្លាយ​ដើម្បី​ប្រយោជន៍​នយោបាយ​។ អគ្គស្នងការ​ប៉ូលិស​ម៉ាឡេស៊ី​ប្រាប់​អ្នកសារព័ត៌មាន​ថា ប្រសិនបើ​ចាំបាច់​ប៉ូលិស​អាច​កោះហៅ​លោក​Mahathir​ឲ្យចូល​បំភ្លឺ ជាមួយនឹង​ការស៊ើបអង្កេត​ពី​ករណី​បំ​ផុស​ព័ត៌មាន​ក្លែងក្លាយ​។​

​ជា​ការឆ្លើយតប​លោក​Mahathir Mohamad​ថា លោក​នឹងរង​ការចោទប្រកាន់​ស្ថិតក្រោម​ច្បាប់​ប្រឆាំង​ព័ត៌មាន​ក្លែងក្លាយ​? បើសិន​ដូច្នេះ​សូម​ចោទប្រកាន់​លោក​ចុះ លោក​មិន​ខ្លាច​ឡើយ​។ ថ្លែង​ពេល​ជួប​អ្នកគាំទ្រ​គណបក្សប្រឆាំង​រាប់ពាន់នាក់​កាលពី​ថ្ងៃ​ព្រហស្បតិ៍ លោក​Mahathir​សង្កត់ធ្ងន់ថា “​នៅ​ថ្ងៃទី​០៩​ឧសភា​យើង​នឹង​ទម្លាក់​រដ្ឋាភិបាល​ដែល​ដឹកនាំ​ដោយ​លោក Najib Razak”​។ 

​សូមបញ្ជាក់ថា លោក​Mahathir Mohamad​មេដឹកនាំ​បក្សប្រឆាំង​ដែលមាន​វ័យ​៩២​ឆ្នាំ​ហើយ​នោះ កំពុងតែ​ប្រជែង​គ្នា​យ៉ាងខ្លាំង​ជាមួយ​នាយករដ្ឋមន្ដ្រី​Najib Razak សម្រាប់​ការបោះឆ្នោត​ជ្រើសរើស​នាយករដ្ឋមន្ដ្រី​ថ្មី​ម៉ាឡេស៊ី​។ លោក​Najib​ត្រូវគេ​រំពឹងថា​អាច​នឹង​បន្ដ​ជាប់ឆ្នោត ខណៈ​អ្នកតាមដាន​ស្ថានការណ៍​ថា សំឡេងគាំទ្រ​អាច​ប្រកៀក​ប្រកិត​គ្នា​។ ការបោះឆ្នោត​នឹង​ប្រព្រឹត្ដទៅនៅ​ថ្ងៃទី​០៩​ខែឧសភា​នេះ​៕

 ពាក្យគន្លឹះ  ម៉ាឡេស៊ីលោកMahathir Mohamad

ព័ត៌មានផ្សេងទៀត